POU TIUTE A LEOLEO

Pago Pago - AMERIKA SAMOA

FAAI’U LE TAOFIA O LE TAAVALE I LE LOKA I LE FALEPUIPUI

E tusa ai ma faamaumauga a leoleo, o le po o le aso 27 o Me, 2024, a’o feagai leoleo ma tiute i luga o le alatele, na taofia ai le taavale a se alii i Faga’alu ma va’aia ai e leoleo ia se tina i totonu o le ta’avale, o lo’o si’i sona alo, pe a ma le 4 i le 5 tausaga, ae e le o faia se fusipa’u, po o iai foi se nofoa mo lona alo.

[E le o lomia e le Samoa News ia suafa o i latou o lo’o a’afia i lenei mataupu, ona o le puipuiga o fanau iti.]

Sa fa’ailoa atu foi e le aveta’avale i leoleo le leai o sona laisene aveta’avale ia te ia, i le taimi na faatu ai lana taavale.  Na tapa loa e leoleo se ID ae tali mai le aveta’avale, o lo’o galo lana ato tupe, lea o lo’o iai lana laisene avetaavale, i le fale.

Ua molia nei le avetaavale i moliaga e tolu;

Faitauga 1:  Avetaavale le faautauta – o se vaega ‘D’ i solitulafono mamafa, e mafai ona nofosala ai i le falepuipui, i va o le 90 aso ma tausaga e lima (5), po o se sala tupe e $5,000 po o faasalaga uma e lua.

Faitauga 2:  Leai se nofoa po o se fusipa’u mo le tamaititi/teineititi – o se vaega ‘B’ i solitulafono mama, e mafai ona nofosala ai i le falepuipui, i le le sili ma le ono (6) masina, po o se sala tupe e le silia ma le $500; po o faasalaga uma e lua.

Faitauga 3:  Leai se laisene aveta’avale – o se vaega ‘B’ i solitulafono mama, e mafai ona nofosala ai i le le silia ma le ono (6) masina, po o se sala tupe e le silia ma le $500; po o faasalaga uma e lua.

E $5,000 le vaegatupe sa faatulagaina e tatalaina ai le ua molia mai i le falepuipui, e faatalitali ai lona faamasinoga.

MOLIA USO MATUA I LE SAUAINA O LE USO LA’ITITI

I fa’amaumauga a le malo, o lo’o ta’ua ai le fa’afeso’ota’ia e le vaega a le EMS ia le Ofisa Leoleo a Tafuna, e tusa ai ma se fa’alavelave na a’afia ai se auuso e to’alua, lea na fa’ai’u i le lokaina ai o le uso matua.

[O le a le lomia e le Samoa News ia suafa o i latou na a’afia i le fa’alavelave ona o le puipuiga o fanau iti.]

E tusa ai ma faamaumauga a leoleo, o le taeao o le aso 2 o Iulai 2, 2024 na fa’afeso’ota’i ai e le vaega a le EMS ia le Ofisa a Leoleo i Tafuna, ona o se tamaititi e 17 tausaga le matua, 

Ina ua taunu’u leoleo i le falema’i (ER) sa feiloa’i ai ma le tina o le tamaititi 17 tausaga ma sa ia faamatalaina i leoleo, lona lagonaina o le tagi mai a lana tama, ma sa tu’i e sona alo matua, i se ma’a.  Sa faamatala e le na a’afia i lona tina, le ‘e’e atu o lona uso matua ia te ia, e alu i le fale, ae na te le’i toe tu’iina o ia i le ma’a.

Sa faamatalaina e le tina, o si ona alo lea ua manu’a, e iai ona mana’oga faapitoa tumau ma o ia e gafa ma le tausiga o si ona alo. Ma e nonofo uma ona alo e to’alua, i lo latou fale. Sa ta’ua foi e le tina, e le o se mea foi lenei i le va o lana fanau ma e masani ona fasi e lana tama matua ia lona uso laititi, pe a le usita’i.

Na faamatala foi e le tina le aveina atu e seisi alii ia lona alo 17 tausaga, lea sa molimauina le faalavelave na tupu.

Sa aga’i atu loa leoleo i Mapusaga e saili mai le uso matua, ae o latou fetaui ai ma se tamaitai lea na faamatala ifo i leoleo, le le’i toe fo’i atu o le uso matua talu ona tupu le faalavelave.

O lo’o ta’ua i totonu o fa’amaumauga e faapea, o le vaveao o le aso na soso’o ai, Iulai 3, 2024, na valaau atu ai le tina o le auuso lenei, mo se fesoasoani ona o lea ua alu atu le uso matua i le fale, ae o lo’o popole le tina ina ne’i toe fasi e le alii matua, ia lona uso la’ititi.

