RIPOTI MAI I LE OFISA A LEOLEO

Pago Pago - AMERIKA SAMOA

MOLIA SE ALII I LE FESOASOANI I SE PAGOTA E SOLA MAI I LE FALEPUIPUI

O le aso 14 o Iulai, 2023 i le 6 i le afiafi, lea o lo o masalomia na fesoasoani ai le alii o Chris Amituanai, i se pagota tamaitai e suafa ia Senara Patu, e sola ese mai i le toese i Tafuna. 

O lea ripoti i le solaaga a Senara, sa ripotia i se lomiga a le Samoa News i se vaitai ua tuanai.   Ma sa ripotia ai le faamatalaga a Senara e tusa ai ma le mea sa tupu i lea aso.  Ae i le faamatalaga a Amituanai, sa ia ta’ua ai e faapea, sa alu atu i se taxi ma tu i le pakaga a le Paka Liona lea e faafesagai ma le toese, e faatali ai Senara.  Ina ua ia vaai atu ua agai mai i fafo ia Senara mai i le falepuipui, sa ia fai atu loa i le ave taxi e alu atu lana taavale i luma o le falepuipu i le mea na tu mai ai Senara, ma piki le tamaitai ma la malaga ese atu ai.

Na malaga atu Amituanai ma Senara i le fale o Amituanai i Pago Pago ma ina ua maea ona faia se la mafutaga faaleulugalii, na o la toe valaau ai seisi taxi e piki la’ua ina ia toe faafoi mai Senara i le falepuipui.

Ae a’o agai mai le la taavale i Tafuna, na toe liliu e le ave taxi ia le taavale i Fagaalu ma toe foi atu agai i le falemai ma tu ai i tafatafa o se taavale leoleo sa i Fagaalu ma aveina atu ai loa i la’ua ia i le Ofisa a Leoleo i Fagatogo mo suesuega.

Ua molia nei Amituanai i le fesoasoani i se pagota e sola ese mai i le falepuipui. 

E $5,000 le tinoitupe ua faatulagaina e tatala ai o ia i tua.

MOLIA SE ALII I LE FASI TOALUA

Na valaau se tina loto mafatia mai i Pago Pago, i le ofisa a leoleo i Fagatogo, mo se fesoasoani ona ua fasi o ia e lona toalua.  Ae ina ua taunuu atu leoleo i le fale o le tina, ua sola le tama o le aiga.

Sa faamatala e le tina loto mafatia, na manava mai i le 10:30 i le po.  Ma a o faia se la taumafataga ma le toalua a le tuafafine o lona toalua, i luga o le laulau, sa faateia o ia i le alu atu o lona toalua, ua fasi o ia.  O lea na tamoe ai loa i le telefoni ma valaau le ofisa a leoleo.  Ae o le taimi lea na toe tau ai le tu’i a lona toalua ia te ia, ma pa’u atu ai i luga o le nofoa sa momoe ai le la fanau.

Na ta’ua e lenei tina, a’o iai o ia i luga o le telefoni, sa savali ese lona toalua ma le fale, ae na toe valaau mai, “E va’ai iai la’u mea e fai ia te oe le po nei”.  Sa faamatala e lenei tina, e le o se taimi muamua lenei ua o’o atu ai le toasa o le tama o le aiga ia te ia.  O le taimi muamua na tupu ai lenei faalavelave, na tuli faataamilo ai o ia e lona toalua ma se naifi.

Sa ta’ua foi e lenei tina, o lona toalua o lo o nofo vaavaaia lona toalua ma o le aso 22 o le masina fou lea e tatau ai ona toe o’o atu i luma o le faamasinoga.  O le suafa o lenei tamaloa, o Laupepa Toto ma o lo o molia o ia i moliaga e 4, e aofia ai le faatupu vevesi, o le faaoolima ma le faia o se gaioiga e ono aafia ai le saogalemu o le fanau.

E $2,000 le tinoitupe ua faatulaga e tatala ai lenei alii i tua. 

MOLIA I LE FAATUPU VEVESI MA LE TETE’E I TIUTE A LEOLEO

O le aso 10 o Aukuso, 2023 i le 7:05 i le taeao, na valaau atu ai se tamaitai i le ofisa a leoleo i Tafuna e ripoti ai lana uo tama, o Reuben Seilala, lea o lo o tau faamata’u ia te ia, e ala i le faalala o le fasiotia o ia ma le susunuina o lona fale, i Faleniu.

Na taunuu sui malu o le malo, ma faamatala mai e le tamaitai sa valaauina le ofisa a leoleo, i le 4 i le vaveao, a’o tofa o ia, sa alu atu ai Seilala i lona fale ma fafagu o ia ma amata ona faamisamisa atu ia te ia.

Sa faamatala e lenei tamaitai le faalala atu o le fasiotia o ia e Seilala ma le susunuina o lona fale, ma o lea na sola ai i le fale o lona ‘aunty’ ma valaau ai loa le ofisa a leoleo.  Ae na mulimuli atu Seilala ia te ia, i le fale o lona ‘aunty’ ma fai atu ia te ia, e aumai se sikaleti.  Ae ina ua tali mai le tamaitai, e leai se sikaleti, na valaau atu Seilala, o le a ia fasiotia o ia (tamaitai) ona pule ai lea i lona ola, ma e na te le kea pe valaau ia leoleo, aua o le a ia fasiotia le leoleo muamua e vaai iai.

Ina ua maea ona talatalanoa leoleo ma lenei tamaitai, sa agai atu loa sui malu o le malo e saili le alii o Seilala ae peitai, sa le i mauaina o ia.  O lea na fautuaina ai le tamaitai ina ia faafesootai vave atu le ofisa a leoleo pe a toe vaai seisi ia Seilala.

O le 12:12 i le aoauli o le aso lava lea e tasi, na toe valaau atu ai le tamaitai na a’afia i lenei faalavelave, i le ofisa o leoleo e faailoa iai, o lea ua toe foi mai Seilala.  Na agai atu loa leoleo i le fale ma tuitui le faitotoa, ae ina ua tatala mai e Seilala ma faailoa atu e leoleo o le a aveina o ia, sa taumafai Seilala e toe tapuni mai le faitotoa.  Ae peitai, na mafai ona lokaina mai o ia e leoleo.  Ina ua suesueina lona tagata, sa maua ai e leoleo ia se pepa sikaleti ma ni maliuana taai se lua.

Na faamaonia e Seilala i le latou talanoaga ma leoleo, sa ia faafefeina lana uo teine, o le a ia fasiotia o ia ma susunu i lalo le fale ona o lona toatamai tele.

O lo o ua molia nei Seilala i le faatupu vevesi ma le tete’e i le faatinoina o tiute a leoleo.

E $500 le tinoitupe ua faatulaga e tatalaina ai i tua Seilala mai i le falepuipui.