POU TIUTE A LEOLEO

Pago Pago - AMERIKA SAMOA

SULUFA’I SE TINA I LUGA O ‘API O FOLIGA’ (FACEBOOK) MO SE FESOASOANI

O le aso 25 o Fepuari, 2024 na valaau ai se mafine i le Ofisa a Leoleo i Tafuna (TPS) ma fa’amatala i leoleo le fa’afeso’ota’i atu o ia e sana uo i luga o lana ‘Api o Foliga’ (Facebook) ina ia valaau leoleo e lipoti iai le sauaina o ia e lona to’alua.

(O le a le lomia e le Samoa News suafa o i latou ua a’afia i lenei mataupu, aua le puipuiga o fanau o lo’o a’afia).

E tusa ai ma fa’amaumauga a le malo, ina ua taunu’u leoleo i le nofoaga na tupu ai le faalavelave, sa fa’afetaui mai e le tina ua a’afia, ia leoleo ma o latou lokaina mai ai le ua molia (le to’alua a lea tina), mai i totonu o le potu sa moe ai.

Sa faatalanoaina e leoleo ia le tina o lo’o a’afia i lenei mataupu, i lona maota, ma sa ia faamatalaina i leoleo lona fo’i atu i le fale mai i sauniga lotu ma fesiligia lona to’alua pe sa ia kukaina se mea’ai, ae ua le tali lona to’alua.  Ae ina ua alu atu le tina e fa’amama ipu, o iina na amata ai ona ‘ava’avau atu lona toalua ia te ia.

Sa faamatala e le tina le amataina o se la tauga’upu ma i’u ai lava ina ta lona ulu e lona to’alua i se ‘lighter’ umi, faapea ma le tatu’iina o ia, lea na manu’a ai lona lima tauagavale.  Ma sa ta’ua foi e lenei tina, le fa’afefeina o ia e lona to’alua i se naifi.

Na ta’ua e lenei tina le tupu so’o o lenei tulaga i le va o ia ma lona toalua.

Sa fa’atalanoaina foi e leoleo ia se fanau e to’alua a le ulugalii ma na fa’amatalaina e le alii e 11 tausaga (molimau #1) e faapea, na ia lagona mai i lana ta’elega ia le tauga’upu a ona matua.  Ma e tamo’e mai, o lo’o fasi atu e lona tama ia lona tina.

Ma o lea na u’u ai e lenei atalii ia ni apa se lua ma togi ai se fa’ata ma le faamalama.  Ona toe tamo’e lea e fai ona la’ei ma o latou tamomo’e mai i fafo ma nai ona tei ma lona tina, ae o le taimi lea na tau’ai mai ai i latou e lona tama i se la’au ma se avoka.  Sa ta’ua foi e le atalii le manu’a o le ulu a lona tina ma le toto o lona gutu.  Ma na ta’ua foi e le atalii lea, lona lagonaina o  faamatalaga taufa’afefe a lona tama e fa’asaga i lona tina.

I le molimau tusia a le atalii lona lua, e sefulutolu (13) tausaga) na amata le fe’ese’esea’iga a ona matua ina ua fai atu le tina o le aiga, i lona to’alua, e talanoa i lona tuafafine (tuafafine a le ua molia) ina ia fesoasoani i le totogia o le pili o le vai on aua silia ma le masina, o fa’aaogaina e le tuafafine ia le latou suavai.

Sa ta’ua e le atalii 13 tausaga, le amata ona ‘ava’avau o lona tama ma i’u ai lava ina pa’ilima ona matua.  Sa fa’amatala e lenei atalii le ta ina e lona tama o le ulu a lona tina ma fa’aleaga meatotino i totonu o le latou fale.  Sa ia ta’ua foi le taumafai o lona tina e taofiofi lona tama, ae peitai, na fa’aauau pea ona tau’ai e lona tama ia lona tina, i mea i totonu o le fale.

Sa fa’aalia e lenei atalii lona faanoanoa tele i lona va’aia o manu’a i le ulu ma le lima o lona tina.  Sa ta’ua foi e lenei atalii le tu’ua e lona tama, o le latou fale, ina ua mae’a ona ia sauaina le tina, ae na toe fo’i atu ina o le a moe le atalii.

O se taimi mulimuli ane, na fafagu ai o ia e lona tina ma e le’i umi ae taunu’u loa leoleo.

Sa ta’ua foi e lenei atalii e faapea, e le o se taimi muamua lenei ua osofaia ai e lona tama ia lona tina ma faafefe o ia i se naifi, faapea ma le fa’aleagaina o mea totino i totonu o le latou fale.

