Pu’e faapagota e Leoleo le alii masalomia i le talepe fale ma le gaoi

O le vaiaso na te’a nei na pu’e faapagota ai e Leoleo le alii sa masalomia i lona osofaia lea o maota o aiga i le afioaga i Leone i le masina o Fepuari na te’a nei.

O le vaiaso lava fo’i na te’a nei na tula’i ai le susuga a Jason Faafetai Uili i luma o le Faamasinoga Faaitumalo, ma faatulaga ai loa e le afioga i le alii Faamasino ia Elvis P. Patea le tupe e $30,000 e totogi ona faatoa mafai lea ona tatala le ua molia i tua.

Ua molia nei e le malo ia Uili i moliaga e 3 o le talepe fale i le tulaga lua; 3 moliaga o le gaoi, faapea ai ma le moliaga e tasi o le tete’e atu i Leoleo a o taumafai e pu’e faapagota o ia; o le vaega C lea o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu i le $5,000, pe faasala foi i faasalaga uma ia e lua.

E le i faataunuua le ulua’i iloiloga a Uili lea na faatulaga e faia i le aso Faraile na te’a nei i luma o le afioga i le alii Faamasino ia Patea, ae ua tofu atu nei le mataupu a Uili i luma o le Fa’amasinoga Maualuga lea ua fa’atulaga i le taeao nei, Mati 9.

TAGI A LE MALO

O lenei mataupu na tofu atu i le Ofisa o Leoleo i Tafuna, ina ua talosaga le ulugalii na aafia le fale mo se fesoasoani, e mafua mai i se tagata na ulufale faamalosi i totonu o le la fale ma ave faagaoi meatotino sa i ai, e aofia ai ma le ato tupe o lo o i ai se tinoitupe faapea ai ma le tele o mea aoga.

Ina ua fesiligia e Leoleo le ulugalii, na faamatala ai e le Tina, lona vaaia o Uili i totonu o le la fale po o le aso 10 o Fepuari, 2020. Na mafua ona ia iloa o Uili lea sa i totonu o le fale, ona e masani lelei ai, o Uili fo’i, o le nephew a lona to’alua.

Na taua e le Tina i Leoleo e fa’apea, a o la momoe ma lona to’alua i totonu o le potu, na faafuase’i ona ia vaaia se tagata o tu i luma o le Pusa Tu, o lo o ia tatala le pusa toso. Na valaau le Tina i le igoa tauvalaau a Uili, o Tai, ma fai i ai poo a ana mea o lo o fai i totonu o le fale, peita’i sa le ano i ai le tagata ae o loo tu pea lava i luma o le Pusa Tu ma tago lona lima i totonu o le pusa toso ma aumai i fafo le ato tupe o loo i ai.

“Tai, Tai, alu i fafo ma le fale,” o le tau valaau ane lea a le Tina i le alii ua molia, na mafua ai loa ona savali ese le ua molia mai totonu o le potu ma telea’i atu loa lana savali i le faitoto’a pito i luma ma alu loa i le atoa.

Na tuliloa e le ulugalii e ana le fale ia Uili peita’i e le i mafai ona maua, ona e fai lava si saoasaoa o lana tamao’e.

Na taua e le Tama i Leoleo, a o taoto i lona moega, sa ia lagona lona toalua o loo valaau i le igoa o Tai e alu ese ma le fale. Sa ia taumafai e nofo i luga ona o le tiga o lona papatua. Ina ua nofo i luga, sa ia vaaia ai le ua molia o loo savali mai i totonu o le potu ma aga’i atu i le potu malolo ma ulufafo atu ai loa i le faitoto’a.

Na la taumafai ma lona to’alua e tuliloa peitai la te lei maua, ona e saosaoa tele le tamo’e a le alii ua molia.

O le mae’a ai ona fesiligia e Leoleo o le ulugalii na aafia, na aga’i atu ai loa mo le tau sailia mai o le ua molia. I le aoauli o le aso 14 o Fepuari, na vaaia ai e Leoleo se tagata o loo ti’eti’e mai i se pasika, ae le o faia sona pulou e puipuia ai lona saogalemu.

