POU TIUTE A LEOLEO

Pago Pago - AMERIKA SAMOA

TINO TAPUA’IALUPE

E tusa ai ma faamaumauga a le malo, o le aso 28 o Ianuari, 2024, na fa’afeso’ota’i ai e se tamaitai ia le Ofisa a Leoleo i Fagatogo (FPS) e lipotia ai se tamaloa, ua na tata’eina le faitoto’a tioata o le latou fale i Faga’alu.

E taunu’u atu leoleo i le nofoaga sa tupu ai le faalavelave, o taofiofi mai e tuagane a le tamaitai, ia le susuga ia Tino Tapua’ialupe, lea na molia i lenei mataupu.

Sa ripotia foi le malosi o le manogi fa’asuaava o le na molia ma sa le mafai ona tu sa’o i le taimi na lokaina mai ai o ia e leoleo.

I fa’atalatalanoaga a leoleo ma tagata o le aiga na tupu ai le fa’alavelave, sa faamatala ai le tamaitai o Christina Falanika lona iai i totonu o le latou fale, ae alu atu Tapua’ialupe e mana’o e fia talanoa ia te ia. Na ta’ua e Falanika le la tauupu ma Tapua’ialupe ona o le la faigauo sa faia muamua, ma ia fa’atonuina ai le ua molia e alu ‘ese ma le fale, ae musu le alii.  Ona valaau loa lea o Falanika i sona tausoga ma faamatala iai le mea o tupu.  Ae o le taimi lea, na tu’i ai e Falanika le faitoto’a tioata o le fale.

Ua molia nei Tapua’ialupe i moliaga e tolu, e aofia ai;

Faitauga 1:  Fa’aleagaina o ni meatotino, i lona tulaga e 2 – o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga (1), po o se sala tupe e $1,000; po o faasalaga uma e lua.

Faitauga 2:  Solivale o fanua – o se vaega ‘B’ i solitulafono mama, e mafai ona nofosala ai i le falepuipui, i le o’o atu i le ono (6) masina, o se sala tupe e $500; po o faasalaga uma e lua.

Faitauga 3:  Faatupu Vevesi i totonu o aiga – o se vaega ‘C’ i solitulafono mama, e mafai ona nofosala ai i le falepuipui, i le o’o atu i aso e sefululima (15) po o se sala tupe e $300; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia, e faatalitali ai lona faamasinoga.

SIMANU TOFA

 I faamaumauga a le malo, o lo’o ta’ua ai le taofia e leoleo sa tiute i luma o le aoga tulaga muamua a Matafao, i le 6:24 i le afiafi o le aso 27 o Ianuari, 2024, ia se ta’avale na aga’i atu i le itu i Sasa’e o le motu, ona o le saoasaoa.  

Sa fa’aaogaina e leoleo ia le latou fua (Lidar) lea e fuaina ai le saoasaoa o taavale i luga o le alatele, ma lesitala ai le saoasaoa o le taavale i le 30 maila, i se vaega o le alatele, e na’o le 20 maila e fa’atagaina ai le saoasaoa o taavale.

Ina ua fa’atuina e leoleo ia le taavale a le ua molia, ma tapaina lana laisene avetaavale, sa tali le alii, o lo’o galo i le fale lana laisene aveta’avale ae ia tu’uina i le leoleo seisi ituaiga ID.  A’o faasoa leoleo i le tulaga ua tula’i mai i le leai o se laisene aveta’avale a le aveta’avale, ae matala le faitoto’a o le taavale, lea e i tua o le aveta’avale ma oso mai ai se alii, o lo’o ia u’uina se apa pia, ua mae’a ona tatalaina.

Sa fautuaina e leoleo ia le susuga ia Simanu Tofa, lea na oso mai fafo o le taavale ma lana apa pia, le faasaina ona taumafaina ni ava malolosi i totonu o se taavale a’o faimalaga i luga o le alatele, ae tali Tofa, e na te le’o malamalama i lea tulafono.

Na faapea loa ona lokaina Tofa ma aveina atu i le to’ese i Tafuna e faatalitali ai lona tula’i i luma o le faamasinoga.

SATUNU TAUTAU

O lo’o ua faamaumauina i faamaumauga a le malo, le lipotia mai i le Ofisa a Leoleo i Tafuna, i le aso 21 o Iuni, 2024, ia ni alii se to’atolu, e aofia ai se alii talavou, i lo latou tau’aia o se fale a se aiga i Fagaima.

Sa ta’ua e le tina ia Naomi Oney, lea na valaau mai i le Ofisa a Leoleo, na toeitiiti lava ona lavea ai ma ia i ma’a na tau’ai ai e nei alii lona fale.  Sa taumafai Oney e talosagaina nei alii e taofi le latou gaioiga ae peitai, na palauvale atu ia nei alii ia te ia.

Ina ua taunu’u leoleo i le maota o Oney, o lo’o fa’aauau lava le sauniga a nei alii e to’atolu, i le tau’aiga o le fale a Oney, ae latou te le o iloa mai le taunu’u a leoleo.  Ae na latou iloa mai loa le taavale a leoleo, sosola ese loa ma tuliloaina ai e leoleo.

Sa maua e leoleo le alii e to’atasi ma aveina loa o ia i le TPS ma fa’amaonia ai o se alii talavou, lea na logoina ai loa ona matua.  Ina ua taunu’u le tua’a o lenei alii, sa faapea loa ona toe fa’aauau su’esu’ega a leoleo.

Ma sa faamatalaina e le alii talavou, o ia ua na’o se molimau i le faalavelave na tupu, lea na fasi ai nisi o tamaiti o le nu’u.  Ae peitai, sa faailoa atu e se tasi o leoleo le le faamaoni o le molimau a le alii talavou, ona sa molimauina e le leoleo lona auai ma isi alii, i le tau’aiga o le fale.

Na toe suia ai loa le faamatalaga a le alii talavou ma ia faamaonia lo latou tau’aia ma ana uo, o Tautau ma Faaliga, le fale a Oney.

A’o faia le faatalanoaga a le alii talavou, sa faalogoina le malosi o le manogi o le ava malosi mai i le alii talavou, ae ina ua fesiligia o ia pe sa ia taumafaina se ‘ava malosi, na tali le alii talavou, e leai.

Sa faataunuuina le suesuega o le alii talavou e faamaonia ai lona tagofia pe le tagofia, o se ‘ava malosi, ma e 0.053% le faaiuga o lea suesuega.

Na toe tatalaina lenei alii talavou i lalo o le va’ava’aiga a lona matua.

O lo’o ta’ua i totonu o faamaumauga, ia se amioga masani a i la’ua e to’alua na ta’ua e le alii talavou, o Satunu Tautau ma Edward Faaliga, le tau’ai o fale a aiga i Fagaima ona sosola lea ae e le’i o’o atu leoleo.

Ua molia uma Faaliga ma Tautau i le Faatupu Vevesi i Nofoaga Faitele ma e ta’i $500 vaegatupe sa faatulagaina e tatalaina ai i la’ua, e faatalitali ai a la faamasinoga.