Sainia tulafono fa’aee ai totogi fou mo le siakiina o uta mai fafo

Ua fa’alauiloa e le afioga i le ali’i kovana ia Lolo Matalasi Moliga i sana tusi i ta’ita’i o le Fono Faitulafono, lona sainia o le pili na pasia e le Fono Faitulafono i le masina na te’a nei, e aloaia ai totogi o tautua ua fa’aee e le malo, i soo se taimi e fa’aaoga ai e le Ofisa o Tiute masini fa’apitoa e su’e ma saili ai uta uma e ulufale mai i totonu o le atunu’u.

O le sainia ai e le ali’i kovana o le pili na pasia e le Fono Faitulafono e avea ma Tulafono a le malo, ua atagia mai ai le taliaina lea e le faigamalo a Lolo ma Lemanu suiga a le Fono ua faia i le aofa’i o le tupe e totogi e tagata faipisinisi fa’apea ai tagatanu’u i soo se taimi e saili ai a latou uta e le Ofisa o Tiute.

O totogi na fuafua e le malo mo le fa’aaogaina o a latou masini fou, e aofia ai le $350 mo uta e au mai i totonu o container e ta’i 40 futu le uumi pe sili atu fo’i, peita’i o lea ua suia e le Fono Faitulafono i le $200, lea fo’i ua malilie i ai le malo.

E $250 le totogi na fa’ae’e e le malo mo le siakiina o uta e aumaia i container e i lalo o le ta’i 40 futu le uumi, e aofia ai ma container ta’i 20 futu, peita’i o lea ua suia e le Fono Faitulafono i le $200, lea fo’i ua talia e le malo.

Mo uta e aumai i pailate, e $100 le totogi na fa’ae’e e le malo, ao lea ua suia e le Fono Faitulafono i le $50, e fa’apena fo’i i uta o ta’avale poo isi mea faigaluega mamafa, lea fo’i na manatu le malo e totogi le $75 e saili ai, peita’i ua suia e le Fono Faitulafono i le $50, lea fo’i ua malilie i ai le malo.

I se vaega o le tusi a Lolo i ta’ita’i o le Fono Faitulafono i le aso 4 Oketopa, 2016, e le gata sa ia fa’ailoa i ai lona sainia o le tulafono o le tulafono sa latou pasia, ae sa ia fa’afetaia fo’i le Fono Faitulafono i lo latou naunau e pasia lenei tulafono ina ia fa’amalosia atili ai tulafono e fa’atino ai galuega a le Ofisa o Tiute, aemaise lava i le tulaga o le su’eina lea ma le sailia o uta mai fafo e ulufale mai i le atunu’u.

“Ou te fa’afetai atu i le galuega sa outou fitaituga i ai, i le lagolagoina lea o le fa’aaogaina o masini faapitoa e saili ai e le Ofisa o Tiute uta uma e ulufale mai i le atunu’u. O le fa’atinoina e le Ofisa o Tiute o lea galuega, ua atagia mai ai le tu’uina atu o le isi malosi latou te fa’atinoina ai a latou galuega, e ala i le sailia o uta ma oloa e aumai i le atunu’u, ina ia mautinoa e puipuia lo tatou atunu’u mai le a’afia i fa’afitauli mai fafo”, o se vaega lea o le tusi a le ali’i kovana i ta’ita’i o le fono.

O le agaga atoa o le Fono Faitulafono na mafua ai ona latou fa’aitiitia totogi na manatu le malo e fa’aee i luga o le aufai pisinisi ma tagata lautele, ina ia aua nei mamafa le avanoa e tausoa e le atunu’u, ona o le taumafai o le malo e saili oloa o lo o aumai fa’asolitulafono i le atunu’u e aofia ai fualaau fa’asaina ma a’upega mata’utia.

Na taua e le afioga i le ali’i Senatoa ia Magalei Logovi’i i le iloiloga na fesiligia ai le Teutupe a le malo e uiga i le mataupu lenei, e le tatau i le malo ona naunau e si’i maulauga totogi o a latou tautua ina ia ola ai latou, ae pagatia ma pologa ai le atunu’u.

Saunoa atili Magalei e fa’apea, afai e fa’aee e le malo totogi maualuluga nei i tagata faipisinisi, e lliliu tagata faipisinisi ma sii i luga tau o oloa ina ia fa’apaleni ai tupe ua latou fa’aalu i le aumaia o oloa mai fafo.