POU TIUTE A LEOLEO

Pago Pago - AMERIKA SAMOA

TU’UA’I E SE TINA LANA UO TAMA I LE FA’AO’OLIMA IA TE IA, I LUMA O LE LA MASAGA E TASI TAUSAGA

O le aoauli o le aso 19 o Mati, 2024, na valaau ai se tina i le Ofisa a Leoleo i Tafuna e lipotia lana uo tama, i lona fa’ao’olima ia te ia, i lo la aiga i Nu’uuli.

Ina ua taunu’u leoleo sa lokaina mai le ua molia ma e fa moliaga ua fa’asaga nei i lenei alii, e aofia ai

Faitauga 1:  Fa’ao’olima i le tikeri lona tolu – o se vaega ‘A’ o solitulafono mama, e mafai ona fa’asala ai se tasi, i le o’o atu i le tasi (1) tausaga i le falepuipui, po o se sala tupe e o’o atu i le $1,000; po o fa’asalaga uma e lua.

Faitauga 2:  Faatupu Vevesi i totonu o aiga – o se vaega ‘C’ o solitulafono mama, e mafai ona faasala ai se tasi, i le o’o atu i aso e sefululima (15) i le falepuipui, po o se sala tupe e i le va o le $150 ma le $1,000; po o fa’asalaga uma e lua.

Faitauga 3 & 4:  Faia o se gaioiga e ono a’afia ai le saogalemu o fanau iti – o se vaega ‘A’ o solitulafono mama, e mafai ona fa’asala ai se tasi i le o’o atu i le tausaga e tasi i le falepuipui, po o se sala tupe e le i lalo ifo o le $150; po o fa’asalaga uma e lua.

E $3,000 le tinoitupe fa’atulagaina e mafai ona tatalaina ai le ua molia mai i le falepuipui, e faatali ai lona faamasinoga.

(O le a le lomia suafa o i latou o lo’o a’afia i lenei mataupu, aua le puipuiga o fanau iti o lo’o a’afia).

E tusa ai ma faamaumauga a le malo, o lo’o ta’ua ai le kikiina e le ua molia, o le ulu o le tina ua a’afia i lenei fa’alavelave, lea na tiga ai lona ulu ma lona tau’au.  Ae peitai, sa ia te’ena le tautua a le vaega a le EMS.

Sa faamatalaina e le tina ua a’fia, i sana faamatalaga tu’ugutu ma tusitusia, sa tago e fafagu lana uo tama e sauni mo lana galuega, ae ta ona mata e lena uo tama i se mitiafu, a’o tilotilo atu sona alo e tasi le tausaga.

Sa ta’ua foi e lenei tina, le tu i lona o lana uo tama (lea ua molia) ma kiki lona ulu a’o saofa’i i luga o le moega ma o lea na ia valaau ai loa le ofisa a leoleo.

Sa fa’aalia foi e lenei tina, o se mataupu e tupu so’o, i so’o se taimi e tago ai e fafagu le ua molia, e sauni i lana galuega.

Ina ua fa’atalanoaina e leoleo ia le ua molia, sa ia faamatalaina lona to’atama’i lana uo teine ona o le fafaguina o ia.  E le gata i lea, sa ia lagonaina le valaau a lana uo teine i lona tina (tina a le ua molia), ma ta’u iai lona fa’atupu faalavelave talu ona o la nonofo faatasi.

Ma o lona to’atama’i tele, na ia kikiina ai le ulu a lana uo teine, a’o saofa’i i luga o le moega, a’o tilotilo atu le la masaga e tasi tausaga.

MISA SE ULUGALII INA UA MASALOMIA LE MAUA E LE TINA IA NI FUALAAU FA’ASAINA I TOTONU O LE LATOU FALE

E tusa ai ma faamaumauga a le malo, i le afiafi o le aso 2 o Mati, 2024 na agai atu ai leoleo i le fale o se aiga i Fagatogo, ina ua tula’i mai se vevesi i le va o le ulugalii, ina ua molia mai le mauaina e le tina o le aiga, ia ni fualaau faasaina i lo latou fale.

Ina ua taunu’u leoleo, sa tuuina iai ia nei fualaau faasaina, ae lokaina mai ai le tama o le aiga, ma molia i le moliaga e tasi o le Umia Fa’atulafonoina o vaega o Fualaau Faasaina (Aisa) – o se solitulafono mamafa, e mafai ona faafalepuipui ai se tasi i le va o le lima (5) ma le sefulu (10) tausaga, po o se sala tupe e i le va o le $5,000 a le $20,000; po o faasalaga uma e lua.

E $5,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona fa’asalaga.

O lo’o ta’ua foi i fa’amaumauga a le malo, le tu’uina atu e le tina o le aiga, i leoleo, ia se paipa mata’eta’e e iai se vaega o fualaau faasaina ma se afi (lighter).

Sa faamatalaina e le tina o le aiga i leoleo, lona popole tele i le saogalemu a lana fanau teine e toatolu ona o uiga taufa’amata’u a lona to’alua, aemaise lava le a’afia ai o fualaau faasaina.

Sa ia fa’aalia foi i leoleo, ua atoa le tausaga e le o toe fetautalaa’i i la’ua ma lona to’alua, e ui lava o lo’o nonofo i le fale e tasi.

Ma na ta’ua e le tina, e le o se taimi muamua foi lea ua pisa ai lo la aiga, ona o lona mauaina o paipa, ‘straws’ ma tama’i taga pepa i’ila i totonu o le latou fale.

E ui ina faamagalo so’o e le tina ia lona toalua ma tu’uina iai le tele o avanoa e sui ai, sa ta’ua e le tina le fua o lona toalua ma o’o ai lava i le taumulimuli atu ia te ia, i lona fale faigaluega.  Sa ia ta’ua foi le faamaina o ia e lona to’alua i luma o tagata e latou te galulue faatasi.

Sa faamatala e le tina lona mauaina o se taga pepa i’ila (ziplock) i totonu o le la potu, o iai se paipa mata’eta’e ma se afi (lighter) i tafatafa o le mea sa moe ai lona toalua.  Ae ina ua ia fesiligia lona to’alua e uiga i nei mea, sa le tali atu lona to’alua, ae ua alu ma fa’amaa’i se agaese.  Ma ona o le fou o lea mea i le va’aiga a le tina a le aiga, ma lona popole tele i le saogalemu a nai ona alo tamaitai.

O le aso lava lea na su’esu’e ai e leoleo ia meatotino na maua mai i le fale a le ulugalii, ma fa’amaonia ai le iai o se vaega o fualaau faasaina, o le Aisa.

I le fa’atalanoaga a leoleo ma le ua molia, sa ia tete’e ai i le molimau a lona to’alua, ae sa ia faamaonia, o ia e ana mea totino sa maua i le la potu.  Sa ia faamaonia lona tagofia o se vaega o fualaau faasaina, o le Aisa, lea na tu’uina atu ia te ia, e nisi o ana uo mai i le latou fale faigaluega.