Saili auala e foia ai le tele o gasegase matuia i le atunu’u

O le fonotaga tele a le vaega o lo o galulue mo le puipuia o le Soifua Maloloina i le atunu’u, lea ua fa’amoemoe e tatalaina i le taeao nei mo le umi e 2 aso, o le a talanoaina ai auala eseese e mafai ai ona puipuia le atunu’u mai le a’afia i gasegase matuia e aofia ai le kanesa, tino puta, kanesa o le susu, fa’apea ai gasegase o lo o feavea’i e namu e pei o le Zika virus ma le Dengue fever.

Na taua e le Pulesili o le Ofisa o Falema’i o le LBJ i Fagaalu, tofa Taufefe’e John Faunuina i le Samoa News i le taeao ananafi e fa’apea, o le taua o lenei fonotaga, o le a mafai ai ona o mai fa’atasi ta’ita’i o vaega o lo o galulue i le puipuia o le soifua maloloina o le atunu’u, e fa’asoa manatu ma lagona eseese e fa’atatau i auala e tete’e atu ai le tele o fa’ama’i eseese o lo o a’afia ai o tatou tagata.

Saunoa atili le ali’i pulesili e fa’apea, e tatau ona fa’aauau pea galuega o le taulogologo lea o le atunu’u i auala e puipuia ai i latou mai le a’afia i fa’ama’i eseese o lo o pipisi solo, ina ia mautinoa e to’atele atu tagata e soifua maloloina nai lo i latou e a’afia i gasegase ma i’u ina maliliu ai.

O le itula e 8:30 i le taeao nei i le Fale Laumei i Utulei, ua fa’amoemoe e tatala aloaia ai le fonotaga fa’apitoa mo sui o le Soifua Maloloina, e talanoaina ai auala eseese e mafai ona tete’e atu ai i auga o fa’ama’i eseese o lo o to’atele le atunu’u ua a’afia ai.

O le tofa a Taufetee lea ua fa’amoemoe e saunoa i le tatala aloaiaina o lenei fonotaga, ae o le saunoaga autu o le polokalame ua fa’amoemoe e saunoa i ai le Lutena Kovana, afioga Lemanu Peleti Mauga.

O le agaga atoa o lenei fonotaga fa’apitoa e pei ona saunoa Taufete’e, ia mafai e vaega a le malo o lo o galulue i le tausiaina o le soifua maloloina o le atunu’u ona fetufaa’i i metotia ma auala eseese e mafai ai ona maua se fofo i le tele o le mau fa’ama’i

O ni isi o sui o le a maua le avanoa latou te fa’asoa ai auala eseese e foia ai ma puipuia ai le atunu’u mai fa’ama’i eseese e aofia ai le ali’i foma’i ia Dr. Tuato’o Seakerise Tuato’o mai le falema’i o le LBJ, lea o le a ia talanoa i le gasegase o le kanesa i Amerika Samoa, ma le susuga ia Magele Scott Anesi lea o le a talanoa i le gasegase o le zika ma le denger virus i le atunu’u.

O lenei fonotaga ua fa’amoemoe e tapunia i le itula e 4:00 i le afiafi o le aso To’onai, Oketopa 22, 2016, ma fa’amavae ai loa sui usufono uma o le a maua le avanoa e feiloa’i ai i lenei fonotaga taua.