POU TIUTE A LEOLEO

Pago Pago - AMERIKA SAMOA

LOKA SE ALI’I 20 TAUSAGA I LE MOE SESE

E tusa ai ma fa’amaumauga a le malo, o le aso 14 o Mati, na vala’au ai se tamaitai i le Ofisa a Leoleo i Tafuna e lipotia se alii e le masani ai, o lo’o moe i totonu o le fale a lona tuagane, i le afioaga o Iliili.

I le su’esu’ega a leoleo, sa faamatala ai e lenei mafine le tele o lipoti a ona tuaoi e uiga i le fale a lona tuagane, lea e tele ina osofaia e fanau talavou faapea ma se tagata matua, e suafa ia Iaopo.  Sa ta’ua e le fafine le tu’ufua o le fale a lona tuagane, ona o lo’o lipeaina, ae o lo’o osofaia so’o e le au talavou.

Sa aga’i atu leoleo i le fale i Iliili, ma maua atu ai le alii talavou, e suafa ia Sila Malae, o lo’o moe mai i totonu.

Sa lokaina mai ai loa o ia ma tu’uina i totonu o le taavale a leoleo.

Ina ua fa’atalanoaina e leoleo ia Malae, sa ia faamatala e faapea, na faatonu o ia e Iakopo e la te momoe i le fale a lona aiga.  Na musu o ia, ae sa tauanau pea o ia e Iakopo, ona e musu e moe to’atasi i le fale.

Sa talitonu Malae i faamatalaga a Iakopo, ma ia moe ai loa i le fale.  Ae o le taeao po lava na ia fa’alogoina ai le matala o le faitotoa ma ia valaau atu ia Iakopo, ae leai seisi na tali mai, ma o lea na ia toe moe ai, seia taunu’u atu leoleo.

Ua molia nei Malae i le Solivale o fanua a isi, o se vaega ‘B’ o solitulafono mama, lea e mafai ona nofosala ai se tasi i le falepuipui, i le o’o atu i le ono (6) masina, po o se sala tupe e $500; po o fa’asalaga uma e lua.

E $500 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona fa’asalaga.

MOLIA SE ALII TALAVOU I LONA FA’AO’OLIMA I SE FAFINE E LA TE GALULUE FAATASI

O le aso 15 o Mati, 2024 na valaau ai se tasi o le aufaigaluega a le McConnell Dowell, i le Ofisa a Leoleo i Tafuna, mo se fesoasoani.

E tusa ai ma faamaumauga a le malo, sa ta’ua ai le fa’ao’olima o se alii 19 tausaga, e galue i le McConnell Dowell, e suafa ia Stone Filisi, i se fafine e la te galulue faatasi.  Sa ta’ua foi e le na valaau i leoleo, le tu’ua e Filisi o le latou fale faigaluega.

Sa faatonuina loa e le ofisa a leoleo ia le na valaau atu, e ave atu le mafine na tupu ai le faalavelave i lo latou ofisa i Tafuna, ae o le taimi lea na agai atu ai leoleo e saili mai Filisi.

Na taunu’u fa’atasi le fafine na a’afia i lenei mataupu ma lana supavaisa, po o le molimau i le fa’alavelave na tupu, i le ofisa a leoleo.  Sa fautuaina e leoleo ia le fafine ina ia se’i togafitia o ia e le vaega a le EMS, ae peitai, sa tete’e le tamaitai ma e le i va’aia foi e leoleo ni manu’a i lona tino.

Sa fa’atalanoaina e leoleo ni molimau se to’alua o lenei fa’alavelave (o le lona lua o molimau, o le tamaitai na a’afia i lenei mataupu) ma sa ta’ua e le molimau muamua, le fa’ate’ia o le na a’afia, i le ta ina o ia e Filisi, i lona pulou faigaluega.  Sa faamatala foi e le molimau, sat u o ia i tua o Filisi i le taimi na ta ai e Filisi le ua a’afia.

Ae na faamatala e le molimau lona lua e faapea, sa savali atu Filisi ia te ia, ma fa’alala atu lona lima ia te ia, ma faafetai atu ia te ia, mo mea uma.  Ina ua fesiligia e le molimau ia Filisi i le uiga o lana faamatalaga, ae peitai, sa le tali mai Filisi, ae na fa’ate’ia o ia ina ua tau le ta a Filisi i ona foliga.

O le afiafi o lea lava aso, na pu’eina ai e leoleo ia Filisi ma fa’atalanoaina ai o ia.  Ma sa faamatala e Filisi, o le 12 i le aoauli, na ia alu ese ai ma le latou fale faigaluega ma agai atu i se faleoloa, ma faatauina mai ai ni apa pia se lua.  Ina ua uma ona inu ana pia, na ia toe fo’i loa i le fale faigaluega.

Sa ta’ua e Filisi lona le fiafia i le tele o galuega sa tu’uina atu e le ua a’afia, ia te ia.  Ma sa atili ai ona le fiafia, ona o le faatonuina o ia i le tele o galuega, ae o lo’o nofonofo ia la’ua ia na avea ma molimau, e aofia ai le na a’afia.

Ua molia nei Filisi i le Fa’ao’olima i lona tulaga e tolu, o se vaega ‘A’ o solitulafono mama, lea e mafai ona nofosala ai se tasi i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E $1,000 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.