POU TIUTE A LEOLEO

Pago Pago - AMERIKA SAMOA

GAOIA SE FALEOLOA E NI PAGOTA SOSOLA

E ono (6) moliaga ua tu’ua’ia ai nei ia se alii pagota na sola ese mai i le falepuipui, ma gaoia se faleoloa a’o taofi faapagota le faatauoloa.

O nei moliaga e aofia ai le:

Faitauga 1:  Faomea i lona tulaga muamua – Vaega ‘A’ o solitulafono mamafa, e mafai ona soloatoa ai se tasi i le falepuipui, po o  le va o le 10 ma le 30 tausaga.

Faitauga 2:  Talepe Fale i lona tulaga muamua – Vaega ‘B’, o solitulafono mamafa, e mafai ona lokaina ai se tasi i le va o le lima (5) ma le sefululima (15) tausaga.

Faitauga e 3 & 4:  Gaoi – Vaega ‘C’ o solitulafono mamafa, e mafai ona nofosala ai se tasi i le falepuiupi, i le o’o atu i le fitu (7) tausaga, po o se sala tupe e $5,000; po o fa’asalaga uma e lua.

Faitauga e 5:  Sola mai i le falepuipui – Vaega ‘A’ o solitulafono mama, e mafai ona faafalepuipui ai se tasi i le le silia ma le tasi (1) tausaga, po o se sala tupe e le silia ma le $1,000; po o fa’asalaga uma e lua.

Faitauga e 6:  Fa’ao’olima i lona tulaga e tolu – e nofosala ai se tasi i le falepuipui i le le silia ma aso e sefululima (15), po o se sala tupe e le silia ma le $300; po o fa’asalaga uma e lua.

E tusa ai ma faamaumauga a leoleo, o le vaveao o le aso 3 o Ianuari, 2024 na gaoia ai e David Fo’a ia le faleoloa o le Airport Way ma ia fa’afefe le faatau oloa i se kolopa.  Sa taumafai le fa’atau oloa e se’i ese le kolopa mai ia Fo’a, ma i le la tauiviga ma Fo’a na afaina ai le a’ao a le faatau oloa.  Sa faapea loa ona tamo’e atu Fo’a ma se’i mai le masini tupe a le faleoloa ma sola ma ia.

Na valaau loa le pule o le faleoloa i le Ofisa a Leoleo i Tafuna.  Ma i se faatalanoaga a leoleo ma le faatauoloa, sa faamatala e le faatauoloa, na faatali ia Fo’a se’ia leai seisi i totonu o le faleoloa, ona ia alu atu ai lea ma le kolopa ma faafefe ai o ia.  Sa faamatala foi e le faatauoloa le la tauiviga ma Fo’a i le kolopa, ma afaina ai lona lima. Ona alu loa lea o Fo’a ua se’i le masini tupe ma la sosola ma seisi alii na la o atu faatasi, lea sa faatali atu i fafo o le faleoloa.

Sa aveina e leoleo ia le ata vitio sa pu’eina e le mea pu’eata a le faleoloa, e faamaonia ai po o le tagata fo’i lea o lo o masalomia i le osofaiga o isi faleoloa, lea e latalata atu i le Airport Way.

Na faamaonia ai foi i le ata vitio a le faleoloa, o Fo’a ma le alii lea sa faatalitali i fafo, o pagota uma ia sa lokaina i le to’ese i Tafuna, lea na sosola ese mai i le falepuipui, i le taeao lava lea e tasi.

Sa fa’afeso’ota’i e leoleo ia le falepuipui i Tafuna, ma na fa’amaonia mai ai le iai o ni pagota se to’atolu, e aofia ai ma Fo’a, sa sosola ese mai i le falepuipui.

Sa faapea loa ona fesoasoani leoleo i le sailiga o Fo’a ma isi pagota e to’alua, i nofoaga e latalata i le falepuipui ma maua ai Fo’a o lo o lafi i lalo o ni apa o se fale i tua o le fale a tuaoi.  Sa taumafai le alii o Fo’a e sola ese ma leoleo, ae na mafai ona pu’eina o ia ma toe fa’afo’i atu i le falepuipui.

E ui ina sa musu Fo’a e fai sana molimau tusitusia ina ua taunu’u ma leoleo i le Ofisa a Leoleo, ae peitai, o lo o ta’ua i faamaumauga a leoleo, a’o faatalitali mo le vaega a le EMS, sa fa’ailoa atu e Fo’a i leoleo isi pagota ia na latou sosola, lea e aofia ai Wayne Gasolo ma Joeita Fa’alogo.  Ma o Gasolo lea sa maua lona ata i luga o le vitio a le faleoloa, o lo o fai sona ofu lanumumu, ma o ia lea na fa’atali i fafo o le faleoloa.

