POU TIUTE A LEOLEO

Pago Pago - AMERIKA SAMOA

E LE TASI AE LUA NI ALII FAI’AIGA MA SE TAMAITAI TALAVOU

I le fa’aauauina o su’esu’ega a leoleo i se mataupu i le faamalosia e se tamaloa ia se tamaitai talavou ia Oketopa 18, 2024, na alia’e ai le fai’aiga foi o lenei tamaitai ma seisi alii e 20 tausaga, o lo’o fai se la faigauo.

(O le a le lomia e le Lali ia suafa o i latou ua a’afia pe molia i lenei faalavelave aua le puipuiga o le tamaitai talavou lea o lo’o a’afia i lenei mataupu.)

E tusa ai ma faamaumauga a le faamasinoga, ina ua faatalanoaina le tamaitai talavou, sa ia ta’ua ai lona faamatalaina o mea uma sa tutupu ia te ia ma lona ‘uncle’ (lea ua molia i le faamalosia o le tamaitai talavou).

Sa faapea loa ona aumaia e leoleo ia le uo tama a le tamaitai talavou i le ofisa mo le faatalanoaina.

Ma sa faamatalaina e le ua molia (le uo tama a le tamaitai talavou), na o la talatalanoa ma le tamaitai i totonu o lona potu i le nofoaga o lo’o faigaluega ai ma i le faaiuga o le la talanoaga, sa o la fai’aiga ai ma le tamaitai.

O iina na faapea ai loa ona molia le uo tama a le tamaitai talavou i le faamalosi teine ma le faia o uiga faasotoma ma le tamaitai talavou.

O nei moliaga uma e lua, o se vaega ‘B’ o solitulafono mamafa, e mafai ona faasala ai i le lima tausaga po o se sala tupe e le i lalo ifo o le $150; po o faasalaga uma e lua.

E tusa ai ma le faamatalaga a le tamaitai talavou, na amata le la faigauo ma le alii 20 tausaga ia Me 18, 2024 ae ua fa’alua ona o la fai’aiga.  O le taimi muamua o Iuni 23, 2024 ma le lona lua ia Oketopa 18, 2024.

E $50,000 na faatulagaina e mafai ona tatalaina ai le ua molia, e faatalitali loa faamasinoga.

MOLIA SE AVE PASI I LE FAIA O UIGA MATAGA I SE TAMAITAI TALAVOU

O le aso 21 o Tesema, 2023 na o’o atu ai se tamaitai talavou i  le Ofisa Leoleo i Fagatogo, e ripotia ai se alii ave pasi, na tago atu ia te ia, i se auala e le tusa ai ma tulaga o le tulafono.  Ma na faasaoina lenei tamaitai, e seisi pasese sa i luga o le pasi, e talavou foi.

O se taimi mulimuli ane, na molia ai lenei alii ave pasi i moliaga, e aofia ai:

Faitauga 1:  Taofiofi sese, o se vaega ‘A’ o solitulafono mama, e mafai ona faasala ai i le falepuipui, e le sili atu ma le tausaga, po o se sala tupe e le silia ma le $1,000 po o faasalaga uma e lua.

Faitauga 2 & 3:  Fa’ao’olima i lona tulaga e tolu; o se vaega ‘C’ o solitulafono mama, e mafai ona nofosala ai, e le sili atu ma aso e 15, po o se sala tupe e le sili ma le $300; po o faasalaga uma e lua.

(Ua lomia le suafa o le ua molia, ona e le o fa’ailoa ai le tamaitai talavou na a’afia po o lona nu’u.)

E tusa ai ma fa’amaumauga a le malo, ina ua faatalanoaina e leoleo ia le tamaitai talavou sa ia ta’ua e faapea, sa i totonu o se pasi na agai atu i le itu i sisifo ma sa faatalitali le alii avepasi, le susuga ia Salemona Paselio (lea ua molia) se’ia o uma i lalo le pasese, ina ia Talanoa atu ia te ia (tamaitai talavou).

Sa ta’ua foi e le tamaitai talavou, na ia iloa lelei lava le fuafuaga a le ave pasi, on aua fiu e taofi le pasi ae le tu le pasi.  Ae na fai atu le ua molia ia te ia, e la te o e piki mai ni tagata ma ia tago atu i le u’u mai lona puimanava.  Na ta’ua e le tamaitai talavou lona le lagona lelei i lea taimi ma ia tu ai loa i luga ma savali agai i le nofoa pito i tua o le pasi.

E le’i umi ae toe tu le pasi ma piki seisi pasese ma o le pasese lea na faamatala iai e le tamaitai talavou ia le mea sa tupu. Ina ua toe fa’atu e le pasese lea ia le pasi ina ia mafai ona alu i lalo le tamaitai talavou, sa valaau atu le ua molia i le pasese, e alu o ia, o lea la te o ma le tamaitai talavou e piki isi tagata.

Ae peitai, sa o faatasi i lalo le tamaitai talavou ma le pasese lea.

Na mafai ona faatalanoaina e leoleo ia le pasese lea, o seisi foi tagata talavou, ma ia fa’amaonia le molimau a le tamaitai talavou ua a’afia i lenei mataupu.

A’o talatalanoa pea leoleo ma le tamaitai na a’afia faapea le molimau, sa o la faasino i se pasi lanu enaena ma le samasama sa va’aia i luga o le alatele.

O lea na agai atu ai loa leoleo ma taofi le pasi ma aumai le avepasi i le ofisa a leoleo mo le fa’atalanoaina.  Ma na ia faamaonia lona u’uina o le puimanava a le tamaitai talavou, ma lona faatonuina o leisi pasese ina ia tu’u le tamaitai talavou, o la e o e piki mai nisi pasese.

E $30,000 se vaegatupe na faatulagaina e mafai ona tatalaina ai le na molia, e faatalitali ai lona faamasinoga.