Pu’e faapagota ona o tuuaiga i le faaoolima ma le umia fualaau faasaina

Pago Pago - AMERIKA SAMOA

O se ali’i e 42 tausaga le matua lea na tu’uaia e le malo i lona fa’aoolima i ni ali’i se to’alua, ua molia nei e le malo i le solitulafono o lona umia faasolitulafono o vaega o fualaau fa’asaina.

O le masina na te’a nei na tula’i ai le susuga a Onofia Tiumalu i luma o le Fa’amasinoga Fa’aitumalo mo lana ulua’i iloiloga.

O moliaga ua faia fa’asaga ia te ia e aofia ai le moliaga mamafa o le umia fa’asolitulafono o vaega o le pauta faasaina o le aisa, faapea ai moliaga mama e 2 o le faaoolima i le tulaga tolu, ma le moliaga e tasi o le tu fua i le fanua poo le fale o le isi tagata e aunoa ma se fa’atanaga.

E $10,000 le vaega tupe lea ua fa’atulaga e le Fa’amasinoga e totogi, ona fa’atoa mafai lea ona tatala Tiumalu i tua mai le toese i Tafuna. Afai ae mafai ona tatala o ia i tua, ua fautuaina o ia ina ia aua nei taumafai e sola ese ma le atunu’u, a ia tuuina atu lona tusi folau e taofi e le loia a le malo. E le mafai fo’i ona ia taumafai e faafesoota’i molimau a le malo, e aofia ai ma i latou o loo aafia i lenei mataupu, a ia avea o ia ma se tasi e usita’i i tulafono uma a le malo.

Na teena e le Faamasinoga le talosaga a le loia fautua na tula’i mo Tiumalu, mo se avanoa e faaitiitia ai le tupe e tatala ai Tiumalu i tua i le $3,000.

Na taua e le Loia a le itu tete’e e fa’apea, o Tiumalu, o se tagata e to’a 3 lana fanau, e galue malosi fo’i mo le tausiga o lona aiga. A o le i tula’i mai lenei fa’alavelave, sa galue o ia o se ave pasi mo le silia i le 10 tausaga.

O Tiumalu fo’i e pei ona taua lana loia, e le o se tagata e ono sola ese ma le atunu’u, e nonofo ma lona aiga i Tafuna, e leai fo’i se faanaunauga o ia na te tuua le atunu’u ae aga’i atu i se isi atunu’u.

Na tete’e le malo i le talosaga a Tiumalu ma lana loia, ma latou talosagaina ai le Fa’amasinoga ina ia teena le talosaga.

Na taua e le Loia a le malo e fa’apea, o le tupe lea ua fa’atulaga e le Fa’amasinoga, ua talafeagai lelei ma le mamafa o le solitulafono o loo tu’uaia ai le ua molia.

E le gata sa ia fa’aoolima i ni tagata se to’alua, ae na toe maua ai fo’i e Leoleo fualaau fa’asaina ia te ia i le taimi na pu’e fa’apagota ai o ia. Na taua atili e le loia a le malo e fa’apea, e ono i ai le avanoa e sola ese ai Tiumalu ma le atunu’u pe afai ae tatala o ia, o le mafua’aga lena e tatau ai ona taofia pea o ia i le toese, ina ia mautinoa e i ai pea o ia i le atunu’u a o fa’agasolo ai lana mataupu.

I le mae’a ai ona iloilo e le Fa’amasinoga o faafinauga a itu e lua, na tuuina mai ai loa e le faamasinoga lana faaiuga e teena ai le talosaga a le itu tete’e. Saunoa le faamasinoga e fa’apea, 

O le vaiaso fou lea ua fa’atulaga e le Fa’amasinoga e faia ai le ulua’i iloiloga o lenei mataupu i le itula e 10:30 i le taeao.

Afai ae mafai ona tatala i tua le ua molia e faatali ai lona faamasinoga, ua poloaina e le Fa’amasinoga o ia ina ia tausisi i tulafono uma a le malo, auai i soo se taimi e valaau ai lana mataupu, ma ia fesootai vava lalata ma lana loia i soo se taimi. 

E le mafai ona ia toe taumafai e faafesoota’i molimau a le malo i soo se taimi, e aofia ai ma i laua o lo o a’afia i lenei mataupu. Afai e i ai se taimi e fetaui ai i molimau a le malo poo i laua o loo aafia i soo se nofoaga, o lona tiute, o le tula’i filemu ma alu ese mai ai.

TAGI A LE MALO

O lo o taua i le tagi a le malo e fa’apea, i le itula e 7:20 i le po o le aso 19 o Me, 2022, na faafesoota’i ai e se Tina le Ofisa o Leoleo i Tafuna mo se fesoasoani, ona o se ali’i na faaoolima i ni alii se to’alua i luma o se Faleoloa Asia i Iliili.

E to’atele Leoleo na aga’i atu e tali i le valaau, ma mafai ai loa ona latou fesiligia le Tina na ia talosagaina se fesoasoani e tusa ai o lenei fa’alavelave. I le mae’a ai ona fesiligia e Leoleo o lenei Tina, na manino ai, o ali’i na aafia, o se ali’i Samoa e galue i le faleoloa, faapea ai ma se isi ali’i e nofo latalata ane i le nofoaga na tula’i mai ai le fa’alavelave, o i laua uma ia o loo tu’uaia na faaoolima i ai le ua molia, le susuga a Tiumalu.

Na maua le avanoa e fesiligia ai e Leoleo molimau sa i ai i le taimi o le fa’alavelave, e aofia ai ma le Tina na ia logoina le Ofisa o Leoleo mo se fesoaosani.

