Ripoti lata mai i poloketi faatupeina e le ARPA i le nofoaiga fou

Pago Pago - AMERIKA SAMOA

O se fa’aaliga fa’alauaitele mai i le malo o Amerika Samoa, e tusa ai ma se ripoti lata mai i poloketi o lo’o faatupeina e le ARPA (American Rescue Plan Act), talu mai le aso 31 o Tesema, 2024.  Ua faapea ona fa’alauiloa mai ai le taunu’u ona fa’aaogaina o le $94 miliona  i tupe a le ARPA mai i le Ofisa o Tupe a le Iunaite Setete.

Ua ta’ua i lea fa’aaliga le fa’aaogaina o nei vaegatupe i le tele o ni polokalama mo le fa’aleleia o tala o le tupe, tautua mo tagata lautele ma le faamautuina o le tulaga malosi i totonu o le atunuu.

E fa’aopoopo atu i nisi o polokalama sa amataina mai e le faigamalo ua mavae atu, ua faapea ona pasia e le afioga i le Kovana Pulaali’i N. Pula, i se taimi lata mai, nisi o poloketi fa’aopoopo a le ARPA, i lalo o se vaegatupe na fa’aagaga a le ofisa o le kovana, e $20 miliona, mo se falemai fou.

O nei poloketi e aofia ai, se poloketi a le Homeland Security mo feso’otaiga; o le poloketi a le Matagaluega mo Vaega Sailiili ma Lavea’I, mo le EMS, Vaega Tineimu, Leoleoga o le Gataifale ma sauniuniga aua fa’alavelave fa’afuasei.

O poloketi mo le Ofisa a Leoleo aua a’oa’oga a leoleo mo fa’alavelave faafuasei. O se va’a mo le Matagaluega o Alagamanuia i le Sami ma le Vaomatua.  E le gata i lea, o se poloketi mo le Ofisa o Tagata Matutua.

E le gata i lea ae faapea foi se poloketi mo le Ofisa mo le fa’aleleia o va’a a le malo, atoa ai ma le Ofisa o le Vocational Rehabilitation.

O lo’o aofia foi i totonu o le ripoti, ia se fuafuaga i le tapunia o le fale o lo’o iai le Argosy, i Tafuna, i lenei masina, ae fa’atauina atu i le Ofisa o le Soifua Maloloina.

Ma o lo’o ta’ua ai i lenei ripoti le iai o se fuafuaga, mo le fa’avaeina o ofisa autu fou a le DOH i lea fale, ma o le a faapea ona fa’afaleina uma ai vaega, ofisa ma auaunaga a le DOH.

O le fanua ma le fale lea ua masani tagata o le atunu’u, ona ta’ua o le ‘Argosy’, e pulea e le kamupani a Haleck, ae peitai, talu ona tapunia ofisa a lenei Iunivesite, o lea ua toe suia ai le igoa o le fale, o le ‘Ottoville Professional Building’.

E le’i ta’ua i totonu o le fa’aaliga a le faigamalo ia le aofaiga o le tau  o le fale ma le fanua, lea o lo’o felata’i ma le ofisa a le Homeland Security, i leisi itu auala.  O le fanua ma le fale lea o lo’o faamautu ai nei foi ia le Homeland Security, sa faapea foi ona faatauina mai i le Haleck Enterprises.

E le o mautinoa pe sa faatupeina lea faatauga, i tupe a le ARPA, ona e le’i ma’oti mai i le fa’aaliga a le malo.

O lo’o ta’ua i totonu o le fa’aaliga a le malo, le u’una’ia o le mamalu lautele e iloiloina poloketi o lo’o fa’agasolo a le ARPA, e aofia ai fa’amatalaga faalauaitele ma le fa’aaogaina o vaegatupe, o lo’o i luga o le uepesite a le ARPA.  Ae le gata i lea, o le a galulue ia le vaega o fesootaiga i le aoina o fa’amaumauga ma ripoti aua le nofo malamalama o le mamalu lautele.

Ae peitai, sa faapea ona a’apa atu le Samoa News i le ofisa a le ARPA aua nisi fa’amatalaga faaopoopo e tusa ai ma le fa’atauga o le fale sa iai le Argosy, faapea ma le tulaga o poloketi a le Ofisa o Aoga lea na te’ena mai e le malo feterale, le toe faaopoopoina o aso e mafai ona fa’aaogaina ai tupe a le ARPA i tua mai ma le aso faatulagaina, ia Mati 31, 2025.

O lo’o talitalia se tali mai i le faatonusili o le ofisa, ia Robert Gebauer, ae ua maua mai tala, o le poloketi a le Ofisa o Aoga, e le o i lalo o le va’ava’aiga a le ofisa o lo’o mata’ituina le fa’asoasoaga ma le fa’amautuina o vaegatupe a le ARPA.

I le taimi nei, e $42 miliona ia le vaegatupe lea sa fa’aagaga mo poloketi a le ofisa a aoga, lea ua tatau i le malo o Amerika Samoa, ona toe fa’afo’i i le malo feterale, pe afai ae fa’aauauina ona te’ena e le malo feterale, ia talosaga mo taimi faaopoopo e fa’amae’a ai poloketi lotoifale, po o le le pasiaina o poloketi, ona e le o gatasi ma aiaiga a le ARPA.