RIPOTI MAI I LE OFISA A LEOLEO

Pago Pago - AMERIKA SAMOA

FAATUPU FAALAVELAVE I NOFOAGA LAUTELE

O se alii e suafa ia Eti Sioeli, o lo o masaloma i lona alu atu i le fale o lona tuaoi i Nu’uuli ia Iulai 14, 2023, ma se la’au ma tuitui i le faitotoa o le fale a lona tuaoi, ma fesiligia lona tuaoi pe iai se mea o tupu.  Sa le i mautonu le tuaoi ma taumafai e le amanaia lenei alii, ae peitai na amata ona leotele lenei alii ma fesili pe iai seisi e fia fusu.

O le 2 i le aoauli na fa’aauau ai lava le gaioiga a Sioeli, o le tauvalaau leotele pe iai seisi e fia fusu ma ia ma o lea na valaau ai loa e ana tuaoi ia le ofisa a leoleo.  O le lona tolu o aso na soso’o ai, na tauai ai e Sioeli e tasi ia le fale a lona tuaoi ma palauvale leotele.

Sa faamatala e se tasi na molimauina gaioiga a Sioeli, sa eva i le fale a lona tuaoi ma o lona toe foi atu i le latou fale, na ia faalogoina ai se tasi o valaau atu ma sa ta’ua e le alii na molimau, sa ia iloa le leo lea na valaau atu.

Na ta’ua e le molimau le sulufai atu o se tasi o ana uo/tuaoi, mo se fesoasoani ona o lea ua le gata ina pisapisa o ia Sioeli, ae ua amata ona ia tauaia lona fale i ni ma’a.  Na agai atu le molimau ma lana uo i le fale ae o lo o tauaia e Sioeli, ma sa o la faalogoina le palauvale ma le faia o faamatalaga tau faamata’u, e Sioeli.

Sa faamatala e le na a’afia i lenei mataupu, sa faia ni ana galuega i lona fanua ae na faate’ia o ia ina ua tauai atu e Sioeli faamalama o lona fale.  Na ta’ua e lenei tuaoi, le valaau atu o Sioeli ia te ia, e alu ese ma le fanua, ona o lona fale o lo o fau i luga o fanua a le lotu, ae sa na ia le amanaiaina Sioeli, ae ua agai atu i le fale o lana uo mo se fesoasoani ma valaau ai leoleo.

Ina ua maea ona faatalanoaina ia tuaoi nei, na o latou aveina atu loa Sioeli i le ofisa leoleo i Tafuna mo sana faamatalaga e uiga i lenei mataupu.

Sa ta’ua e Sioeli lona toatamai i le maliliega sa faia i le va o ia ma le molimau e uiga i le fanua lea o lo o nofo ai.  Sa faamatala e Sioeli, na tamo’e atu lona afafine ma ta’u atu ia te ia, o lo o fuafua lona tuaoi e susunu le latou fale, ma e na te le iloa se auala e puipui ai lona aiga ma o le mafuaaga lea na ia faia ai lea tulaga.

Sa lokaina Sioeli i le falepuipui ma i lona uluai iloiloga na molia ai o ia I le faatupu vevesi i nofoaga lautele ma faatonuina o ia e totogi le $500 e mafai ai ona toe tatala mai o ia mai i le falepuipui.

IAKOPO-PULENU’U SEKOPE 

A’o feagai ai sui malu o le malo ma a latou suesuega masani i Tafuna, i tafatafa o fale kalapu a le Bowling Alley ma le Sports Bar, ia Iulai 2, 2023 i le 1:50 i le taeao, na fetaui ai ma se alii o savali lava ma palauvale leotele.

Na agai atu iai leoleo ma fesiligia lenei alii, lea na faamaonia e suafa ia Iakopo-Pulenu’u Sekope, ma fesiligia le mafuaaga o lo o pisapisa o ai, ae tali Sekope, o lo o agai atu i le latou fale.  Na lagonaina e leoleo ia le manogi fa’asuaava o Sekope.

Sa fautuina e leoleo ia Sekope e agai sa’o i lona aiga ae aua nei toe pisapisa o pe palauvale i lea nofoaga.  Na agai ese leoleo e fa’aauau o latou tiute, ae peitai, o le toe taamilo mai i le nofoaga lava lea e tasi na maua ai Sekope, i le te’a o le itula atoa, o lo o fufusu atu ai Sekope ma seisi tagata i luma o le fale faatali pasi, i luma tonu o le ofisa a le Koluse Mumu.

Na agai atu leoleo ma taofi le fusuaga a le toalua lea ma lokaina mai ai loa Sekope.  Sa ta’ua i le ripoti a leoleo le taumafai o leoleo loka Sekope ae tete’e mai Sekope. 

Sa suesueina foi e leoleo le tagata lea na fufusu ma Sekope ae faamatala e lea alii, o ia o se avetaavale la’u pasese ma na alu atu e piki sana pasese i luma o le fale faatali pasi ae togi ai e Sekope lana taavale i se apa pia – lea na mafua ai ona o la fufusu.

Ua molia nei Sekope i moliaga o le faatupu faalavelave i nofoaga lautele, tete’e i leoleo a o taumafai e ave o ia ma le faaoolima i lona tulaga e tolu.

E $300 le tinoitupe faatulagaina e mafai ai ona toe tatala i tua ia Sekope.