O le aso lava lea, sa su’esu’eina ai e leoleo ia le pule o le faleoloa i tau o le masini tupe ma le aofaiga o le tupe sa iai i totonu.  Sa ta’ua e le fa’atauoloa, e pe a ma le $3,000 tupe Amerika, sa i totonu o le masini, ae o le tau o le masini, e pe a ma le $1,000 tupe Amerika.

Sa mafai foi ona fa’atalanoaina e leoleo se molimau sa pasi atu ma le faleoloa, ae ona va’aia le tu’uina atu e se alii o lo o la’eiina se ofu lanu efuefu, ia se masini tupe, i se alii ofu lanumumu sa i fafo o le faleoloa.  Ona o la tamomo’e lea i leisi itu auala i le faleoloa o le Coco Mart, ae na toe fo’i mai leisi alii ma sui ona la’ei i la’ei papa’e.

VEVESI I SE FALE FAIGALUEGA

O le aso 3 o Ianuari, 2024 na valaau ai se alii e faigaluega i le kamupani a le Paramount, i le ofisa a leoleo i Tafuna, e lipotia le susuga ia Jerry Malaga, lea na alu atu i lona fale faigaluega ma faamisa atu ia te ia.

Sa aga’i atu leoleo i le lotoa a le Paramount ma talanoa ma le alii lea na lu’iina e Malaga, ma sa ia faamatalaina i leoleo, sa faate’ia o ia ina ua alu Malaga i totonu o le lotoa faigaluega, ae o lo o fa’asuaava.  Ina ua fai atu iai le na a’afia, ia Malaga, e fa’asa le lotoa, na ita Malaga ma lu’iina le na a’afia, e la te fufusu.

Na faamatala foi e le na a’afia, o le savali ese a Malaga, na ia valaau atu ai loa i le ofisa a leoleo mo se fesoasoani.  E le gata i lea, sa ta’ua e le na a’afia, ua mae’a foi ona faatonu e lona pule ia Malaga, e aua ne’i toe alu atu i le lotoa.  Sa faasinoina e le na a’afia ia leoleo, i le mea sa iai Malaga ma na faapea loa ona lokaina mai e leoleo Malaga ma aveina atu i le to’ese i Tafuna.

Ua molia nei Malaga i le Faatupu Vevesi i Nofoaga Faitele, o se vaega ‘B’ o solitulafono mama, lea e mafai ona loka ai se tasi i masina e ono (6), po o se sala tupe e $500; po o fa’asalaga uma e lua.

E $300 le tinoitupe faatulagaina e mafai ona tatalaina ai Fo’a mai i le falepuipui, e faatalitali ai lona faamasinoga.

FAATUPU VEVESI I TOTONU O LE AIGA

Ua ta’ua i faamaumauga a leoleo le tula’i mai o se faalavelave i le afiafi o le aso 3 o Fepuari, 2024, lea ua molia ai nei le susuga ia Afa Elenio, ina ua fa’afeso’ota’i e lona tina o Iesepela Elenio ia le ofisa a leoleo, ona o le faatupu vevesi o Afa i totonu o lo latou aiga i Ottoville.

Sa maua i su’esu’ega a leoleo e faapea, na fo’i atu Afa i lo latou fale i lea fale, ae o lo o fa’asuaava.  Ma amata ona leoleoa i totonu o le latou fale, ma palau i lona tama.  Ma sa lafo foi e Afa ia ni faamatalaga e faapea, o le a ia ‘tipi eseina’ le ulu o le to’alua a lona tuafafine, pe a fo’i atu i le fale.

I se talanoaga a leoleo ma le tama ia Malologa Elenio, sa ia ta’ua ai lona le lava i uiga fa’aalia a le ua molia, e faasaga ia te ia (Malologa) ma lona to’alua.  Sa faamatala foi e Malologa, na tu’ua e le ua molia, ia le fale i le taeao, ae fo’i mai i le afiafi ua ona.  Ae alu atu ma lona le fiafia i le to’alua a lona tuafafine i le le kukaina o se meaai.  Na faapea foi ona ave e le ua molia, ia se moa sa i totonu o le fa’atanoa vai a le latou aiga, ma togi i fafo o le fale.

Sa taumafai le tama ia Malologa e fa’ato’ato’a lona atalii, ae amata ona palauvale leotel le ua molia ma faapea mai, e le tatau ona kuka e ia mea’ai a le to’alua a lona tuafafine.

O iina na faatonu ai loa e Malologa lona to’alua, e valaau leoleo mo se fesoasoani, ona e le mana’o e fufusu le ua molia ma le to’alua a lona tuafafine.

Sa faapea ona o’o atu leoleo ma aveina loa Afa i le to’ese i Tafuna.  Ma molia o ia i le Faatupu Vevesi i totonu o aiga, o vaega ‘C’ o solitulafono mama, e mafai ona fa’asala ai se tasi i le falepuipui i le le silia ma aso e sefululima (15) po o se sala tupe e le silia ma le $300; po o fa’asalaga e uma e lua.