POU TIUTE A LEOLEO

Pago Pago - AMERIKA SAMOA

LEOTELE LE PATI A SE TAMA 65 TAUSAGA, LE MAFAI AI ONA TOFAFA TUAOI

O le po o le aso 17 o Aperila, 2024 na telefoni ai se tina e lipoti lona to’alua i le Ofisa a Leoleo i Fagatogo ona o le fa’asua’ava ma palauvale solo i le fale o iai tu’ugamau a lo latou aiga.

Na aga’i atu leoleo i le nofoaga na lipotia mai ai lenei faalavelave ma va’aia se tama matua, le susuga ia Setu Muliau, o lo’o nofonofo mai i totonu o le fale o iai tu’ugamau ma fai ai sana inuga pia.

Ona sa le mafai ona malaga mai fafo le tina na valaau i leoleo, ona o tulaga i lona soifua maloloina, o lea na ulufale atu ai leoleo i lona maota ma o latou talanoa ai, e tusa ai ma lenei mataupu.

Sa faamatala e lenei tina, ina ua ma’ea le sa a le nu’u, sa alu loa lona to’alua i le fale a le latou pulenu’u, ae fo’i mai, ua fa’asuaava.

Ona alu lea o lona to’alua i le fale o iai le tu’ugamau a lona tuafafine ma fa’aauau ai lana inuga pia.  Ae na valaau mai tuaoi o le tina, ona o le leotele o le toeaina ma le palauvale.

Sa faamatala foi e le tina le la o atu ma si ona alo (alii) ma fai atu i lona to’alua e sau loa i le fale e pisa ai, ae musu le toeaina ma palauvale mai i le tina ma lau mai lona pepelo.  

Sa ta’ua foi e le tina, e le o se taimi muamua lea ua fai ai e le tama o le aiga lea tulaga.

Ina ua mae’a ona talatalanoa leoleo ma le tina, sa faapea loa ona fa’aauau a latou su’esu’ega i molimau po o tuaoi, lea na fa’amatalaina e se tasi o tauoi, le le mafai ona o fai sa la malologa ma lona to’alua, ona o le leotele o le ua molia, i fafo o le latou fale.  Sa ta’ua foi e le molimau le palauvale leotele o le ua molia, ma fai mai, “O a’u o Setu!”  Ma sa faatonu ai loa e le tuaoi ia lona to’alua e valaau le to’alua a Muliau ma ta’u iai le mea a Muliau lea e fai, ua le mafai ai ona o latou momoe.

Ina ua mae’a lea, na agai atu loa leoleo e loka mai Muliau mai i le fale o tu’ugamau.

Ae o lo’o ta’ua i faamaumauga a leoleo le fa’aauau pea ona leotele le ua molia i totonu o le taavale a leoleo, a’o aga’i atu i le Ofisa a Leoleo i Fagatogo, na aofia ai ma lona palauvale i leoleo.

Ua molia nei Muliau i le Faatupu Vevesi i Nofoaga Faitele – o se vaega ‘B’ o solitulafono mama, e mafai ona fa’asala ai se tasi i le falepuipui mo le ono (6) masina, po o se sala tupe e $500; po o faasalaga uma e lua.

E le o ta’ua i totonu o fa’amaumauga a leoleo se vaegatupe faatulagaina, e tatalaina ai le ua molia mai i le falepuipui, e faatali ai lona faamasinoga.

TOFIGA LIAIGA

O le aso 18 o Aperila, 2024 na ave faapagotaina ai le susuga ia Tofiga Liaiga ona o se faafitauli sa tula’i mai i luga o le alatele, i le aso 15 o Oketopa 2023.

E tusa ai ma fa’amaumauga a leoleo, o le vaveao o le aso 15 o Oketopa, 2023, a’o faataunu’uina tiute masani a leoleo i luga o le alatele, na va’aia ai se ta’avale o aga’i atu i le itu i Saute, e leai ni moli o luma ma tua.  

Sa fa’atuina e leoleo ia le ta’avale ma ina o su’esu’eina e leoleo ia le aveta’avale (Tofiga Liaiga), na lagonaina e leoleo le manogi pia o le alii aveta’avale.

Na tapaina e leoleo ia le laisene avetaavale a Liaiga ae peitai, e le’i sona laisene avetaavale.  Sa faapea foi ona fa’ataunu’uina e leoleo ia ni su’ega se tolu e fa’amautuina ai pe fa’asuaava lenei, pe leai.  Sa mafai ona faamaonia e nei su’ega le fa’asuaava o le ua molia.

I su’esu’ega a leoleo i lea vaveao, na fa’amaonia ai foi le fa’aleaogaina o le laisene aveta’avale a Liaiga mo le 24 masina, ona o le solitulafono lava lea e tasi, o le aveta’avale ae o lo’o fa’asuaava.

Ua molia ai nei lenei alii i moliaga e tolu;

Faitauga 1:  Solitulafono tau avetaavale – o se vaega ‘D’ o solitulafono mamafa, e mafai ona faasalaina ai se tasi i le falepuipui, i le va o le ivasefulu (90) aso ma le lima (5) tausaga, po o se sala tupe e $5,000; po o faasalaga uma e lua.

Faitauga 2:  Aveta’avale a’o fa’asuaava – o se vaega ‘A’ o solitulafono mama, e mafai ona faafalepuipui ai se tasi i le o’o atu i le tausaga e tasi (1) po o se sala tupe e $1,000; po o faasalaga uma e lua.

Faitauga 3:  Leai se laisene avetaavale – o se vaega ‘B’ o solitulafono mama, e mafai ona loka ai se tasi i le falepuipui, i le o’o atu i le ono (6) masina, po o se sala tupe e le silia ma le $500; po o faasalaga uma e lua.

E $2,000 le vaegatupe ua fa’atulagaina e mafai ona tatalaina ai le ua molia mai i le falepuipui, e faatali ai lona fa’asalaga.