POU TIUTE A LEOLEO

Pago Pago - AMERIKA SAMOA

FUFUSU PAGOTA I LE FALEPUIPUI

O le 9:59 i le po o le Aso Lua, Oketopa 10, 2023 na fa’afeso’ota’i ai e leoleo o le falepuipui ia le ofisa a leoleo i Tafuna ona o se pagota, le susuga Joseph Mosegi, lea na masalomia i lona faaoolima i seisi pagota i totonu o le falepuipui.

Na agai atu leoleo mai i le ofisa a leoleo ma na faasino iai e leoleo o le falepuipui ia le pagota na a’afia i lenei faalavelave.  Na maitauina e leoleo le faamanualia o foliga o le pagota na a’afia.

Sa faamatala e lenei alii pagota i leoleo e faapea, sa agai atu i le ofisa autu a le falepuipui e ave se meaai ma leoleo o le falepuipui.  Ae o lona toe fo’i mai i lana sela, a’o tau saili lana ato tagamea, sa ia faalogoina ai le tatalaina o le faitoto’a u’amea o lona sela.

E fetaui lona liliu mai e vaai po o ai lea e i le faitoto’a, ae ta lona mata e le ua molia, i se moli uila o lo o ia u’uina.  Na lagona le niniva o le na a’afia ma saofai ai loa ai, ae na fa’aauau le gaioiga a le ua molia i le fasia o ia i le moli uila, ma palau vale atu ia te ia.

Sa ta’ua e le na a’afia i lenei faalavelave, e na te le o malamalama i le mafuaaga na fasi ai o ia e lenei pagota.

Ina ua taumafai leoleo e suesue ia le pagota ua molia, sa ia talosagaina sina taimi mo ia.  Sa ia ta’ua e faapea, e le o tonu lona mafaufau i lea taimi ona o lo o iai ni nai faalavelave tau i lona aiga o lo o vevesi ai lona mafaufau, lea na mafua ai ona ia faaoolima i le ua a’afia.

Ua molia nei Mosegi i le faaoolima I lona tulaga e tolu, ma e leai se tinoitupe o faatulagaina e mafai ona tatalaina ai o ia i tua. 

MOLIA SE ALII I LE FAAOOLIMA I LONA TOALUA

O le aso 2 o Oketopa i le 12 i le aoauli, na taunuu ai se telefoni i le ofisa a leoleo, mai i se tina o sailia se fesoasoani.  Sa ripotia e lenei tina i leoleo, le faaoolima o lona toalua, e suafa ia Levini Tavae, ia te ia, e ala i le togiina o ia i lana telefoni feaveai ma le tu’iina o lona mata.  E le gata i lea, sa ta’ua e lenei tina, le taufa’amata’u o ia i le oti, ma o le mafuaaga lea na ia valaau ai i leoleo mo se fesoasoani.

Ina ua taunu’u atu leoleo i Nu’uuli i le mea o tupu ai le faalavelave, na o latou maua atu le tina mafatia i le fale o lona tuaoi.  Sa faamatala e lenei tina, ua mafua ona sulufa’i i le fale o lona tuaoi, ona o lona fefe i le ita o lona toalua.

Sa faamatala foi e lenei tina i leoleo, ua alu ese lona toalua i totonu o lana taavale.  O lea na aveina atu ai loa lenei tina i le ofisa a leoleo i Tafuna mo le fa’aauauina o suesuega.  A o agai atu leoleo ma le tina, sa va’aia e le tina le ta’avale a lona toalua i se vaega o le alatele.

Na fa’atu e leoleo le ta’avale ma faatonuina ia Tavae, ina ia agai atu i le ofisa a leoleo.

I le ofisa a leoleo, sa faamatala ai e le tina na a’afia i lenei faalavelave e faapea, na amata mai i le aso Sa, na alu ai e faigaluega ae ta le 7 i le afiafi, ae alu atu lona toalua i lona fale faigaluega ma faatonu o ia e vave manava.

Sa ta’ua e le tina le ‘ava’avau atu o lona toalua ia te ia, e sau i fafo, a leai, o le a alu atu e faamalosi mai o ia i fafo.  O lea na tago ai loa lenei tina i lana ato ma savali mai i le la taavale, ona o lona fefe ina ne’i faia e lona toalua se tulaga i lana fale faigaluega.

Sa faamatala e le tina, ina ua o la taunu’u i le fale, sa fesiligia o ia e lona toalua pe aisea na le vave manava ai, ae e le i tali i lona toalua.  Ma o lo o talitonu le fafine, o le mafuaaga lea na ita ai lona toalua ma amata ona faia ni faamatalaga taufaamata’u, e faapea, o le a ia (tamaloa) fasiotia o ia (fafine) e pei o le fafine lea sa maliu i Mapusaga.  O iina na togi ai loa e le tamaloa ia lona toalua i lana telefoni feaveai.

Na fa’aauau le faamatalaga a le fafine e faapea, sa faatonu foi o ia e lona toalua e oso i totonu o le taavale, ma la agai atu loa i le fale faigaluega a le tamaloa.  Ina ua o la taunu’u, sa faatonu le fafine e lona toalua e oso i fafo ma le taavale, ma o iina na amata ona palauvale atu ai le tamaloa ia te ia ma fai atu i le fafine, e le o toe manao e la te toe nonofo.  Ma sa po ina foi e le tamaloa ia le itu taumatau o le foliga o le fafine, a’o la iai i le fale faigaluega a le tamaloa.

Sa faamatala foi e le fafine i leoleo e faapea, o le aso na soso’o ai, a’o ia sauni mol ana galuega, na faatonu ai o ia e lona toalua e nofo i le fale.  Ae ina ua tali mai iai le fafine, sa fasia o ia e lona toalua, ma o lea na ia sulufai ai lona i le fale o lona tuaoi ma fa’aaoga le telefoni a lona tuaoi, e valaau ai leoleo.

O le aso lava lea na ave faapagota ai le alii o Tavae ma sa ia faamatalaina i leoleo e faapea, ua toatamai tele i lona toalua, ona ua fa’aaoga e le fafine ia tupe a le la aiga, e aunoa ma sona iloa.  Sa te’ena e le tamaloa ia le ripoti e faapea, na ia togiina le fafine i lana telefoni, pe na ia po ina le fafine a’o la iai i le fale faigaluega a le tamaloa. 

Ua molia nei Tavae i moliga e lua o le faatupu vevesi i nofoaga faitele, o faitauga e lua i le faatupu vevesi i fale o aiga ia ma faitauga e tolu o le faaoolima.

E $1,000 lea ua faatonuina e ao ona totogi e mafai ai ona tatalaina Tavae i tua.