Pu’e faapagota I le faia o uiga mataga i se tamaitai 16 tausaga, ae maua ai fualaau faasaina

Pago Pago, AMERIKA SAMOA

O se ali’i mai Ottoville na pu’e faapagota e Leoleo i le masina na te’a nei ona o tu’uaiga i lona faia o uiga mataga faafeusuaiga i se tamaitai e 16 tausaga le matua, e le gata ua molia i le faia o uiga mataga faasaga i fanau tamaitai e laiti i lalo o le tulafono, ae ua molia foi o ia i lona umia faasolitulafono o fualaau faasaina.

O le tagi a le malo faasaga i le susuga a Vineula Time, na tofu atu i le Ofisa o Leoleo i Tafuna i le amataga o le masina na tea nei, ina ua aga’i atu se ulugali’i ma se la tama teine e faila sa latou tagi faasaga ia Time, e mafua mai i le la mafutaga faaulugali’i sa faia ma le tamaitai talavou mo le umi e 4 masina.

Na maua le avanoa e fesiligia ma suesue ai e Leoleo Suesue le ulugali’i ma le la alo tamaitai e tusa ai o lenei mataupu.

Na taua e le Tama i Leoleo Suesue e faapea, na faatoa manino i lona mafaufau le faafitauli o loo tula’i mai i lona afafine ina ua ia maua e le o i ai lona afafine i le latou fale i le 1:30 I le vaveao o le aso 14 o Me.

Sa ia faafesootaiina loa lona to’alua o loo faigaluega i le taimi lea, ae na tali le Tina o le aiga, na te le iloa se faamatalaga e faatatau i le la tama teine, e lei talanoa atu fo’i lana tama teine ia te ia e faatatau i se mea e fia alu i ai i le po lea.

Na saili e le Tama tulimanu o le fale i lona fia maua o se faailoilo e iloa ai poo fea o i ai lona afafine. I totonu o le potu o le tamaitai na aafia sa maua ai e lona Tama lana telefoni, o loo i totonu la talanoaga ma le tagata e suafa ia “True-Vine”. Na iloa mulimuli ane, o “True-Vine”, o le isi igoa o Vineula Time, le ali’i ua molia e le malo i lenei mataupu.

Na umi se taimi na auiliili ai e le Tama talanoaga a lona afafine ma Time i totonu o le telefoni ma manino ai loa i le mafaufau o le Tama le mea o loo tupu i le va o lona afafine ma le ali’i ua molia. 

O se taimi o le vaveao na vaaia ai loa e le Tama lona afafine ua aga’i atu i le latou fale, ma maua ai loa le avanoa o le Tama e fesiligia ma faatalatalanoa ai lona afafine po o fea sa alu i ai. Na pepelo le tamaitai na aafia i le ulua’i taimi na fesiligia ai e lona Tama, peita’i ao faagasolo pea le la talanoaga, na faailoa ai loa e le tamaitai na aafia, o ia na alu i le fale o lana uo tama o Time e eva ai.

Na manava mai le Tina o le aiga ma faailoa i ai e le Tama le mea ua tupu, ma filifili ai loa le ulugali’i e aga’i atu i le Ofisa o Leoleo e faila le la tagi faasaga i le alii ua molia ona o gaioiga faasolitulafono ua faia faasaga i le la tama teine e laitiiti i lalo o le tulafono.

Na maua le avanoa e fesiligia ai e Leoleo Suesue le tamaitai na aafia e tusa ai o le mea sa tupu, ae poo fea foi na alu i ai i le po o le aso na tula’i mai ai le faafitauli seia oo mai i le vaveao ina ua toe fo’i i le latou fale.

Na taua e le tamaitai na aafia i Leoleo Suesue, o le la mafutaga ma lana uo tama na amata mai i se taimi o le masina o Ianuari i le mae’a ai lea ona la fetaui i se taaloga soka sa faia i le malae soka i se tasi o afiafi. Na amata ona la faamasani ma lana uo ina ua alu atu le ali’i ia te ia ma faailoa atu lona igoa, ma lona mana’o e fia uo ia te ia, peita’i sa ia faailoa i ai e na o le 16 ona tausaga, o ia foi o loo aoga e lei faauu. Ae na mana’o lava le ali’i lea e faavae se la faiga uo.

O afiafi uma lava e masani ai ona la talanoa ma talie i le malae soka ma amata ai lava ona mafana le la mafutaga. Na uma talanoaga i le malae soka ae faasolo i luga o le telefoni ma le Facebook, ma ua amata fo’i ona lagona lona fiafia e mafuta i lana uo.

