Sao o le Malo mo Tagata Matutua Uma - Kerisimasi 2018

E to'a ono i latou e silia ma le 90 tausaga na silisili ona fa'atauaina e le Malo o Amerika Samoa i lenei tausaga fa'atasi ai ma le anoanoa'i o i latou e 80 ma sili atu o latou tausaga, ma le 70 ma sili atu o latou tausaga, ae maise o le vaitausaga 60 ma ona tupu tausaga.

"O i latou ua mae'a ona latou tautua i so'o se ala i lo tatou Malo. O outou o auro ua natia, ae le fa'aitiitia ai lo outou taua i o matou loto ma agaga i totonu o lotoifale o tatou aiga Samoa. E le avea fo'i le talitonuga o le tatou atunu'u, o manuia o lo'o fia maua e i tatou uma ma aiga, e afua mai matua matutua o le atunu'u ma se tatou tausiga lelei o i latou. Lea ua ala ai ona faifai pea lenei sao, o a outou fanau ina ia avatu se vaiinu, po'o se taumafataga mo outou i lenei aso e tasi o le tausaga."

O upu ia sa fa'aula ai e Kovana Lolo Moliga le mamalu o matua matutua sa sasao i le Maota o le Matagaluega o Tupulaga Talavou ma Tina (DYWA) i Pago Pago i le aso ananafi.

"O le fa'amoemoe maualuga lea o le Malo, ina ia fa'afiafiaina agaga o matua matutua, ma ia avea pea le mafutaga ma i latou o e silisili ona matutua i le atunu'u, o se mea suamalie ia i tatou i aso ta'itasi. Aua e maua mea uma i lenei olaga, ae a mou atu matua matutua, e le toe va'aia lava i latou, ao lenei taimi o tatou mafuta pea, ia fa'afetaia le Atua i lana pule to ma le pule fa'asoa, ua tatou aulia fa'atasi mai lenei fa'amoemoe tutasi mo outou matua matutua o le atunu'u,” o sana toe tala lea e tusa o le mafutaga, ona fa'aauau lea o le fiafia.

I totonu o le Maota o le DYWA, ua mae'a fa'alaulau uma ta'ito'a valu, e sasao ai matua matutua, ma ua tofusia i fagu uaina lelei mo le fa'amalosi o tino o matua, atoa ai ma le anoanoa'i o tausami Samoa e aoga ma masani ai i latou, e nanau fo'i ma momo'o i ai i aso ta'itasi. O le Piasua, fa'ausi esi, supo esi, suafai na mua'i tufatufaina lava ina ia fa'anofo filemu le mamalu o matua ma talisua mama fo'i i se malu taeao e fiafia i ai i aso ta'itasi.

I le sauniga na si'itia lea e le susuga le Faife'au EFKAS mai Faleasao, Rev. Iosefa T. Autele lea na si'itia mai ai e ia le mai le Salamo 54:1-7. "E tupu lauolaola le tagata amiotonu...a o'o ina ulusina, latou te fua mai pea lava, e malolosi ma lauolaola i latou..."

“O lea lava le fuaitau e iloga ai i latou ua tino matutua, ae o lo'o tumau lo latou aoga i totonu o latou aiga, le malo ma ekalesia. Aua o i latou o tagata o taumafai i le amiotonu a le Atua. E alofaina fo'i i latou, aua ua latou faatuatua i lo latou Atua."

Ina ua mae'a le sauniga, ona amata loa lea o fa'afiafiaga. Soso’o ai ma le fa'aulaga o i latou e 90 ma sili atu o latou tausaga o le soifuaga. O i latou nei e fa'asolo mai le susuga le Failauga Malolo Manumalo, Ta'ai Lemana, o lona lea sao i le atunu'u, sa avea ma Faife'au Ekalesia Metotisi i lona soifuaga atoa. O ia e 98 tausaga o le soifua.

Soso'o lea ma le susuga Tumama Vaimaga Tuilaepa, sa faigaluega mai le Public Works mo tausaga e tele i lona soifua galue a'o talavou. Ua atoa le 95 tausaga o lona soifua.

O le tina ia Poiva Reid, o ia o se Tama'ita'i Tausima'i Pasi mai lona soifua galue, ma e le'i leva ona tu'ua moni e ia le galuega fa'atausima'i. Ua atoa lona 94 tausaga o le soifua.

O le tina fo'i o Hana Thompson ua atoa le 93 tausaga o lona soifua, ma o lo'o alu lava i ana gaiuega i le TAOA lenei tina i taeao ta'itasi.

O Maiava Hunkin, o se tasi o tama ua atoa lona 92 tasuaga le matua. O ia sa avea ma sui totino o le Koluse Mumu ma e umi fo'i se taimi o avea o ia ma Fa'atama i le Asosi Fusu a Amerika Samoa.

O le susuga Fonoti Fa'ao'o ua atoa i lenei tausaga lona 90 tausaga, ma ua aofia fo'i o ia i le vaega o matua matutua ua silisili ona taua i le fa'amoemoe o lenei tausaga.

O le siva a le Aufaipese a le Malo , DHSS Choir na tatalaina siva mauluulu a tama'ita'i. Ona soso'o lea ma le anoanoa'i o fa'afiafiaga fa'atulaga a le Malaeloa Metotisi o tama ma teine matagofie a latou mauluulu. O fa'afiafiaga na umi se taimi o maimoaina e i latou, ma sa faia fo'i siva fa'atulaga e fa'atauva i ituaiga pese ma siva na iloa i na vaitau a'o talavou i latou ua matutua nei.

O le twist lea sa faia, oka na mua ai le va'a o Manu'atele ma latou umia ai le fa'ailoga. O pepa malaga e o fua ai i le va'alele i le Manu'atele.

Ina ua tufatufaina le tausama'aga, sa soso'o mai ai lava ma le tufatufaga o Meaalofa mo tagata matutua uma sa aofia i le DWYA. Matagofie lea aso, ua fa'afiafiaina fo'i le mamalu o matua matutua.