POU TIUTE A LEOLEO

Pago Pago - AMERIKA SAMOA

MOLIA SE TAMALOA I LONA FA’AO’OLIMA O SE TAMAITAI

E tusa ai ma faamaumauga a leoleo, o le aso 8 o Aperila, 2024 na o’o atu ai se tamaitai i le Ofisa Leoleo i Fagatogo ma lipotia ai lona tuaoi, i lona fa’ao’olima ia te ia (tamaitai), i lona fale i Fagatogo.

Sa faamatalaina e le tamaitai na a’afia, i leoleo, le sauaina o ia e le susuga ia Setu Talaimanu, i fafo o lona fale i Fagatogo.  Ae sa mafai ona ia poloka tu’i a Talaimanu i ona lima, o le mafuaaga lea o le totolia ma fula ai o ona lima.  Sa ia ta’ua foi le tau’ai o ia e Talaimanu, i fasi ‘drywall’ ma faamata’u o ia i le oti, atoa ma le palauvale atu ia te ia.

A’o fa’atalanoaina e leoleo ia le tamaitai na a’afia i lenei mataupu, sa maitauina ni ma’osia i lona lima taumatau ma na fesiligia ai le tamaitai e leoleo pe finagalo e togafitia lona lima e se fomai, ae peitai, na tete’e lenei tamaitai.  Ae sa mafai ona pu’eina e leoleo ata o manu’a o lenei tamaitai, i ona lima ma vae.

Ina ua mae’a ona fa’atalanoaina e leoleo ia le tamaitai na a’afia i lenei mataupu, sa o latou agai atu loa i le fale sa faasino iai e le tamaitai ua a’afia i le mataupu, o lo’o nofo ai Talaimanu ma lona aiga.

Ae sa muamua ona talanoa leoleo i le ‘uncle’ o le tamaitai ua a’afia i le mataupu, lea e nofo foi i totonu o le fale lava e tasi.  Ma sa faamatalaina foi e le ‘uncle’ ia le mea sa tupu.

Ona agai loa lea o leoleo ma aumai le ua molia ma aveina atu o ia i le ofisa a leoleo mo le fa’atalanoaina.

E tusa ai ma le fa’amatalaga a le ua molia, sa le fiafia i le tamaitai lea ua moliaina o ia, ona sa ia vaai o taumafai e fasi lona afafine e 14 tausaga, a’o tau upu i fafo o le fale.  Ma o le mafuaaga lea na ia po ina ma tu’iina ai le tmaitai lea.

O le moliaga ua molia ai nei Talaimanu (Fa’ao’olima i lona tulaga e tolu) – o se vaega ‘A’ o solitulafono mama, lea e mafai ona nofosala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.

MASALOMIA SE SATINI I SAMOA I LE FAIA O AMIOGA MATAGA I SE LEOLEO TAMAITAI

Lipotia mai e nisi o vaega fa’asalalau i Samoa le fa’amaloloina le tumau (suspend) o se alii leoleo Satini i totonu o le Ofisa Leoleo a Samoa, a’o feagai ai le vaega ale SPPCS, le Minisita o Leoleo ma Falepuipui, ma le su’esu’eina o lenei mataupu.

E pei ona sa fa’alauiloa mai i luga o le Api o Fa’aaliga (Facebook) a le Minisita, le fa’ataunu’uina o se su’esu’ega faalotoifale faapea foi ma fafo atu, e tusa ai ma ala o le tulafono.

Ma i le taimi o lenei fa’aaliga, e le I ma’oti mai pe fia ni moliaga ua faia e faasaga i le leoleo Satini ma le aso o le a o’o ai lenei mataupu i luma o le fa’amasinoga.

MOLIA LE PULE O UAFU I NIU SILA INA UA MALIU SE ALII FAIGALUEGA I LUGA O LE UAFU  

I se lipoti mai a le RNZ (Radio New Zealand), ua lipotia mai ai le fa’auluina e le kamupani a le Maritime NZ ia se tagi e faasaga i le susuga ia Anthony “Tony” Gibson, lea sa avea ma pule o le uafu i le tausaga 2020, i le le fa’amalosia o le kamupani e tausia tulafono mo le tausia o le soifua maloloina ma le saogalemu, ae e le’i tula’i mai le fa’alavelave lea na maliu ai Pala’amo Kalati, i le tausaga ua mavae.

Na maliu Kalati, i le 31 o ona tausaga, a’o galue o ia i luga o le uafu, i le saisai o koneteine i ni u’amea.

O le po na maliu ai Kalati, e faapea, na pa’u mai iai se koneteina, a’o mau i le koneteina o lo’o ta’atia i lalo, ina ua piki e se ‘crane’.

E maliu Kalati, ae fa’ato’a lima masina talu ona faigaluega o ia i luga o le uafu, ae fa’ato’a tasi le masina talu ona ia faatinoina lenei tiute i le sifi po.

O lo’o finau le Maritime NZ, sa le’i faatinoina le tiute a Gibson e fa’aitiitia ai fa’alavelave tutupu mai, e a’afia ai le soifua maloloina ma le saogalemu o tagata i luga o le uafu.

Sa molimau foi se alii ua loa lona atamai i nei ituaiga galuega, le susuga ia John Riding mai i le Marico Marine, e faapea, e o’o lava i le tulafono , e le  mafai ona fa’amaonia ai le saogalemu o le eria faigaluega.