Sauaina e se tamaloa lona to’alua ma’itaga i luma o le la fanau

Pago Pago - AMERIKA SAMOA

O le po o Mati 20, 2025 na o’o atu ai se tina ma’itaga i le Ofisa a Leoleo i Leone, e ripotia le sauaina o ia e lona to’alua, i luma o le la fanau.  Ae o le aso na soso’o ai, na o’o atu ai le tamaloa, i le ofisa a leoleo lava lea e tasi, ma ripotia le sauaina o ia e le ‘uncle’ a lona to’alua, ina ua alu atu e aumai lana fanau.

[Ua le lomia suafa o i latou na a’afia ma molia i lenei fa’alavelave, aua le puipuiga o le fanau iti.]

E tusa ai ma fa’amaumauga a le faamasinoga, i le ripoti a le tina ma’itaga lea na o’o atu i le ofisa a leoleo, sa tatu’i ina e lona to’alua o ia, ma manu’a ai ona foliga ma lona tino.  Ae ua fa masina o lona ma’itaga.

Ae o le po na soso’o ai, na o’o atu ai le na molia, i le ofisa a leoleo ma faila ai sana ripoti, i le sauaina o ia e le ‘uncle’ a lona toalua, ina ua alu atu i le fale a le aiga a lona to’alua, e aumai lana fanau.

E le’i umi, ae toe o’o atu le tina ma’itaga i le ofisa a leoleo ma ia fa’ailoa i leoleo, le mafua’aga na ita ai lona ‘uncle’ i le na molia, ona o le fa’alavelve lea na tupu i lo la va, i le po muamua.

Sa ta’ua e le tina na a’afia, na amata le la misa i se la taugaupu ma i’u ai lava ina faamata’u o ia e le ua molia, i le fasia o ia. 

Na ta’ua foi e le tina na a’afia ia le savali atu o lona to’alua (le na molia) ma po ona foliga.  Ma sa ia taumafai e puipui lana pepe (lona ma’itaga) ae peitai, sa ita ai le na molia ma amata ona tatu’i o ia, lea na tau i ona foliga ma lona ulu, ma manu’a ai ona lima ma ona foliga.

Sa ta’ua foi e le tina na a’afia, lona tu’ua o le latou fale, ma ave le la fanau.  O se taimi mulimuli ane, na toe alu atu ai lona to’alua (le na molia) ma piki mai latou ma le la fanau, ae peitai, i se taimi mulimuli ane na o la toe misa ai foi.  Ma tu’i fa’alua ai ona foliga e lona to’alua (le na molia), i luma o le la fanau ma manu’a ai lona mata tauagavale.

Na fa’aalia foi e le tina na a’afia, ia lona fefe i lona to’alua, ona o lona maitaga, ma e le o se taimi muamua lea ua o’o atu ai le lima o lona to’alua ia te ia.  Ma o taimi uma lava e la te pisa ai, e fa’alala ai lava le fasiotia o ia, e lona to’alua (le na molia). 

Sa ta’ua foi e le tina na a’afia ia lona mauaina o ni vaega o fualaau faasaina (Aisa) ma paipa i totonu o le latou fale ma i sona talitonuga, o le mafua’aga lea e faapea ai lona to’alua (le na molia). 

Sa faapea ona avefaapagotaina e leoleo ia le tamaloa ma ina ua fa’atalanoaina o ia e leoleo, sa ia fa’amaonia lona iloa, ua atoa le fa masina o le ma’itaga a lona na .  Ae peitai, sa ta’ua e le na molia, na pa’i muamua atu le fafine ia te ia, o le mafuaaga lea na o’o ai lona lima i lona to’alua.

O moliaga na faasaga i le na molia, na aofia ai le Faatupu Vevesi i totonu o le aiga ma le Fa’ao’olima i lona tulaga e tolu.

O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le o’o atu i aso e 15, po o se sala tupe e $300; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le tausaga atoa, po o se sala tupe e $1,000; po o faasalaga uma e lua.

E $5,000 se vaegatupe na fa’atulagaina mo le tatalaina o le na molia, mai i le falepuipui, e faatalitali ai lona faamasinoga.