POU TIUTE A LEOLEO

Pago Pago - AMERIKA SAMOA

LOKAINA SE TAMALOA I LONA TA INA O LE ULU O LONA AFAFINE I SE PAIPA (PVC)

E tusa ai ma fa’amaumauga a le malo, o le afiafi o le aso 16 o Iulai, na valaau ai se tina matua i le Ofisa a Leoleo i Tafuna, ina ua ta e lana tama tama, ia le ulu o lona afafine e 14 tausaga, i se paipa (PVC).

(O le a le lomia e le Samoa News suafa o i latou na a’afia aua le puipuiga o fanau.)

Na aga’i atu leoleo i le nofoaga na tupu ai le faalavelave ma fa’atalanoaina le tina matua ma sa ta’ita’i atu foi e le tina matua ia leoleo i le potu moe a le tama o le tamaitai na a’afia.

Sa fesiligia foi e leoleo ia le to’alua a le ua molia, e su’e po o fea o iai lona to’alua, ae peitai, sa faamatala e le to’alua a le ua molia, na alu ese atu ma le fale.  Ae peitai, sa fa’ailoa ifo iai e le tina matua, o lona alo (le ua molia), o lo’o i totonu o le potu.

Na maua atu e leoleo ia le ua molia, o lo’o lafi i totonu o le pusa tu i totonu o lona potu moe ma lokaina mai ai loa o ia, ma ave’ese mai ai foi ma le tamaitai na a’afia, mai i totonu o le potu.

Sa maua e se tasi o leoleo ia le paipa (PVC) lea o lo’o talitonuina sa fa’aaogaina e le ua molia, e ta ai le ulu a lona afafine.

Ina ua fa’atalanoaina e leoleo ia le tamaitai na a’afia, a’o iai lona tina, sa faamatalaina e le tamaitai le faatonuina o ia e lona tama ina ia alu ‘ese mai tafatafa o le ‘router’, a’o la iai i totonu o le potu malolo, ona o le mafua’aga lea ua telegese ai le initeneti.

Ae peitai, na musu le tamaitai e so so ese, ona e le’i malamalama i le mafua’aga. Na savali atu loa le ua molia ma ta lona ulu i le paipa (PVC).

Ua molia nei le tamaloa 41 tausaga i se moliaga e tasi, o le Fa’ao’olima i lona tulaga e lua faatasi ma se faasalaga sili atu.  O se vaega ‘D’ o solitulafono ae o le a suia i le vaega ‘C’ o solitulafono mamafa, pe a mafai ona fa’amaonia lana solitulafono.

E $10,000 le vaegatupe sa faatulagaina e tatalaina ai le ua molia mai i le falepuipui, e faatali ai lona faamasinoga.

MOLIA SE TAMALOA I LONA FA’AO’OLIMA I SEISI TAMALOA E AUNOA MA SE MAFUA’AGA TATAU

O le vaveao o le aso 14 o Iulai, 2024 na maua ai se valaau a le Ofisa Leoleo i Tafuna, mai i se alii na manaomia se fesoasoani, ina ua tu’i o ia e se tagata, e aunoa ma se mafua’aga.  Na faamatala e lea alii i leoleo, na alu atu i le falekalapu a le Flame’s e piki sana uo, ae savali mai ai se tagata ma tu’i o ia.

Na faamatala foi e le na a’afia, ina ua taunu’u o ia i le falekalapu, sa taumafai e agai atu i totonu o le pakaga taavale, ae sa poloka mai lava taavale e seisi taavale.  Na ia fesiligia le aveta’avale o lea taavale, pe mafai ona ave’ese lana ta’avale se’i alu atu lana ta’avale, ae savali mai le alii o Tufugafale Lolesio, ma tu’i le na a’afia.

E taunu’u atu leoleo ua alu ‘ese Lolesio mai i le nofoaga na tupu ai le fa’alavelave ae na valaau mai nisi sa iai, ma fa’ailoa mai i leoleo, o Lolesio o lo’o savali atu aga’i i le lotoa a le ASPA.

Sa faapea ona agai atu loa iai leoleo ma na fa’asino ifo e le na a’afia, i leoleo, le tagata sa tu’iina o ia.  Na faapea loa ona lokaina mai ai e leoleo ia Lolesio, ma aveina atu i le latou ofisa i Tafuna mo le fa’aauauina o a latou su’esu’ega.

Ua molia nei ia Lolesio i le moliaga o le Faao’olima i lona tikeri e tolu, o se vaega ‘A’ o solitulafono mama, e mafai ona nofosala ai se tasi i le falepuipui i le o’o atu i le tasi tausaga, po o se sala tupe e $1,000; po o faasalaga uma e lua.

E $300 le vaegatupe sa faatulagaina e mafai ona tatalaina ai le ua molia mai i le falepuipui, e fa’atali ai lona faamasinoga.

SULUFA’I SE TAMAITAI I LEOLEO ONA O TU’UAIGA I LE SAUAINA O IA E LANA UO TAMA

E tusa ai ma fa’amaumauga a le malo, o le aoauli o le aso 13 o Iulai, na ripotia ai e se tamaitai ia sana uo tama e 25 tausaga, i lona fa’ao’olima ia te ia, i le aso 12 o Iulai.

Ina ua fa’atalanoaina e leoleo ia le tamaitai, sa ia faamatalaina e faapea, na tula’i mai se la fe’ese’esea’iga ma lana uo tama, o Natu Ropati, ona o se fa’afitauli mai galuega.

Sa ta’ua e le tamaitai lona taumafai e fa’amanino ia Ropati le fonotaga sa auai atu iai ma lana pule, ae ita le alii o Ropati.  Na ta’ua e le tamaitai le savali atu o le ua molia, ma amata ona tatu’i o ia, ma sa ia a’apa atu ma u’u mai se fagu ma togi ai le ua molia.  O iina na tago ai Ropati ma u’u mai se la’au ma fa’afefe e sasa ai o ia.

Ae ina ua latalata mai le ua molia, na alu atu lona uncle ma u’u mai o ia ma otegia o ia ma alu ‘ese atu ai loa Ropati mai i le fale.

Sa ta’ua e le tamaitai, e faapea, e le o se taimi muamua lea ua tupu mai ai fa’afitauli faapea i le va o ia ma Ropati ma ua iai sona popolega o le a fa’aauau ina sili atu se mea e ono tupu mai i le lumanai, ma o le mafuaaga lea na ia valaau ai loa i le ofisa a leoleo.

Sa molimau foi le ‘uncle’ a le ua molia, i lona vaai tino o fa’ao’olima le ua molia, i le tamaitai ma fa’afefe o ia i se la’au ma o le mafua’aga lea na ia oso atu ai ma taofi mai le ua molia ma tuli ese mai i le fale.

Ua molia nei Ropati i le moliaga e tasi o le Fa’ao’olima i lona tulaga tolu (DV) – o se vaega ‘C’ o solitulafono mama, e mafai ona nofosala ai i le falepuipui i le o’o atu i aso e sefululima, ma se sala tupe i le va o le $150 ma le $300; po o faasalaga uma e lua.

E $300 le vaegatupe na fa’atulagaina e tatalaina ai le ua molia, e fa’atali ai lona faamasinoga.