POU TIUTE A LEOLEO

Pago Pago - AMERIKA SAMOA

VALAAU E SE TINA IA LEOLEO INA UA TALEPEINA E LONA ALO TOTONU O LONA FALE

O le aoauli o Tesema 8, 2024, na fa’afeso’ota’i ai e se tina ia le Ofisa a Leoleo i Tafuna, ma ripotia ai sona alo ona ua fa’aleagaina e lona alo le fale, ina ua maua e le tina ia le ‘paipa’ lea e fa’aaoga e lona alo e ula ai se vaega o fualaau faasaina, o le Aisa, ma nanaina.

E ui ina sa sola ese le ua molia, ae peitai, sa mafai ona maua ma lokaina o ia, ma ua molia nei i le Fa’aleagaina o ni meatotino, i lona tulaga e lua (sauaga i totonu o aiga), o se vaega ‘A’ o solitulafono mama, e mafai ona nofosala ai i le falepuipui i le tausaga, po o se sala tupe e $1,000; po o faasalaga uma e lua.

E $1,000 na fa’atulaga e mafai ona tatalaina ai le ua molia, e faatalitali ai lona faamasinoga.

E tusa ai ma fa’amaumauga a le faamasinoga, na agai atu leoleo i le nofoaga na tupu ai le faalavelave.  Sa aveina e le tina na a’afia ia leoleo i le fogafale lona lua o lona maota, e fa’aali ai le gaioiga a lona alo sa faia.

Ma sa faamatalaina e le tina i leoleo, sa tupu lenei tulaga, a’o latou auai atu i sauniga lotu i lea taeao.

Sa faamatala foi e le tina e faapea, sa na ia mauaina le paipa  i tafatafa o lona alo, a’o moe o ia ma ia aveina ai le paipa ma le faamoemoe e valaau i leoleo pe a mae’a sauniga lotu.  Ma na malaga lo latou aiga i le lotu a’o moe pea lona alo (lea ua molia), i le fale.

Ma sa ta’ua e le tina le sau o lana tama teine i le fale, ina ua mae’a le lotu, e avatu le latou ta’ita’i mo le latou to’ana’i, ae toe vala’au atu lana tama teine, i le tulaga ua tupu i le fale.

Ina ua taunu’u mai le tina i le fale, ua leai lana tama lea ua molia, ae ua malepe uma meafale ma ta’ei fa’amalama o le fale.

I le faamatalaga a le alo tamaitai a le tina, sa ia fa’ailoa atu ai i leoleo, na pau le tagata sa i le fale, ina ua o latou o i le lotu ma lona tina, o lona tuagane lea sa moe.  Sa ta’ua foi e le tamaitai le nofo o lona ‘aunt’ i le fogafale muamua o le latou fale ma na fa’amatala atu e lona ‘aunt’ le pa’o o le fogafale lua, a’o kuka lana meaai.

I se taumate a le tamaitai i mea totino ua faaleagaina, e silia ma le $800.

Ina ua mae’a ona fa’atalanoaina e leoleo ia le tina ma lona alo tamaitai, sa faapea loa ona fa’atonuina i la’ua ina ia logo atu le ofisa a leoleo pe a toe fo’i mai le atalii (le ua molia) i le fale.

Na malaga ese leoleo ma ave le ‘paipa’ lea sa nanaina e le tina ma fa’ao’oina atu i le vaega o le latou ofisa e gafa ma le mataituina o vaega o fualaau faasaina.

O le afiafi lava lea, na toe maua ai e leoleo ia se valaau mai i le tina, o lea ua toe fo’i atu le ua molia, i le fale ma na fa’apea loa ona agai atu leoleo i le fale o le tina, ma lokaina mai ai loa le alii.

Ina ua suesueina le ua molia, i le ofisa a leoleo, sa ia fa’amaonia lona fa’aleagaina o le fale a lona tina, ona o lona le fiafia i le aveina e se tagata o sana meatotino, a’o ia moe.

MOLIA SE ALII NA GAOI MAI I LANA UO

O le po o Tesema 6, 2024, na fa’afeso’ota’i ai e se alii ia le Ofisa a Leoleo i Fagatogo mo se fesoasoani i le ave’esea o sana uo, e suafa ia Filipo Sione, mai lona fale, sa faapea ona agai atu leoleo ma aveina Filipo i lona fale.

Ae peitai, o se vaitaimi o lea lava po, na toe fo’i atu ai Filipo i le fale a lana uo lea na ave’esea mai ai e leoleo, ma gaoia se masini uela mai i le fale taavale a le na a’afia.

E tusa ai ma fa’amaumauga a le faamasinoga, o le vaveao o Tesema 7, 2024 sa toe vala’au ai le uo a Filipo i le ofisa a leoleo i Fagatogo ma ripotia le toe fo’i atu o Filipo ma gaoia lana masini.

Na fa’amatala e le ana le masini, na ia valaau atu ia Filipo e toe aumai lana masini, ae tali mai Filipo i le palauvale ma fa’aauau ona savali ese.

Ina ua toe taunu’u leoleo i le nofoaga na tupu ai le faalavelave, sa fa’asino iai e le ana le masini, ia le itu na agai iai Filipo ma lana masini.  Ae sa fiu leoleo e saili le ua molia, ae e le’i mauaina o ia.

A’o talatalanoa leoleo ma le e ana le masini na gaoia, sa savali atu se tasi o ona tuaoi ma fa’ailoa atu ia i latou ma leoleo, o lo’o nofonofo ia le ua molia i le matafaga.

Na fa’apea loa ona agai atu leoleo i le matafaga, ae peitai, e le’i mauaina atu ai le ua molia, ae sa maua atu ai na’o le masini uela, o lo’o ufiufi mai i se mitiafu.  Na fa’amaonia e le ana le masini, o lana masini lea sa alu ma Filipo.  Ae o le taimi lea, na va’aia ai e leoleo se mea o opeaopea mai i totonu o le sami.  Ma ina ua su’esu’eina e leoleo, sa maua ai, o le alii o Filipo.

Na faapea loa ona aveina e leoleo ia Filipo ma ina ua suesueina o ia, sa ia faamaonia lona gaoia o le masini uela ma sa ia fa’asinoina foi le nofoaga sa ia nanaina ai le pusa o meafaigaluega a lana uo.

O se taimi mulimuli ane, na fa’amaonia ai le a’afia o le ua molia, i le gaoia o ni isi meatotino faapea ma le sauaina o tagata, ae peitai, e le’i mauaina ai lava o ia.

O moliaga ua faia faasaga ia Filipo, e aofia ai le Gaoi, o se vaega ‘C’ o solitulafono mamafa, ma e mafai ona lokaina ai se tasi i le le silia ma le fitu tausaga, po o se sala tupe e le silia ma le $5,000; po o faasalaga uma e lua.

Faapea ma le moliaga o le solivale o fanua a isi, o se vaega ‘B’ o solitulafono mama, e mafai ona nofosala ai i le falepuipui mo le ono masina, po o se sala tupe e o’o atu i le $500; po o faasalaga uma e lua.

E $5,000 sa faatulagaina e mafai ona tatalaina ai le ua molia, e faatalitali ai lona faamasinoga.