Saini Kovana le pili lesitala ai tagata sa faia solitluafono fanau

O le vaiaso na te’a nei na sainia ai e le afioga i le ali’i kovana ia Lolo M. Moliga le pili na pasia e le Fono Faitulafono, e fa’atulafono ai le lesitalaina o tagata sa ta’usala i solitulafono o le faia lea o uiga mataga i fanau laiti (SORNA).

I sana tusi i Ta’ita’i o le Fono Faitulafono, na taua ai e Lolo lona fiafia tele ina ua mafai ona pasia e le Fono Faitulafono lenei tulafono taua, ina ia mafai ai ona iloa e le malo fa’amaumauga sa’o e fa’atatau ia i latou sa fa’atinoina nei solitulafono.

E le gata i lea, ae o se itu taua tele fo’i e mafai ai ona mulimulita’i Amerika Samoa i le fa’amalieina o le tulafono feterale, lea o lo o mafai ai ona fa’atupe mai ai taumafaiga e lagolago ai puipuiga i lalo o le tulafono o le SORNA.

“Ou te fa’afetai atu i lo outou finagalo malamalama ua mafua ai ona pasia lenei tulafono. Ou te talitonu atoatoa o lenei tulafono o se tulafono taua ma aoga mo Amerika Samoa,” o se vaega lea o le tusi a le ali’i kovana.

O le agaga o lenei tulafono e pei ona talosagaina e le faigamalo a Lolo ma Lemanu, o le taumafai lea ina ia fa’atulafonoina loa le lesitalaina o suafa o i latou uma sa fa’amaonia i solitulafono eseese, e aofia ai le faia o uiga mataga i fanau e laiti i lalo o le tulafono.

O lenei tulafono na pasia muamua e le Fono Faitulafono i le 2014, ae na toe tuuina atu i luma o le Fono mo ni nai suiga laiti, ina ia saga fa’amalosia atili ai le lelei o le tulafono, i le mae’a ai lea ona maitauina o nai vaega e moomia le fa’aleleia atili.

I le 2009, o setete uma ma teritori o le malo tele e maua fesoasoani tau tupe mo le polokalame lenei, ua leva ona moomia le matuai faagaioia o tulaga aupito maualalo o le tulafono o le SORNA.

O le tulafono e pei ona i ai, o lo o mafai ai ona fa’aitiitia i le 10 tausaga le taimi e lesitala ai i latou e soli le laasaga II o le tulafono, pe afai e tumau ona tausia o se fa’amaumauga mama mo tausaga sosoo e 10, ae o le aiaiga lea, e le o usitaia ai le SORNA.

O lenei la suiga fou e pei ona toe teuteuina, o le a faataga ai le malo e fa’aauau pea le vaavaaia o tagata e matua sili atu ona mamafa le soliga tulafono i tulaga tau feusuaiga fa’asaga i fanau.

O le agaga atoa o le tulafono lenei o le SORNA, e fa’aagaga lelei mo le saogalemu o a tatou fanau, ma ia silafia lelei ai e le atunu’u tagata solitulafono o lo o nonofo latalata i nofoaga eseese i totonu o le atunu’u.

Ina ia usitaia e le malo ta’iala ma suiga e pei ona tuuina mai e le feterale, o le mafuaaga lea ua manaomia ai le toe teuteuina o lenei tulafono, ina ia mafai ai ona ausia tulaga uma e fa’atatau i le lesitalaina atoa ai ma le fa’alauiloaina o i latou sa ta’usala i nei ituaiga solitulafono mamafa.

Ina ia tusa ai ma le Vaega II, Maga 19 o le Fa’avae Toe Teuteuina o Amerika Samoa, o le a taualoa lenei pili i totonu o le 60 aso talu ona mae’a le tauaofiaga a le Fono Faitulafono sa pasia ai.