Na manatua e le tamaitai na aafia se tasi o aso na la tietie pasi ai ma lana uo, ma latou fetaui ai ma nisi o tamaitai o le latou autalavou, lea sa ia faailoa i ai o lana uo o Time e lelei lana taalo soka.

O le tuana’i ai o vaiaso e 2 talu ona amata le faigauo a le ua molia ma le tamaitai na aafia, na mana’o ai loa Time e alu atu le tamaitai lenei i lona fale, i se taimi o le po la te tafafao ai, peita’i na musu le tamaitai ma fai i ai, e le mafai ona tupu lea tulaga ina ne’i maua o ia e ona matua.

Ae o le faatauanau umi e le ua molia o le tamaitai na aafia, na malie ai loa le tamaitai e alu atu i le fale o lana uo i se po. O le faaiuga o le masina o Fepuari o le tausaga nei na sola ese mai ai le tamaitai mai le latou fale ae aga’i atu i le fale o Time ma la tafafao ai mo le silia i le 2 itula. O le po lava fo’i lea na feusua’i ai le ua molia ma le tamaitai na aafia, e pei ona taua e le malo i le latou tagi.

Sa lei toe misi le sola ese mai o le tamaitai na aafia mai le latou fale ae alu i le fale o lana uo tama ma la tafafao ai, seia oo loa i le vaveao o le aso lea na maua ai o ia e lona Tama e le o i ai i le fale, ma mafua ai loa ona tofu atu lenei mataupu i le Ofisa o Leoleo.

E leai se vaega o le mafutaga a i laua nei e to’alua na natia e le tamaitai na aafia, ae na ia faailoa uma i Leoleo Suesue. Na taua atili e le tamaitai na aafia i Leoleo Suesue e faapea, e tusa ma le 4 masina na faia ai le la mafutaga faaleuo ma lana uo tama, ae alia’e mai loa le mataupu e pei ona pu’e faapagota ai o ia e Leoleo.

Na maua le avanoa e fesiligia ai e Leoleo Suesue le Tina o le tamaitai na aafia, ma ia faamaonia ai tulaga uma e pei ona taua e le Tama o le aiga. Na taua e le Tina o le tamaitai na aafia i Leoleo Suesue e faapea, o nisi taimi na te vaaia ai lana tama teine o loo talanoa i luga o le telefoni mo le umi e ta’i tasi le itula pe sili atu foi, ma oso ai lona loto masalosalo poo i ai se tagata o loo fai ma fesootai i ai lana tama. 

O nisi o tulaga na taua e le Tina sa ia maitauina i lana tama, o mea fou e alu atu ma ia i lo latou fale e pei o seevae fou, o ona ofu fou faapea ai le telefoni ma isi mea e faatatau i teuga a tamaitai. Sa ia fesiligia lana tama i le isi aso poo fea e aumai ai tupe o loo faatau mai ai nei mau mea e tele, ae tali lana tama, o meaalofa e avatu i ana uo.

E 2 vaiaso o taumafai Leoleo Suesue ia Time peita’i na fiu e saili ua solasola solo o ia. Ae i le masina na te’a nei, na pu’e faapagota mai ai loa e Loeleo le ua molia ina ua maua atu o ia i le fale o lona uso matua. A o le i auina atu le ua molia i le Ofisa o Leoleo mo suesuega, na saili muamua e Leoleo lona tino, ma maua ai I tua o lona ofuvae ia se pepa iila o loo i ai vaega o le laau faasaina o le mariuana. 

Sa teena e le ua molia tu’uaiga e faapea sa ia faamalosia le tamaitai i uiga mataga faafeusuaiga. Sa ia ta’utino i Leoleo, sa malie atoatoa le tamaitai i le la mafutaga. Sa ia iloa fo’i, o le tamaitai e na o le 16 tausaga le matua.

Ina ua fesiligia i fualaau faasaina, na tali le ua molia, o fualaau faasaina na faatau mai i le isi tamaloa mai Vaitogi e fa’aaoga mo ia lava.

Ole masina na te’a na tula’i ai Time i luma o le Faamasinoga mo lana ulua’i iloiloga. 

O loo molia o ia i le moliaga e tasi o le umia faasolitulafono o vaega o le laau faasaina o le mariuana, faapea ai ma moliaga e aofia ai le faia o uiga mataga i se tamaitai e talavou i lalo o le tulafono, faapea ai le faiaiga faamalosi ma se tamaitai, atoa ai ma le tagofia o itutinosa o se tamaitai e talavou i lalo o le tulafono, o vaega uma ia o solitulafono mamafa.

E $25,000 le vaega tupe lea ua faatulaga e tatala ai i tua le ua molia, e faatali ai le isi ana iloiloga ua faatulaga mo le vaiaso fou.