Pu’e faapagota e Leoleo i le faatupu vevesi i lona aiga ae maua ai aisa

Pago Pago, AMERIKA SAMOA

O le ali’i lea na pu’e faapagota e Leoleo ina ua faatupu vevesi i totonu o lona aiga e aofia ai lona faaoolima i le to’alua a lona tuafafine, ua molia nei o ia i lona le usitaia o tulafono tau i Fualaau Faasaina a le malo, ina ua maua e Leoleo ni pepa iila se 2 o lo i ai vaega o le pauta faasaina o le aisa i totonu o le taga o lona ofu sa fai.

E to’atele Leoleo na tali atu i le valaau ina ua mana’omia se fesoasoani i se vevesi na tula’i mai i se fale o se aiga i Ottoville i le masina na te’a nei, ma latou pu’e faapagota ai loa le ali’i na masalomia lona faatupu o le vevesi.

Na taua e le ali’i ua molia ia Papaofo Tivoli i Leoleo e fa’apea, na mafua ona ia faaoo manu’a tuga i le ali’i na a’afia, ina ua fa’aoolima i lona tuafafine i totonu o le fale, e ala i lona titina o le ua o lona tuafafine ma ta tu’i ona foliga ao matamata i ai le la fanau. 

O ia tu’uaiga uma na teena e le ali’i na a’afia. Na taua e le ali’i na aafia i Leoleo, e le o se taimi muamua lenei ua tau faapalopalo ai e le ua molia o ia i le latou mafutaga.

O le afiafi o le aso 7 o Aperila na te’a nei na maua ai e le Ofisa o Leoleo se telefoni mai se tama’ita’i, e uiga i lona tuagane na faaoolima i lona to’alua e ala i lona fa’aaoga o se a’upega ma’ai e tui ai lona itu ma lona tau’au.

Na taunu’u Leoleo ma amata loa le latou suesuega e uiga i lenei faalavelave, ae aofia ai ma le auina atu o le ali’i na manu’a i le Falema’i i Faga’alu mo togafitiga. Na maua fo’i le avanoa o Leoleo latou te fesiligia ai molimau e tusa ai o le fa’alavelave sa tula’i mai. O ia molimau e aofia ai le ali’i na aafia, o lona to’alua, faapea ai ma ni tamaitai se to’alua mai le aiga e tuaoi ma le fale na tula’i mai ai le fa’alavelave.

E tusa ai ma faamatalaga a moilmau na tuuina atu i Leoleo, e ese le nu’u e nofo ai le ali’i ua molia nei i lenei fa’alavelave. E le nonofo faatasi ma lona tuafafine faapea ai ma lona to’alua na aafia i Ottoville. Ae o le aso na tula’i mai ai le fa’alavelave, na alu atu ai le ua molia i le fale a lona tuafafine, ae fetaui ma le tula’i mai o se vevesi i le va o lona tuafafine ma lona to’alua.

Na aga’i atu Leoleo i le fale a le ua molia peita’i latou te le i maua atu i ai o ia. Na faailoa ane e se tasi o lona aiga, faatoa o ese atu lava uo a le ua molia na o atu e piki o ia, ma ua ag’ai atu nei sa latou ti’eti’ega i le taulaga.

Na talosagaina e Leoleo le alii o loo nofo ai Tivoli ina ia faatonu le ua molia e aga’i atu i le Ofisa o Leoleo i Tafuna, e i ai si mataupu taua e fia fesiligia ai o ia e tusa ai o le fa’alavelave na tula’i mai i Ottoville, lea o loo masalomia na aofia ai o ia.

Na taua e le tuafafine a le ua molia i Leoleo e fa’apea, sa la i ai ma le ua aafia i totonu o le potu o le fale i Ottoville i le aso na tula’i mai ai le fa’alavelave, sa la talanoa ma fefutaa’i seia oo ina tulai mai se feeseeseaiga i lo la va ma faaoolima ai loa lona to’alua ia te ia.

A o la vevesi ma lona to’alua na faateia o ia ina ua matala atu le faitoto’a o le latou fale ma ia vaaia ai lona tuagane o savali atu ma se mea ma’ai i lona lima ma faafuase’i ona ia osofaia ai lona to’alua e ala i lona tui o lona tau’au.

Na ia tula’i i luga ma tamo’e i fafo e tau saili se fesoasoani ina ua ia vaaia lona to’alua ua manu’a, peita’i na faateia o ia ina ua ia vaaia lona to’alua ua tamo’e atu i ona tua o loo mau’a ma uu atu lona itu ma valaau atu ia te ia e vili Leoleo ma le EMS o ia ua manu’a.

Na taua e le tamaitai i Leoleo e faapea, na te lei iloaina le taimi na alu atu ai Tivoli i le latou fale. Na faatoa ia iloa lava o loo i ai lona tuagane i le fale ina ua ia tatala le faitoto’a o le fale ae savali atu i totonu i le taimi o loo tula’i mai ai le vevesi i le va o le la ulugali’i ma lona to’alua.

