Regina Meredith - toe amata ana a’oga tusiata i le Hope House

O le aso Lulu na o'o atu ai le tama'ita'i faia'oga o le Kolisi Tu'ufa'atasi i mataupu tau Atisi, Regina Meredith, ina ia toe fafagu mai le vasega tusi ata sa masani ona ia fa'atautaia i tausaga ua mavae, ae ua loa fo'i ona le toe fa'aauauina.

O lana auaunaga lea sa fa'atino, aua sa nofoia e nisi o fanau e i ai mana'oga fa'apitoa le Hope House, ae na matua iloga le atamamai i le tusi ata ma le vali ata i le tapoleni.

“O Rudy Steffany, ma Tony Hema, o nisi sa tauavea latou a'oga tusi ata i le Kolisi, e ui ina e fa'anonofo lava ma feoa'i i a la'ua nofoa fa'ata'avalevale. Ua mae'a lelei ona fa'au'u i la'ua nei i le Kolisi ma la'ua fa'ailoga AA i le Atisi,” o se fa'amatalaga lea a Meredith e tusa o le aoga tele o lana lea vasega i na tausaga ua tuana'i.

Peita'i o lea ua fa'ato'a toe tau fafagu mai i lenei vaitau, ma ua i ai le ulua'i fa'atasiga lea ma i latou o lo'o tausia mau i le Hope House, ae o nisi fo'i o tausia lelei i o latou lava aiga, ae sa vala'aulia ina ia o'o atu e auai i lea vasega mo i latou.

O le susuga Justin Lutu, le ali'i ua fa'atolu ona maua Pine Auro i le  Olimipeka Fa'apitoa, sa auai atu ai fo'i, ma sa iloga ona fiafia i lona avanoa e lisia atu ai e ia mea e sili ona mana'o e fia faia i lona olaga i le taimi nei."

“O lo'u mana'o lea ou te fia faia e numera muamua lava le "Fia Alu i Amerika ma nofo mau ai loa!Lona lua ou te mana'o ina ia tele ni a'u avanoa ou te ta'alo ai i le Olimipeka ma malo mai ai." Ua fa'afiafiaina matua, aua e le o mailoa lava mana'oga lilo o Justin o i ai, ae leai se mea e popole ai, e to'atele ona uso ma tuafafine i fafo e mafai ona nofo ai le tama o Justin Lutu pe afai e fia masi'i i Amerika e alaala tumau ai.

O le latou a'oa'oga lea sa toe fafagu ai le fiafia o i latou na auai, sa taumafai le faia'oga e fa'ailoa mai e le tagata mai le tasi se'ia o'o i le 10 lana lisi o mea e fia mana'o ai e faia i lenei tausaga fou.

"O se tasi o nei alii talavou sa ia fa'ailoa mai, "Ou te fia alu e tafao i le lalolagi atoa, e amata atu i Fiti, agai Saina ae o'o fo'i i Iapani."

Na fa'ailoa mai e Meredith, "O le lisi na taua'aoina e Lupelele, se tasi o tina matua, e atagia ai le mama ma le sa'o lelei ona fa'asolo, e foliga mai sa failautusi lenei tina i sana galuega a'o talavou. O i latou na sa latou fa'ailoa maia, le agaga fiafia ma le aiga i le mafutaga."

I le a'oa'oga sa faia, ua toe manatu mamafa ai lenei tama'ita'i faigaluega e toe fa'aa'e le galuega sa faia muamua, aua o lea ua iloga mai, e i ai le naunauta'iga ia i latou nei, ina ia fa'aauau lea ala e fa'aailoa mai ai latou mana'oga fa'apitoa o natia.

I le to'alua o sui sa iloga ona galulue fa'atasi ma Meredith i nai tausaga ua te'a, e to'atasi ua maliu, Tony Hema, ae to'atasi ua malaga i fafo ina ua mae'a maua lona fa'ailoga AA in Arts, ua fa'aipoipo ma ua maua fo'i le la'ua alo e to'atasi. O lo'o soifua lava ma fa'aauau lana tusi ata ae u i lona gutu le pulumu vali ata. O le susuga lea a Rudy Steffany.

Ina ia mafai ona tu'u ma toe maua lea avanoa, o le a mana'omia lava ona toe feso'ota'i i matou uma e mafai ona avea ma faia'oga ma sui fo'i e fesaosoani i lesona ma le pulega a le Kolisi Tu'ufa'atasi, ae ua naunau fo'i i matou uma e aofia ai ma Sandy Scanlan ina ia faia lea tulaga.

E le gata ina faia fa'atasia lenei vasega ma fanau ua nonofo i tua i aiga ma tausia ai i latou ina ia mataituina latou mana'oga fa'apitoa, ae ua naunau i latou e fia iloa lea taleni o le tusi ma le vali ata.

E le o toe mamao ae tatou va'aia ni fua lelei o lenei galuega ua toe fa'aa'e, ma o le a toe faia fo'i le isi vasega vali ata ma tusitusi i le aso Faraile a sau nei.

Sa toe fa'asoa mai Meredith e tusa o le tomai o nei fanau ma e matutua fo'i sa auai, "Ua fa'atulaga fa'atasi le matou lisi o fesili e mafaufau loloto i ai le vasega ona tali mai lea, amata i le e te mana'o lava e faia i le taimi nei, se mea'ai e te fia tausami ai, se vaiinu e te fia inu ai, ae toe tu'u atu loa le fesili po'o le a le mea e soso'o ae fai mai le isi talavou, "Po'o le a le show e te fia maimoa ai?"