POU TIUTE A LEOLEO

Pago Pago - AMERIKA SAMOA

GAOIA LE FALEOLOA A TUTUILA I FAGATOGO

O lo’o ta’ua i totonu o fa’amaumauga a le faamasinoga, ia le o’o atu o se vala’au i le Ofisa a Leoleo i Fagatogo, i le taeao o le aso 16 o Tesema 2024, e tusa ai ma le gaoia o le faleoloa a Tutuila i Fagatogo.

Ina ua taunu’u leoleo i le nofoaga na tupu ai le fa’alavelave sa fa’asino iai e l epule o le faleoloa ia se vaega o le faleoloa, o iai se pu ma e foliga mai na se’i e le gaoi ia le palaka o le masini pu’e ata a le faleoloa, ma o le pu foi lea na ulufale mai ai le gaoi i totonu o le faleoloa.

I se faatalanoaga a leoleo ma se tamaitai faigaluega a le faleoloa (o ia foi lea na valaauina leoleo), sa ia usu atu i lena taeao ma amata ona su’esu’e itu uma o le faleoloa ma ia va’aia ai le pu lea i le tulimanu tauagavale a le faleoloa, faapea ai ma le se’iina o le palaka o le masini pu’e ata.

Na faapea loa ona tatalaina e le tamaitai faigaluega ia le masini o teuina ai tupe o le faleoloa ma iloa ai le gaoia o ni tupe siliva pe a ma le $200, faapea ma se koneteine o iai pepa telefoni a le Bluesky, e pe a ma le $229 le tau. 

Ina ua mae’a ona fa’atalanoaina e leoleo ia le tamaitai faigaluega o le faleoloa, na amata loa le latou galuega i le su’esu’eina o autafa o le faleoloa, ma faatalitali le to’alua a le pule o le faleoloa, na agai atu ma ata vitio o le faleoloa.

O iina na va’aia ai le ua molia, le susuga ia Jeffrey Luteru, o ona gaoia oloa mai i le faleoloa, na aofia ai se pea tautaliga ma tupe sa i totonu o le masini teu tupe a le faleoloa.  Na matua’i manino lava i luga o le ata vitio ia foliga o le ua molia, ae na fa’ato’a mafai ona silafia e leoleo ia le suafa o le ua molia, i se taimi mulimuli ane, mai i se tasi o le aufaigaluega a le faleoloa.

O Luteru o se tagata ua tele sona tala’aga i nei ituaiga solitulafono ma sa masani ona nofonofo i le Pavilion i Fagatogo.  Ma o iina na agai atu ai leoleo, ma maua ai le ua molia, ma ave faapagotaina ai loa o ia.

Ina ua su’esu’eina le ua molia, sa maua ai i ona taliga ia le pea tautaliga na gaoia ma se vaegatupe e $42.

Ua molia nei lenei alii e 21 tausaga i moliaga o le Faomea i lona tulaga e lua faapea le Gaoi, i lona tulaga e lua.  O nei moliaga, o ni vaega ‘C’ o solitulafono mamafa, ma e ono nofosala ai i le falepuipui i le le silia ma le ta’i 7 tausaga i le moliaga e tasi, po o se sala tupe e le silia ma le ta’i $5,000 i le moliaga; po o fa’asalaga uma e lua.

E le gata i lea, ua molia foi Luteru i le Faaleagaina o mea totino, i lona tulaga e tolu; o se vaega ‘B’ o solitulafono mama, e mafai ona nofosala ai i le ono masina, i le falepuipui, po o se sala tupe e $500; po o faasalaga uma e lua.

E $5,000 se vaegatupe na fa’atulagaina e mafai ona tatalaina ai le ua molia, e fa’atalitali ai lona faamasinoga.

OSOFA’I E SE ALII 21 TAUSAGA IA SE TAMALOA I SE FAGU PIA

O le aso 15 o Tesema, 2024 na o’o atu ai se valaau i le Ofisa Leoleo i Tafuna mai i se tina, e ripotia ai le osofaia e le susuga ia Amani Sinoti, ia lona to’alua, i se fagu pia ua ta’e lea na manu’a ai foliga o le na a’afia ma lona a’ao taumatau.

E tusa ai ma fa’amaumauga a le faamasinoga, ina ua taunu’u leoleo i le fale o le tina na valaau i le ofisa a leoleo, sa ia faamatalaina i leoleo ia lo la agai atu i le latou fale, ae o latou fetaui ai ma ni alii se to’atolu, lea na aofia ai ma Sinoti.

Sa ta’ua e le tina le togiina e Sinoti o se fagu pia i luga o le auala, e agai atu i lo latou fale ma na savali atu iai lona toalua ma fesiligia le alii pe aisea ua togi ai le fagu i luga o le auala, ae o lo’o iai se lapisi e togi iai.

Na faamatala e le tina le le tali mai o le ua molia, ae fa’aauau pea ona savali ese atu.  O lea na fa’aauau pea ona agai atu le tina ma lona to’alua i le latou fale, ae na fa’ate’ia le tina ina ua toe savali atu Sinoti ma tutui foliga o lona to’alua i se fagu pia ua mae’a ona tata’e.

Ma na fa’aauau ona osofa’i e Sinoti ia le to’alua a lenei tina i le fagu pia ta’e, ma tamo’e atu ai loa le tina e saili mai se fesoasoani mai lona aiga.  O iina na sola ‘ese ai le ua molia.

Sa ta’ua e le tamaloa na a’afia, e le o se taimi muamua lea ua osofa’ia ai e le ua molia, ia se tagata i se fagu pia.  

Na aveina atu le tamaloa na manu’a i le falemai mo se togafitiga.

E le i ta’ua i totonu o fa’amaumauga a le malo pe na lokaina ia Sinoti.

Ae o ona moliaga, e aofia ai le Fa’ao’olima i lona tulgaa e lua, o se solitulafono mamafa e mafai ona nofosala ai i le falepuipui, e o’o atu i le lima tausaga, po o se sala tupe e $5,000; po o faasalaga uma e lua.

O lona moliaga lona lua, o le Faatupu Vevesi i Nofoaga Faitele, o se vaega ‘B’ o solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

E $50,000 le vaegatupe faatulagaina, e mafai ona tatalaina ai le ua molia, e faatalitali ai lona faamasinoga.