Na aga’i atu loa leoleo i le fale o le aiga a le tina lea na valaau mai ma maua atu ai le ua molia ma lokaina mai ai loa o ia.

Ua molia nei lenei alii i moliaga e lua, e aofia ai;

Faitauga 1:  Faia o se gaioiga e afaina ai le saogalemu o se fanau iti – o se vaega ‘A’ i solitulafono mama, e mafai ona nofosala ai i le o’o atu i le tausaga, po o se sala tupe e $1,000; po o faasalaga uma e lua.

Faitauga 2:  Fa’ao’olima i le tulaga e tolu – o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga, po o se sala tupe e $1,000; po o faasalaga uma e lua.

E $3,000 le vaegatupe sa faatulagaina e tatalaina ai le ua molia, e faatalitali ai lona faamasinoga.

MOLIA LE TAMALOA I LE FAATUPU MISA I TOTONU O LE AIGA

E tusa ai ma fa’amaumauga a le malo, o le vaveao o le aso 7 o Iulai, 2024 na valaau atu ai se tina i le Ofisa a Leoleo i Tafuna (TPS), e ripotia lona to’alua i le faatupu vevesi i totonu o le latou aiga.

[Ua le lomia e le Samoa News suafa o i latou o lo’o a’afia i lenei mataupu, aua le puipuiga o fanau.]

Ina ua taunu’u leoleo i le nofoaga na tupu ai le faalavelave, sa o latou talatalanoa ma le tina o le aiga ma sa ia faamatalaina i leoleo lo latou o atu ma lana fanau teine (13 ma le 15 tausaga), e piki mai lona to’alua mai i le fale o se tasi o ona aiga.

Sa ta’ua e le tina e faapea, e taunu’u atu, ua fa’asuaava lona to’alua.  Ma a’o latou aga’i mai i le fale, sa faapea atu lona to’alua ia te ia, e faanoanoa tele i lana (tina) amio.  Na ta’ua foi e le tina le leotele ma le palauvale o lona to’alua, a’o latou iai ma lana fanau teine i totonu o le taavale.

Sa faamatalaina foi e le tina e faapea, ina ua o latou taunu’u i le fale, sa o latou taumafai ma lana fanau teine e ta’ita’i mai lona to’alua mai i le ta’avale, aga’i i totonu o le latou fale.  Ae peitai, sa fa’aauau pea le mataupu a lona to’alua, o le ‘e’e ma palauvale ma tu’ua’ia o ia i lona le faamaoni.

Na ta’ua e le tina, pe a ma le lima minute talu ona o latou ta’o’oto ma lana fanau e fai se malologa, ae toe savali atu lona to’alua ma fa’aauau lana pisa ma ana tu’ua’iga e faasaga i le le faamaoni o le tina.

Ae o le tu mai i luga o le tina mai i le moega, sa ia ta’ua ai le tu’i o ia e lona to’alua ma pa’u ai i lalo.  Ma na ia lagonaina le feosofi atu o si ana fanau teine e taofiofi lona to’alua.

Sa ta’ua e le tina lona fefe ina ne’i o’o le to’asa o lona to’alua i le la fanau, o lea na ia valaau ai loa i le Ofisa a Leoleo mo se fesoasoani.

Na faamatalaina e le tina i leoleo, le tupu so’o o lenei faafitauli i lo latou aiga, talu ona o la tete’a ma lona to’alua.  Ma o le tele o taimi, a alu lona to’alua e faigaluega, e fa’ato’a toe fo’i mai i le aso e soso’o ai.

Sa faapea loa ona aga’i atu leoleo i le fale o le ua molia, ma lokaina mai o ia mo le fa’aauauina o a latou su’esu’ega.

A’o fa’ataunu’uina tiute e leoleo mo le lokaina o le ua molia, sa o latou fa’alogoina le malosi o le manogi ‘ava malosi o lea alii, faapea ma le mumu o ona mata ma le fa’atosotosololoa o lana tautala.

O moliaga ua tu’uaia ai le ua molia, e aofia ai;

Faitauga 1:  Fa’ao’olima i lona Tulaga e Tolu – o se vaega ‘A’ o solitulafono mama, e mafai ona nofosala ai i le falepuipui, i le o’o atu i le tausaga po o se sala tupe e $1,000; po o faasalaga uma e lua.

Faitauga 2:  Faatupu Vevesi i totonu o le aiga – o se vaega ‘C’ o solitulafono mama, e mafai ona nofosala ai i le falepuipui, i le o’o atu i aso e sefululima (15) po o se sala tupe e $300; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia mai i le falepuipui, e faatalitali ai lona faamasinoga.