POU TIUTE A LEOLEO

Pago Pago - AMERIKA SAMOA

FAIVALE FA’ATOIA

I totonu o faamaumauga a leoleo, o lo’o ta’ua ai le telefoni atu o se tamaitai i le Ofisa a Leoleo i Fagatogo i le po o le aso 23 o Aperila, 2024, ona o se tasi o pisapisa o ma faaumu solo i tafatafa o le ‘pavilion’ i Fagatogo.

Sa aga’i atu leoleo e su’esu’e ia totonu o le afioaga ma va’aia ai se faalapotopotoga o tagata, o faia se latou inuga pia, i tafatafa o le ‘pavilion’.

Ae sa muamua ona fa’ata’ape e leoleo se inuga a ni alii se to’aono sa i luma o le Tedi of Samoa, ma na fesiligia i latou e leoleo po o ai lea sa fa’aumu.  Sa tali nei alii talavou, e latou te le iloa.

Sa toe fa’aauau le su’esu’ega a leoleo, i luma o le fale o lo’o teuina ai le fautasi a Fagatogo, lea sa iai foi seisi faapotopotoga o lo’o fai ai foi se latou inuga pia.  Ae fa’alogoina loa e leoleo ia le fa’aumu o se tagata, o lo’o sau mai i le Tedi, le mea lea na fa’ato’a fa’ata’apeina ai leisi au inu pia.

Na iloa mai e leoleo le tamo’e o se alii mai i le Tedi, agai i le ‘pavilion’ i luga o le malae, ae o lo’o alu lava ma palauvale.  Na faapea loa ona tuliloa mai o ia e leoleo, ae ua tamo’e lenei alii aga’i i luga o le mauga i le mea o iai le malumalu Katoliko.

Sa mauaina mai lenei alii e leoleo ma lokaina loa o ia, a’o ia taumafai e tete’e atu i gaioiga a leoleo, ma ia taumafai foi e faauma lana apa pia.  Sa faapea foi ona togi e lenei alii ia se tasi o leoleo i lana apa pia.  Na o’o lava i le ofisa a leoleo, o lo’o tete’e lava lenei alii i taumafaiga a leoleo e faafilemu o ia.

Ua molia nei le susuga ia Faivale Fa’atoia i moliaga e tolu;

Faitauga 1:  Faatupu Vevesi i nofoaga faitele – o se vaega ‘B’ o solitulafono mama, lea e mafai ona loka ai se tasi i le o’o atu i le ono (6) masina, po o se sala tupe e $500; po o faasalaga uma e lua

Faitauga 2:  Inu Pia i nofoaga faasaina – o se vaega ‘B’ o solitulafono mama, e mafai ona nofosala ai se tasi i le falepuipui, i le ono (6) masina, po o se sala tupe e $500; po o faasalaga uma e lua

Faitauga 3:  Tete’e i le ave faapagota – o se vaega ‘A’ o solitulafono mama, e mafai ona nofosala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia mai i le falepuipui, e faatali ai lona faamasinoga.

Ina ua aveina lenei alii i le ofisa a leoleo, sa lagonaina e leoleo lona manogi pia ma le faatosotosololoa o lana tautala, faapea le mauaina i totonu o le taga o lona ofu ia ni apa pia se lua.

PULETOFI KELESOMA

I faamaumauga a leoleo, o lo’o ua ta’ua ai le lokaina o le susuga ia Puletofi Kelesoma ona o se faalavelave na tulai mai i le vaveao o le aso 14 o Aperila 2024, ina o faagasolo tiute a leoleo i luga o le alatele.

Sa mauaina atu ai e leoleo ia Kelesoma, o lo’o inu pia, i le fale faatali pasi i luma o le ASPA.  Na fa’ailoa atu e se tasi o leoleo ia Kelesoma, e le mafai ona taumafa lana pia i le fale faatali pasi, ae fesiligia e Kelesoma ia le leoleo, po o le a le tulafono o ta’u mai ai lea tulaga.

Na faatonuina loa e leoleo ia Kelesoma ina ia alu ese ma le fale faatali pasi.

Ae ina ua toe ta’amilo atu leoleo i le lua itula, na toe va’aia foi Kelesoma o lo’o toe inu pia mai i le fale faatali pasi ma palauvale solo.  Sa faapea foi ona toe faatonuina e leoleo ia Kelesome e alu ese ma le fale faatali pasi.  Ma sa molimauina e leoleo, le tu’ua e le ua molia, ia le fale faatali pasi.

Ae o le ta o le 5:00 i lea lava taeao, sa toe vaaia ai e leoleo ia le ua molia, o lo’o inu pia mai i lume o le fale faatali pasi i tafatafa o le faleoloa a le TSM.  Ma e savali atu iai se leoleo, ae palauvale mai iai le ua molia.  O lea na ave faapagota ai loa o ia e leoleo ma molia loa o ia i le tulafono.

Faitauga 1:  Taumafa pia i nofoaga e faasa – o se vaega ‘B’ o solitulafono mama, e mafai ona nofosala ai se tasi i le ono (6) masina, po o se sala tupe e $500; po o faasalaga uma e lua.

Faitauga 2:  Faatupu Vevesi i nofoaga faitele – o se vaega ‘B’ o solitulafono mama, e mafai ona nofosala ai se tasi i le ono (6) masina i le falepuipui, po o se sala tupe e $500; po o faasalaga uma e lua.

E $300 le vaegatupe faatulagaina e mafai ona tatalaina ai le mai i le falepuipui, e faatali lona faamasinoga.