POU TIUTE A LEOLEO

Pago Pago - AMERIKA SAMOA

AVE FAAPAGOTA SE TAMALOA 32 TAUSAGA I MOLIAGA O LE FA’AO’OLIMA I LONA TO’ALUA MA’ITAGA

E tusa ai ma faamaumauga a le malo, ua molia nei le susuga ia Lane Levi ona o se fa’alavelave na tula’i mai i le aso 4 o Mati, 2024, ina ua lipotia o ia e se mafine i le Ofisa a Leoleo i Tafuna, i lona molimauina o se tamaloa, o fasi se fafine i luma o le fale fa’atali pasi i tafatafa o le fale su’isu’i a Marie i Nu’uuli.

Ina ua taunu’u leoleo, sa faamatalaina e se ave taxi sa tu lana ta’avale la’u pasese i tafatafa o le fale a se aiga i Nu’uuli, sa fa’ao’olima se tamaloa i sona to’alua.

Ma e tusa ai ma faamaumauga a leoleo, sa lokaina mai e leoleo ia Levi ma aveina atu i le latou ofisa i Tafuna, ma sa faapea foi ona aveina atu ai ma le to’alua a Levi i le ofisa a leoleo ina ia mafai ona togafitia e le vaega a le EMS ona o ni manu’a i ona foliga ma lona tino.

I se faatalanoaga a leoleo ma le tina ua a’afia i lenei mataupu, sa ia faamatalaina lona fa’atalitali mo lona to’alua (le ua molia) o lo’o sau i se pasi, e fa’afetaui o ia i le magatolu i Nu’uuli lea e i tafatafa o le ofisa a le McDonald’s.

Ina ua taunu’u Levi i lea nofoaga, sa fa’ailoa atu iai e lona to’alua, o le a alu e nonofo ma lona tina, ua mae’a ona ia faamatalaina i ona matua le fasiga o ia e Levi, i le aso To’onai ma le aso Sa, i lona (Levi) aiga.

Ae peitai, na avea le faamatalaga a le tina ma tulaga na ta ai ona foliga e Levi, i le faamalu sa ia u’uina ma fai atu ia te ia (tina), e le alu i se mea, ona ia (Levi) taumafai lea e titina le ua o lona to’alua ma tatu’i o ia.  Sa faapea foi ona mau Levi i le lauulu o lona to’alua ma toso mai ma fai iai, e le alu i se mea.

Na fa’amaonia mulimuli ifo i su’esu’ega, le atoa o le 4 masina o le ma’itaga, o le to’alua a Levi.

Ae ina ua fa’atalanoaina e leoleo ia Levi, sa ia te’ena ia faamatalaga e faapea sa ia fa’ao’olima i lona to’alua, ae sa ia ta’ua e faapea, sa ia u’uina o ia, ona ua to’atama’I, ae e na te (Levi) le’i fa’ao’o se tiga ia te ia.

O moliaga o Levi, e aofia ai le Fa’atupu Vevesi i Nofoaga Lautele – o se vaega ‘C’ o solitulafono mama, lea e mafai ona fa’afalepuipui ai se tasi, i le o’o atu i aso e sefululima (15), o se sala tupe e i le va o le $150 ma le $300; po o fa’asalaga uma e lua.

Atoa ai ma le moliaga o le Fa’ao’olima i lona tulaga e tolua – o se vaega ‘A’ o solitulafono mama, lea e mafai ona nofosala ai se tasi i le falepuipui, e o’o atu i le tasi (1) tausaga, po o se sala tupe e i le va o le $150 ma le $1,000; po o fa’asalaga uma e lua.

E $10,000 le tinoitupe faatulagaina e mafai ona tatalaina ai le ua molia mai i le faamasinoga, e fa’atali ai lona faamasinoga.

LOKAINA SE ALII MA MOLIA I LE FA’AO’OLIMA MA LONA TAOFIOFIA O LANA UO TEINE

O lo’o ua ta’ua i fa’amaumauga a le Ofisa a Leoleo, le lokaina mai o le susuga ia Taoipu Poasa ona o se fa’alavelave sa tula’i mai i le aso 28 o Fepuari, 2024 lea o lo’o masalomia ai o ia i lona fa’ao’olima i lana uo teine, o Valasi Togia’i, i Pava’ia’i.

O lo’o ta’ua i fa’amaumauga a leoleo, le o’o atu lava o Togia’i i lo latou ofisa, e fa’aulu lana tagi e fa’asaga ia Poasa ma sa ia faamatalaina i leoleo, sa tupu lenei fa’alavelave a’o sauni i le galuega i le 5:00 i le taeao o Fepuari 28.

 Sa molimau Togia’i, na fai se la tauga’upu ma Poasa ma sa palauvale leotele Poasa ma lau lona (Togia’i) pepelo.  Sa fesiligia foi e Poasa le mafua’aga o le tele o lavalava a Togia’i e ave i lana galuega.  Lea sa faamanino iai e Togiai, o ona lavalava e sui ai pe a manava, ona e alu i le Ofisa Lafoga i le EOB< e faila lana lafoga.  Ae peitai, sa le talitonu le alii o Poasa.

Na ta’ua foi e Togia’i, a’o savali atu i luma o le latou fale i Pava’iai, na taumafai Poasa e tu’i o ia i se ma’a sa i tafatafa o le auala, ae o lo’o fa’aauau ona palauvale atu ia te ia.  E le gata i lea, sa faapea foi ona taofiofi o ia e Poasa ma fa’atonu o ia, e aua ne’i alu i se mea.

Sa faamatala foi e Togiai, na amata ona fasi o ia e Poasa, talu ona nofo i lo latou fale.

Sa fa’ailoa e Togiai i leoleo le fale faigaluega a Poasa, ma sa faapea loa ona agai atu iai leoleo ma lokaina mai ai o ia.

O lo’o ua molia nei Poasa i moliaga e tolu;

1. Fa’atupu Vevesi i totonu o aiga – o se vaega ‘C’ o solitulafono mama, lea e mafai ona nofosala ai se tasi i le falepuipui, i le o’o atu i aso e sefululima (15), o se sala tupe e  i le va o le $150 ma le $300; po o fa’asalaga uma e lua.
2. Fa’ao’olima i lona tulaga e tolu – o se vaega ‘A’ o solitulafono mama, lea e mafai ona nofosala ai se tasi i le falepuipui i le o’o atu i le tausaga e tasi (1), po o se sala tupe i le va o le $150 ma le $1,000; po o fa’asalaga uma e lua.
3. Taofiofi Sese o se tagata – o se vaega ‘A’ o solitulafono mama, lea e mafai ona nofosala ai se tasi i le falepuipui, i le o’o atu i masina e sefululua (12), po o se sala tupe e o’o atu i le $1,000; po o fa’asalaga uma e lua.

E $1,000 le tinoitupe faatulagaina e mafai ona tatalaina ai le ua molia mai i le falepuipui, e faatali ai lona fa’amasinoga.