Ina ua fa’atalanoaina e leoleo ia le ua molia, sa ia faamatalaina le amata o le la misa ma le tina o le aiga, ina ua mana’o e fa’aaoga le ‘laptop’ lea sa matamata ai le latou ata ma lana fanau.  O le musu o le ua molia e tu’u atu i lona to’alua ia le ‘laptop’ na faapea ona palauvale mai ai lona to’alua ia te ia.  Ma na mafua ona o’o lona lima i lona toalua, ona sa po o ia e lona toalua.

Sa fa’amaonia e le ua molia ia lona fa’aaogaina o se ‘lighter’ umi e ta fa’alua ai le ulu a lona to’alua, ae na mafua lea tulaga, ona sa ta o ia e lona to’alua i se masini e fa’amago ai lauulu.  Sa faamaonia foi e le ua molia, le tupu so’o o nei tulaga i le va o ia ma lona to’alua.

E lua moliaga ua molia ai lenei tama, e aofia ai le Faatupu Vevesi i totonu o Aiga ma le Fa’ao’olima i lona Tikeri e Tolu.

O le moliaga o le Faatupu Vevesi, o se moliaga i le vasega ‘C’ o solitulafono mama, ma e mafai ona faasala ai se tasi i le falepuipui, i le o’o atu i aso e sefululima (15), po o se sala tupe e $300; po o fa’asalaga uma e lua.

O le moliaga o le Fa’ao’olima, o se moliaga i le vasega ‘A’ o solitulafono mama, lea e mafai ona nofosala ai se tasi i le falepuipui, i le o’o atu i tasi (1) tausaga, po o se sala tupe e $1,000; po o fa’asalaga uma e lua.

E $1,000 le tinoitupe faatulagaina e mafai ona tatalaina ai le ua molia, e fa’atali ai lona faamasinoga.

RAIMO TOILOLO

Ua molia nei se alii e 38 tausaga, e suafa ia Raimo Toilolo, i le faatupu vevesi i totonu o aiga faapea ma le fa’ao’olima, ona o se fa’alavelave na tula’i mai i le aso 27 o Fepuari, 2024, ina ua fa’afeso’ota’i e se mafine le Ofisa a Leoleo i Tafuna, ma lipotia ai le fa’ao’olima o Toilolo ia Mafoe Ihuka.

E tusa ai ma faamaumauga a leoleo, ina ua taunu’u leoleo i le nofoaga na tupu ai le faalavelave, sa faamatalaina e le mafine lea na valaau i le ofisa a leoleo, lona fa’alogoina o ona tuaoi, o valaau mai mo se fesoasoani.  Ma o lo’o taofiofi e le ulugalii na a’afia i lenei mataupu, ia Toilolo, i fafo o le la fale.

Sa faapea ona lokaina mai e leoleo ia Toilolo ma aveina atu o ia i le ofisa a leoleo i Tafuna mo le suesueina.

Na valaau foi e leoleo ia le vaega a le EMS ma aveina atu ai Ihuka i le falemai mo togafitiga.

I le fa’atalanoaga o Ihuka, sa ia faatamalaina ai i leoleo, le tu’ua e Toilolo o le latou fale i le taeao, ae na toe fo’i atu i le 10:30 o lea lava aso.  Ma sa ia faatonuina Toilolo e teu ona lavalava ma alu e su’e seisi fale e nofo ai, ona ua mumusu le aiga e ana le fanua, e toe nofo Toilolo i lo latou fanua.

Ae peitai, na avea lea ma tulaga na to’atama’i ai Toilolo ma oso i le to’alua a Ihuka.  Sa faamatala e Ihuka lona oso atu ma tu i le va o lona to’alua ma Toilolo, ae u’una’i o ia e Toilolo ma tatu’i le itu tauagavale o lona ulu.

Sa faamatala foi e Ihuka i leoleo, ua ova ma le masina o latou nonofo faatasi ma Toilolo.

O le moliaga a Toilolo i le Faatupu Vevesi i totonu o aiga, o se vaega ‘C’ o solitulafono mama, lea e mafai ona fa’asala ai se tasi i le falepuipui i le o’o atu i aso e sefulu ma le lima (15), po o se sala tupe e $300; po o fa’asalaga uma e lua.

O le moliaga o le Fa’ao’olima i lona tikeri e tolu, o se vaega ‘A’ o solitulafono mama, ma e mafai ona fa’asala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E $1,000 le tinoitupe faatulagaina e mafai ona tatala ai le ua molia mai i le falepuipui, e faatali ai lona fa’amasinoga.