Na taumafai Leoleo e taofi le pasika peita’i na atili ai ona alu i le atoa le pasika ma ui atu ai i le isi auala i totonu o Faleniu. Ina ua latalata atu le ta’avale a Leoleo i le pasika, na iloa ai e Leoleo, o le tagata tonu lava lea e igoa ia Uili lea o lo o latou tau sailia nei ona o le faalavelave na osofaia ai le fale o le ulugalii i Leone.

Na fai tuliga a Leoleo ma le pasika seia oo ina tia’i e le ua molia le pasika ae alu i le atoa agai i auala ‘alo o lo o i totonu o Faleniu, peita’i e le i faavaivai ai Leoleo, ae sa latou tuliloaina pea o ia.

Ao taumafai Leoleo e loka lima o Uili, ina ua maua, sa tafiti solo o ia ma tete’e i Leoleo. Sa ia una’i le isi Leoleo aga’i i le pa ma’a, ae o le isi Leoleo sa ia una’i aga’i i le faitoto’a o le ta’avale Leoleo. Ui o lea, na i’u lava ina mafai ona loka e Leoleo lima o le ua molia ma auina atu ai loa o ia i le Ofisa o Leoleo i Tafuna mo le fesiligia e faatatau i lenei mataupu.

A o faagasolo le faatalatalanoaga a Leoleo ma Uili, na maua ai e Leoleo, o ia lava fo’i o lo o tuuaia i isi osofaiga na aafia ai isi fale i Leone, e aofia ai ma le Aoga a St. Theresa.

Ina ua fesiligia Uili e faatatau i le fale o le ulualii lea na ia osofaia, sa ia ioe ma ta’utino i Leoleo, e faamaonia tuuaiga faasaga ia te ia, i lona ulufale lea i totonu o le fale a lona uncle ma lona aunty i Leone ma gaoi mai ai le ato tupe sa i totonu o le pusa toso o le Pusa Tu. I totonu o le ato tupe sa i ai le tele o cards faapea ai ma le tinoitupe e $28.

Na faamatala e Uili i Leoleo e faapea, na ia iloa lelei, e le mafai ona oso atu se tagata gaoi i le faitoto’a pito i luma o le fale a lona uncle ma lona to’alua, ona o lo o nonoa ai le manoa fai ma mailei, ina ia faigofie ai ona iloa e lona uncle ma lona to’alua le tagata gaoi e ulufale atu i totonu, ae sa ia ui mai i le faamalama pito i tua ma maua ai loa lona avanoa e ulufale ai i totonu o le fale.

Sa ia faailoa i Leoleo, e to’alua i laua na auai i lea osofaiga, o ia ma lana uo lea sa faatali atu i le auala e vaai ni tagata e o atu. Ina ua la maua le ato tupe ma cards o lo o i ai, sa la o loa ma piki mai le isi a laua uo, ma latou aga’i atu ai loa i faleoloa eseese ma faaaoga le isi card e fai ai fa’atau e tusa ma le $500 lona aofa’i. Na taofi le faiga o a latou faatau ina ua le mafai ona latou toe faaaogaina le card.

Na ta’utino atili le ua molia e fa’apea, o le faalua ai loa ona ia osofaia o le fale a lona uncle ma lona to’alua. O lana osofaiga muamua sa faia i le masina o Ianuari 2020, lea na ia ulufale faamalosi ai i totonu o le fale ma gaoi le pusa sa i ai filifili auro, atoa ai ma isi mea aoga sa i totonu o le fale, ma ia faatau atu mea uma ia i le isi ulugalii i le tau e $100.

O le isi osofaiga na ioe i ai Uili i Leoleo, o le faleaoga a St. Theresa i Leone, lea na gaoia mai ai uaea o le copper ae faatau atu i se alii faipisinisi Asia i le tau e $40. I suesuega a Leoleo na maua ai, e tusa ma le 47 futu le umi o le uaea o le copper na gaoia e le ua molia ma lana uo. Ae na taua e se sui o le ASPA i Leoleo, e $3.00 i le futu o lo o faatau ai le uaea o le copper, lona uiga, e tusa ma le $141 le tau aofa’i o le uaea o le copper lea na ave faagaoi e le ua molia ma lana uo.