POU TIUTE A LEOLEO

Pago Pago - AMERIKA SAMOA

MOLIA SE ALII I LE SAUAINA O SE TAMAITAI

I faamaumauga a le faamasinoga, o lo’o ta’ua ai le o’o atu o se vala’au i le Ofisa a Leoleo i Tafuna mai i se tamaitai, i le po o Novema 24, 2024, e tusa ai ma se faalavelave sa tupu i tafatafa o se fale ta lavalava i Pavaiai.  Na ta’ua e le tamaitai le sauaina e Raymond Puni o sana uo teine.

Ina ua taunu’u leoleo i le nofoaga na tupu ai le faalavelave, sa faamatalaina e le tamaitai na valaau atu i le Ofisa a Leoleo, lona va’aia o Puni o sauaina se tamaitai i tafatafa o le koneteina sa i luma o le fale ta lavalava.  

Ma na savali atu iai seisi alii e taumafai e taofi Puni, ae tau’ai mai e Puni i ma’a.

Sa taumafai leoleo e saili Puni ma sa fa’asino iai e le alii lea na taumafai e taofiofi Puni, ia le tamo’e o le ua molia agai i totonu o se fa’ato’aga i leisi itu auala o le fale ta lavalava.

Ina ua iloa mai e Puni ia le agai atu o leoleo, sa faapea ona toe tamo’e ese mai i le nofoaga na lafi ai.  Ae sa tuliloaina o ia e leoleo ma lokaina mai o ia.  A’o taumafai leoleo e tu’u le ua molia i totonu o le taavale, sa faapea atu le alii i leoleo, e fa’aeteete ae na te le’i talepeina se gutu o se tasi.

O le afiafi foi lava lea na taumafai ai leoleo e saili le tamaitai na a’afia i lenei faalavelave ae peitai, sa le’i mauaina o ia.

Na faatalanoaina e leoleo ia le alii lea sa taumafai e fesoasoani i le tamaitai na sauaina e Puni, ma sa ia faamatalaina i leoleo, lona lagonaina o le ‘e’e a se tamaitai a’o fai lana tagamea.  O lea na savali atu ai ma taumafai e taofi le la misa.  Ae peitai, na tago Puni i le togi le tamaitai i se ‘speaker’, ona liliu mai lea ua tau’ai o ia i ni ma’a ma palauvale mai.

Ua molia nei Puni i moliaga o le Fa’ao’olima i lona tulaga e tolu, o se vaega ‘A’ o solitulafono mama, e mafai ona loka ai i le tausaga atoa, po o se sala tupe e $1,000; po o faasalaga uma e lua.

Faapea ai ma le molia o le Faatupu Vevesi i Nofoaga Faitele, o se vaega ‘B’ o solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

E $5,000 le vaegatupe sa faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.

MOLIA SE ALII I LONA SAUAINA O LONA USO MA LE TO’ALUA A LONA USO

O le aso 22 o Novema, 2024, na valaau atu ai se tina i le Ofisa a Leoleo i Fagatogo,, mo se fesoasoani, ma ia tu’ua’ia ai le uso o lona to’alua, i le sauaina o i la’ua, i lo latou fale.

Ina ua taunu’u leoleo i le nofoaga na tupu ai le faalavelave, sa molimauina se alii o tofu lima ma ni apa pia.  Sa savali atu lenei alii ma fa’afetaui leoleo, ma na molimauina ai e leoleo le ma’osia o le itu taumatau o lona ua, ma le malosi o lona manogi pia.

Na taofi e leoleo ia lea alii ma fesiligia le fale o le tina sa valaau atu i le Ofisa a Leoleo, ma sa le gata ina fa’asino iai e lea alii le fale, ae sa ia fa’ailoa atu foi i leoleo, o ia lea na ripotia atu e le tina.

Sa faapea loa ona lokaina mai o ia e leoleo ma tu’uina i totonu o le taavale leoleo.

E le’i umi, ae agai mai se tina ma fa’ailoa mai i leoleo, o ia lea na vala’au atu ma sa ta’ua e le tina le sauaina o i la’ua ma lona to’alua, e lona uso (lea ua i totonu o le taavale leoleo) i luma o le la fanau.  

Ma na ta’ua e le tina le tupu so’o o lenei ituaiga faalavelave, ae la te fa’amagalo lava i le ua molia.

Na fa’atonuina e leoleo ia le tina e ao mai lana fanau ma lona toalua, e latou te malaga faatasi i le ofisa a leoleo, e fa’aauau ai le su’esu’ega o le mataupu.

I le ofisa a leoleo, sa faamatala auiliili ai e le tina ia le faalavelave na tupu ma sa ia ta’ua e faapea, na mafua le pisa ona o se la talanoaga ma le uo teine a le ua molia, lea o lo’o nofo i atunu’u i fafo, ia Novema 22, 2024.  

Ma i le talanoaga a le tina ma le uo teine a le ua molia, sa fa’amatalaina ai e le tina i le teine, ia tulaga uma sa tupu i le ulugalii a le ua molia, lea ua mae’a ona tatalaina.  Ma o le mafua’aga lea na le fiafia ai le ua molia.

Na ta’ua e le tina, lona tuliina o sana tama i le faleoloa ae fo’i mai lana tama ma fa’amatala le inuga pia a le ua molia i se fale tu’ufua e le mamao mai i le latou fale.  Ma i lea afiafi, a’o taumafai le tina e sauna lana fanau mo malologa o le po, sa ia fa’alogoina ai le ua molia, i totonu o le potu malolo.

Sa faamatala e le tina le talanoa o le ua molia i lona tina i luga o le telefoni, ae o lo’o tagi ma ‘e’e ma tu’ua’ia ia le tina na a’afia, i faafitauli o lo’o tutupu i le va o ia ma lana teine.  Ma na savali mai loa iai le tina na a’afia ae oso atu le ua molia ma tatu’i lona ulu ma ia pa’u ai i lalo.

Ma o le fa’aauau ona ‘e’e ma laulauvavale le ua molia, ma na oso mai ai lona uso (le to’alua a le tina na a’afia), ma amata ona o la fufusu.  Ae o le taimi lea, o lo’o matamata le fanau i mea uma o lo’o tutupu.  

Ua molia nei lenei alii i moliaga o le Fa’ao’olima i lona tulaga e lua, o se vaega ‘D’  I solitulafono mamafa, lea e mafai ona nofosala ai i le falepuipui i le lima tausaga, po o se sala tupe e i le va o le $150 ma le $5,000; po o faasalaga uma e lua.

Faapea ma le Fa’ao’olima i lona tulaga e tolu, o se vaega ‘A’ o solitulafono mama, e mafai ona faasala ai i le falepuipui, i le tausaga atoa, po o se sala tupe e $1,000; po o faasalaga uma e lua.

Ma le moliaga o le Faatupu Vevesi i totonu o le aiga, o se vaega ‘C’ o solitulafono mama, e mafai ona nofosala ai i le falepuipui i tausaga e 15, po o se sala tupe e $300; po o faasalaga uma e lua.

E $30,000 le vaegatupe na faatulagaina e mafai ona tatalaina ai le ua molia mai i le falepuipui.