POU TIUTE A LEOLEO

Pago Pago - AMERIKA SAMOA

SOLA SE ALII PAGOTA

O le taeao o le aso 27 o Setema, 2023, na feiloai ai le pule o leoleo, le susuga Pouu’amea Tuaolo Supapo ma le Faatonusili o Falepuipui, e sualaupuleina se mataupu e faasaga i le alii pagota o Tauagiga Taele, lea na sola mai i le falepuipui.  Sa mafai ona o la o’o atu i le fale faamasino e talanoa i le Masela o faamasinoga, e faamanino mai, pe na faapefea ona sola Taele.

Na mafai ona o la matamata i se ata vitio, le sola o Taele mai i le faitotoa e agai atu i tua o fale faamasino e lua, ma agai atu ai i le maketi.

Sa faamatala e le Masela o le fale faamasino, na alu Taele e fa’aaoga le fale le ta’ua ma o le mafua’aga lea na tatala ai le loka sa i leisi ona lima.  O le fo’i mai o Taele na sola ai loa i le faitoto’a lea e fa’aaoga i taimi o fa’alavelave faafuasei.

Sa taumafai leoleo e saili le alii pagota i Fagatogo, ae peitai, sa le i mauaina o ia.  O le alii pagota o Taele, e malaga mai i Taputimu.

NA FAAI’U SE MISA A SE AIGA I LE FALEPUIPUI

O le afiafi o le aso 28 o Setema, 2023, na valaau ai se alii i le ofisa a leoleo i Fagatogo, mo se fesoasoani, ona o lona uso laititi o lo o faatupu vevesi i lo latou nu’u i Fagatogo.  Na ta’ua e le na valaau i leoleo, le misa a lona uso laititi ma lana uo teine i totonu o le la potu, ma na i’u ai lava ina o’o ai lona lima i lana uo teine.

Na ta’ua e le uso matua lea na valaau i le ofisa a leoleo, sona popolega ona o lo o iai ni fanau iti se toatolu i le fale, a’o misa lona uso laititi ma lana uo teine. 

Sa faamatala e le uo teine, na faalogo o lo o su’e e le uso a lana uo tama ia lona afafine, lea sa o ma lana uo tama i le faleloa.  O le mea lea na ia savali ai loa agai i le faleoloa e fai i lana uo tama, o la e su’e e lona uso ia lona afafine, ae peitai, e alu atu i le faleoloa, e le o iai nisi.

Sa ta’ua e le uo teine, ina ua toe fo’i atu i le fale, na ia va’aia lana uo tama ma le afafine a lona uso matua.  Ae faate’ia o ia ina ua faatonu o ia e lana uo tama e teu lana ato ma alu ese ma le fale, ma amata ona palauvale atu lana uo tama.

Ae peitai na musu le uo teine.  O le mea lea na agai atu ai loa lana uo tama ma tauai ana mea totino i fafo ma le fale ma amata ona fasi lana uo teine.  O le lagona mai e tuaoi o le vevesi, na o latou o mai ai e va’ai po o le a le me aua tupu.

Sa faamatala e le uso matua, na amata mai le misa a lona uso laititi ma lana uo teine, i totonu o le la potu, ae faai’u mai i le potu malolo, le mea lea na iai tamaiti.  Na ta’ua foi e le uso matua lona masalomia lona uso laititi i fualaau faasaina, ona o lana amio i lea aso.

E tusa ai ma isi ripoti, na ta’ua ai le e’e o le uso laititi i tamaiti sa i totonu o le fale.  Ma sa taumafai le alii matua e tau fa’ato’ato’a lona uso laititi.  Ae peitai, sa faasaga atu le alii laititi ma faaleaga ni mea totino i totonu o le fale.  Ma o lea na ave ai e le tama matua ia lana fanau ma ave i le fogafale lona lua o le fale.

Na o’o atu leoleo ma ave faapagotaina le alii o Lorenzo Vaimagalo, ae peitai, sa musu le alii e fai sana faamatalaga.

O lo o ua molia nei o ia i le faatupu vevesi, o le faaoolima i lona tulaga e tolu faapea ma le faia o ni amioga e ono afaina ai ni fanau iti.

E $500 le tupe faatulagaina e mafai ona tatalaina ai Vaimagalo.

LOKA SE ALII I LONA SUSUNUINA O LE FALE A LONA ‘AUNTY’

I le aoauli o le aso 30 o Setema, 2023, na ripotia atu ai i le vaega tineimu se fale o mu i le afioaga o Vaitogi.  Sa muamua taunuu le vaega tinemu e taumafai e tineia le afi, ae e le i taunu’u leoleo.  Na iai foi i le mea na tupu ai le faalavelave ia le tina e ana le fale sa mu.

Sa ia faamatala i leoleo, sa ia otegiaina sona ‘nephew’, ae e le i umi ae ona faalogoina se valau ua mu lona fale, ae ua sola lona ‘nephew’.

O le ‘nephew’ a lenei tina, o le alii o Tavita Wilson ma sa faatonuina le tina e ana le fale na mu, ina ia aveina atu Wilson i le ofisa a leoleo ina ia faatalanoaina. O le ta o le 7:36 i le afiafi lava lea, na maua ai se valaau a leoleo i Tafuna, o lea ua toe fo’i ifo Wilson i le fale ma o le a agai atu i le ofisa a leoleo.

Sa faamatala e le tina ua mu lona fale, na faamaonia e Wilson ia te ia ma lona aiga, o ia sa susunuina le fale, ae na te le iloa pe aisea.  

I le 8:24 i lea lava afiafi, na taunuu ai Wilson i le ofisa a leoleo ma ia faamaonia i luma o leoleo, o ia sa na faatupuina lenei faalavelave ona o lona ita i lona ‘Aunty’ i le otegiaina o ia.  Sa musu Wilson e tusitusia sana faamatalaga e tusa ai ma lenei faalavelvae, ma lokaina ai loa o ia.

Ua molia nei Wilson i le susunuina o le fale faapea ma le faaleagaina o mea totino a isi.

E $5,000 le tupe faatulagaina e mafai ona tatalaina ai i tua Wilson.