Saeni Lele’a Galue Fresnius Medical Care - Inisinia Fa’afoma’i

O le tama’ita’i Samoa o Saeni Lele’a, o se tasi o le vasega fa’aiuaso mai ia Tesema 2019 fa’au’u mai UC Davis i lana kosi o le Biomedical Engineer, ma ua avea nei ma tagata faigaluega i Fresnius  Medical Care. E ese mai le lala o lea falema’i i Silicon Valley, e i ai fo’i le i Honolulu.

Fa’ailoa e Lele’a, o nai ona matua uma e o mai i Samoa, ma sa ulufale atu i Amerika e sailia manuia mo le aiga, o se luiga sili lea ona taua ia te ia, e atili ai ona taumafai i so’o se mea ua i tausinio ai, ona o le manatu i le faigata na uia mai e matua, ina ia lelei aoga, ma ia a’e manumalo faiva o fanau, e toe fesoasoani ai i aiga o tapua’ia lo latou aumau ai i nei nuu ese.

Na soifua a’e o ia i Bakersfield, ma o lo ua faamautu o ia i Hayward i Amerika. E to’a iva ona uso ae to’atolu ona tuagane, ma e afua mai le laititi i a’oga tulaga muamua i Hayward ma soso’o ai ma a’oga maualuluga i lena lava a’ai, mai le amataga o a’oga, o le ki lea i le lumana’i, ma e le’i fa’atamala fo’i le uunai malosi a matua i lena itu i suesuega mai le amataga se’ia o’o ina ulufale i le Iunivesite.

O le kosi lava sa amata mai o fa’anaunau e fia faaiuina manuia ai le taumafaiga, lea ua oo ina fa’au’u mai ma tikeri, o le Biomedical Engineer.

Ina ua siitia a’oa’oga i le Kolisi, na iloga ona siisii fo’i le faigata o le kosi, ae ua sulu ma le ulu lava i ai, ona ua iloga, o le lumana’i lea o le tele o togafitiga ma vaifofo mo fa’ama’i i le vaitau o le lumana’i, ua fa’amautu lea i suesuega uma e fa’atino i masini fa’atekonolosi o lenei vaitau ma le talutalufou.

“E leai se taumafaiga e le matagi taumuaina i ni faaletonu, na muamua lava le pasi le suega muamua, ae o le loto e ao ina ki i le ki, e sa le fo’i,” o se tala a Lele’a.

“O taumafaiga o le manuia, e matua fa’amaulaloina ai lou loto, ae avea o se lu’iga maualuga, e ao ina e manumalo ai i tulaga o sailiga o le atamai. Sa manatu muamua lava o le a tausinio i se fa’ailoga fa’afoma’i, ia mafai ona toe fo’i i se vaiau o le soifuaga i fanua, Samoa le atunuu pele tele i o’u matua ma lo’u aiga atoa, ae ua agava’a e tautuaina tagatanuu o Samoa e ala  i se foma’i ua agava’a e tua i ai i latou ua fa’agasegasea o le atunuu.”

“Peita’i, e le o se tasi e matele ina fiafia e talatalanoa ma fa’afesilia ni afaina o nisi si o’u tagata fa’atauvaa, o le ala lea sa toe manatu ai i se aoga e faia i tua atu o laina e fa’afeiloa’ia ma fa’atalanoa tagata, sailia togafitiga ia tautuaina e gasegase o le atunuu, ae faia na’o a’u lava ma le masini e fa’aaogaina.”

“O le ituaiga galuega lenei, e fa’aaogaina le matematika ma ala fa’asaeanisi e sailia ai togafitiga aoga tele mo tagata o lo’o gasegase i so’o se ituaiga o gasegase tumau, pe verusi ma fa’ama’i pipisi.”

Ua faailoa fo’i ma le mautinoa e Lele’a, “E le’i faigofie lava le ala ua uia i le amataga o le kosi mo le lua tausaga atoatoa, ae oo ane i le lona tolu o tausaga, ua alofagia e le Atua le taumafaiga, ua ofi ma aoga le aoaoga i le mafaufau ma ua atagia ataata o taulelei, ua matala fo’i mea uma o le mafaufau fia iloa ma tausaili ma le toto’a.”

O se mea sili ona lelei mo Lele’a, ona ua fa’akonekarate e faigaluega i le mae’a ai ona umia o lona fa’ailoga, Biomedical Engineer, ma o se tau sili lea ona aoga ia te ia ma le olaga tausaili o lea ituaiga o tomai fa’apitoa.

O lana galuega ua fa’atino nei, e na te saunia lipoti maumaututu o fa’aiuga o suesuega sa taua’aoina ina ia sailia togafitiga e faaaogaina ai masini fa’atekonolosi fou, ma o ia lenei e na te fa’atulaga fo’i ituaiga o masini e fa’aaogaina mo suesuega ina ia sa’o ma tonu togafitiga o mana’omia mo gasegase o so’o se ituaiga o saili vaifofo.

E ao fo’i ia te ia ona faitauina lelei masini ma ala o le latou fa’aaogaina ai mo suesuega, ina ia le sasi lava se gaoioiga a ali’i ma tamaita’i foma’i aua togafitiga moomia mo gasegase o fia togafitia ia toe malolosi.

Ua fa’ailoa e Lele’a, “Ua ou fiafia ua maua lenei vaitau se’i aga’i i le ala na tausinio mai ai e galue ma fa’atino le galuega, ia fa’amasani i le ala e fa’atautaia ai togafitiga ma va’ai i ni fua e aoaoina atili ai, ae o lo’o i ai le fa’anaunau, e le muta ai i lenei le olaga tausaili i tusi pasi maualuluga, e ao ina la’asia le isi la’asaga o le lumana’i, ina ia sailia agavaa sili atu nai lo le mea ua i ai nei le taumafaiga.”

I totonu o Fresnius Medical Care, ua na’o Lele’a lava le tagata mai le atu vasa ua faigaluega ai, ae o le taua fo’i lea, aua ua iloga ua i ai se isi ua ausia lea fo’i matatia i lenei taumafaiga. “E ao ina fa’ateleina avanoa fa’apenei e fa’atumu mai e le fanau talavou a le atunuu ma atumotu o le pasefika. O le va’aia fo’i lea o nei ituaiga o suesuega mo togafitiga o gasegase ua fa’amautu atu i o tatou atumotu eseese.”

Mo le fanau o lo’o tausinio mai i tulaga o suesuega fa’asaeanisi, ua fautuaina lava, “Aua ne’i fa’avaivai e tausaili, e amata mai i le faigata, ae a oo ina fesoasoani le mana lilo o le Atua i le mafaufau tausaili, e malama mea uma i le taimi tonu lava ua fa’amanuia mai ai o ia i o tatou mafaufau vaivai, ma si’itia ai le atamai ma le iloa o le tagata ina ia aoga ai i ona tagata.”

O lana fa’afetai i ona matua ma le aiga ona o le sapaia o lona fa’amoemoe mai le amataga o aoaoga se’ia o’o ina fa’au’u ma ua faigaluega nei, ae ua le galo fo’i ia te ia le vasega o ona faiaoga uma lava sa latou aoaoina o ia mai le amataga se’ia o’o i le fa’aiuga. “Afai ou te aoga i so’o se tasi, ua aoga la outou galuega na fau fa’atasi mai le amataga se’ia oo i lenei taunuuga, fa’afetai tele lava.”