Na taua e le Tina na ia faafesootaiina le Ofisa o Leoleo mo se fesoasoani e faapea, i le afiafi na tula’i mai ai le fa’alavelave, na aga’i atu ai le ua molia ma se isi ali’i e faatatau, ae o lo o talanoa ai ni ali’i se to’alua i fafo o le faleoloa i le vaega e paka ai ta’avale.

Na aga’i atu le ua molia ma fesili i se tasi o ali’i na aafia pe i ai se la afi penisini se’i faaola ai lana sikaleti peita’i na tali ane i ai le isi o le to’alua na aafia, e leai se la afi penisini, e leai fo’i se isi o i laua e ulaula tapa’a.

Na aga’i alii to’alua na aafia i totonu o le faleoloa ma fai le la faatau ae talanoa ai lava i fafo le alii ua molia ma isi ali’i e to’alua na latou o atu i le Faleoloa. Na faatoa manino i le taimi lea, o loo inu ni fagupia a le ua molia ma ali’i e to’alua sa latou talanoa i tua o se taavale pikiapu o loo paka ai i autafa o le Faleoloa.

E le i umi se taimi o le afiafi lea ae tula’i mai loa se vevesi i le va o Tiumalu ma se tasi o ali’i sa latou inu, ma vaaia ai le faaoolima o Tiumalu i le ali’i na la tau upu e ala i lona tu’iina o ona foliga ma palasi ai lea ali’i i lalo. O le taimi lea na aga’i atu ai loa le isi alii na aafia ma fautua ia Tiumalu ma ana uo e to’alua ina ia tuua le nofoaga ae aga’i ese atu i isi nofoaga e fa’aauau ai le latou inugapia.

Na ita Tiumalu i le fautuaga na avatu e le alii na aafia ma ia valaau leotele atu ai loa i le alii na aafia, e leai sana feau na te faatonuina ai fua o ia e alu ese ma luma o le Faleoloa. Na vave ona toe savali i totonu o le Faleoloa le alii na aafia ina ua ia iloa ua ita Tiumalu.

O le ita tele o Tiumalu i le alii na aafia ma lana faatonuga na fai atu ia te ia, na aga’i atu ai loa i totonu o le Faleoloa, ma ia iloa ai le alii na aafia o loo savali i le pito i tua o le Faleoloa e fai lana fa’atau. 

E le’i toe faatali Tiumalu e pei ona taua i le tagi a le malo, ae na savali atu loa ma tu’i le alii na aafia ma palasi ai i lalo. Na ona mae’a lava ona faatino e Tiumalu o le solitulafono, savali loa i fafo ma le faleoloa, oso i lana taavale ma alu ese loa, ae tuu ai ana uo e to’alua sa latou inu.

Na maua le avanoa e fesiligia ai e Leoleo ali’i e to’alua na aafia i lenei mataupu, le uo a Tiumalu faapea ai ma alii e to’alua na aafia i lenei mataupu.

Na taua e le uo a Tiumalu e fa’apea, ao faia le latou inugapia, sa faaoolima Tiumalu i se alii sa faalavelave atu i le latou tafaoga. E lei umi ae savali atu le isi alii Samoa ma fautua atu ia Tiumalu e alu ese loa lana ta’avale ma luma o le faleoloa ona ua fai lava si leotele o le laau o lana ta’avale, ae na avea ma itu na ita ai Tiumalu ma faaoolima fo’i i le ali’i lea sa fautua atu ia te ia.

Ae ina ua fesiligia e Leoleo alii se to’alua na aafia i lenei mataupu, sa la ioeina ai le faaoolima o le ua molia ia te i laua. Na taua e le alii lea na muamua faaoolima i ai Tiumalu e faapea, o ia sa faalavelave i le afi o se pikiapu sa paka i luma o le Faleoloa, ae na te’i ina ua valaau atu le ua molia e aua le faalagolago i le afi o le ta’avale. E le’i umi ae savali atu loa le ua molia ma tu’i o ia.

Ae na taua e le alii lona lua na faaoolima i ai Tiumalu e faapea, o ia fautuaina le ua molia e alu ese loa ma luma o le Faleoloa, ona ua leotele naua le leo o lana laau, peita’i na ita ai le ua molia ma faaoolima ia te ia e ala i lona tu’i o lona auvae ma palasi ai i lalo ma manu’a lona ulu i le pito o le fasitepu o le Faleoloa.

Pe tusa o le itula talu ona saili e Leoleo le ta’avale a le ua molia, ae latou maua loa o loo paka i luma o se fale’aiga i Tafuna.

A o lei auina atu e Leoleo ia Tiumalu i le Ofisa o Leoleo i Tafuna mo suesuega, na sailia muamua e Leoleo lona tino, ina ia mautinoa na te le o tauaveina ni a’upega poo ni fualaau fa’asaina.

I lea sailiga, na maua ai e Leoleo ni taga pepa iila se 2 i totonu o le taga o le ofu a le ua molia, o lo o i ai ni vaega o le pauta faasaina o le aisa. Na taua e Tiumalu i Leoleo, o pepa iila ia e lua na ia maua i autafa o le faleoloa Asia lea sa nofonofo ai ma ana uo i Iliili.

E pei ona taua i faamaumauga a le Fa’amasinoga, e le fou le susuga a Tiumalu i luma o le Fa’amasinoga. O le tausaga e 2013 na ta’usala ai o ia i le moliaga o le ave taavale ‘ona ma le faaoolima, ma nofovaavaaia ai o ia mo le 12 masina. 

Tolu tausaga mulimuli ae ai i le 2016, na toe aafia ai fo’i o ia i le tulafono ma nofovaavaaia ai mo le 24 masina ina ua ta’usala o ia i le solitulafono o le faatupu vevesi nofoaga faitele, faaoolima i le tulaga tolu, atoa ai ma le faaleaga meatotino.