Na fesiligia e Leoleo le alii na aafia i lenei mataupu, ma ia taua ai e fa’apea, ua silia i le 7 tausaga o le la ulugali’i, peita’i o le tele o taimi e taumafai ai lava le ua molia e aia i le la ulugali’i.

O le aso na tula’i mai ai le faalavelave, sa latou i ai i le fale ma lona to’alua ma lana fanau, faatoa manava atu galuega o le aso. E taunuu atu e le o i ai le ua moliai le fale, ona la o lea ma lona to’alua ua la talatalanoa i totonu o le fake. Atonu na taunuu le ua molia i le latou fale ma ia maua se fa’amatalaga, o ia o loo i totonu o le fale, o le mafua’aga lea na talu atu ai ma kiki le faitoto’a o le fale ma matala ai, ma oso atu loa ua tu’i o ia.

Na umi se taimi o la tau ivi ma le ua molia, ae na faateia o ia ina ua tui e le ua molia o ia i se tamai naifi ma aafia ai lona itu faapea ai ma lona tau’au. Sa ia taumafai e se’i ese le naifi mai le lima a le ua molia peita’i sa tu i luga o ia ma tamo’e i fafo, ae o le taimi fo’i lea na ia tamo’e ai i fafo ma valaau i lana uo tamaitai e vili se ta’avale e ave ai o ia i le falema’i ona ua manu’a.

O le 5 o aso talu ona tuana’i le faalavelave na faatoa pu’e faapagota ai loa e Leoleo le ua molia ma auina atu loa i le Ofisa i Tafuna mo suesuega. Ina ua fesiligia o ia e uiga i leneim ataupu, sa teena ai e le ua molia tu’uaiga fai mai na ia tuia le na aafia i le tama’i naifi. O lana fa’amatalaga i Leoleo, na ia una’i le alii na aafia ma palasi ai i luga o se fasii tioata ta’e sa ta’atia i le isi itu o le laulau ‘ai.

Na ia taua atili e faapea, na mafua ona ia faia lea tulaga, ona sa ia vaaia le ua molia o faaoolima i lona tuafafine (to’alua a le na aafia). Sa faaauau pea ona teena e le ua molia tu’uaiga sa ia faaaoga se mea ma’ai e faaoo ai manu’a i le ali’i na aafia, peita’i o le faatele ai ona fesiligia o ia, na suia ai loa lana tali ma ia ta’utino i Leoleo, sa ia fa’aaoga se tamaiti naifi e faaoo ai manu’a i le ali’i na aafia, i lona faia sooa o sau’aga faasaga i lona tuafafine.

A o le i auina atu le ua molia i le Ofisa o Leoleo mo suesuega, na saili e Leoleo lona tino na maua ai pepa iila e 2 o loo i ai vaega o le pauta faasaina o le aisa.

O le masina na te’a nei na tula’i ai le ua molia i luma o le Fa’amasinoga Faaitumalo mo lana ulua’i tula’i. 

Ua molia e le malo le susuga a Tivoli i le moliaga o le umia faasolitulafono o vaega o le pauta faasaina o le aisa; faapea ai le moliaga e tasi o le faaoolima i le tulaga lua, o le vaega D lea o solitulafono mamafa, lea e mafai ona fa’asala ai se tasi i le Toese mo le umi e oo atu i le 5 tausaga, pe fa’asala i le salatupe e oo atu i le $5,000, poo le fa’asala fo’i i fa’asalaga uma ia e lua; atoa ai ma le moliaga e tasi o le faaoolima i le tulaga tolu, o le vaega A lea o solitulafono mamafa, lea e mafai ona fa’asala ai se tasi i le toeses mo le umi e oo atu i le tasi le tausaga, pe faasala foi i le salatupe e le silia i le $1,000, poo le fa’asala fo’i i fa’asalaga uma ia e lua.

E $10,000 lea ua fa’atulaga e le Fa’amasinoga e tatala ai i tua le ua molia. O le vaiaso fou lea ua faatulaga e toe faatulaga ai lenei iloiloga.

Afai ae tatala le ua molia i tua, e le mafai ona ia toe taumafai i soo se sauala e faafesotai le  ua molia i soo se auala, poo lona taumafai foi e fesiligia ma faatalanoa molimau a le malo e aofia ai ma lona tuafafine, a ia avea o ia ma tagatanu’u lelei e taunu’u i tulafono a le malo i taimi uma.

Ua poloaina fo’i e le Fa’amasinoga le ua molia e le mafai ona ia toe umia ni aupega mata’utia e pei o fana ma naifi, e le mafai fo’i ona ia tuua le atunu’u sei vagana o se poloaiga mai le Fa’amasinoga.