POU TIUTE A LEOLEO

Pago Pago - AMERIKA SAMOA

KALANIUA FIA

O lo o ua faamaumauina i le ofisa leoleo i Fagatogo, le taofia e leoleo o se tamaloa e 67 tausaga le matua, e suafa ia Kalaniua Fia po o John Fia, i luma o le falea’oga a Matafao i Faga’alu ma lokaina ai, i le moliaga o le aveta’avale masau, o se vaega ‘D’ o solitulafono mamafa, lea e mafai ona faafalepuipuiina ai se tasi i le va o aso e iva (9) ma tausaga e lima (5), po o se sala tupe e $5,000; po o faasalaga uma e lua.

O lenei faafitauli na tula’i mai i le afiafi o le aso 27 o Ianuari, 2024, ina ua faamaonia e leoleo le saoasaoa o se taavale, sa agai atu i le 30 maila, i se vaega o le auala e na’o le 20 maila faatulafonoina.  Sa taofia e leoleo ia le taavale ma fa’ailoa atu i le aveta’avale le saoasaoa o lana taavale.  Ae ina ua tapaina e leoleo ia le laisene a le aveta’avale, sa ia tali mai i leoleo, ua galo i le fale.  

Na tu’uina atu loa e le aveta’avale i leoleo ia seisi ID ma fa’ailoa atu, o lona igoa o John Fia.

Sa faapea loa ona lokaina e leoleo ia le aveta’avale ma aveina atu lana ta’avale i le ofisa leoleo i Fagatogo.

Sa faamaonia foi i su’esu’ega a leoleo, le faasalaina o le laisene aveta’avale a le ua molia, ona o le aveta’avale fa’asuaava. 

Sa lokaina loa le alii o Fia i le to’ese i Tafuna ma e $5,000 le tinoitupe ua fa’atulagaina, e mafai ona tatalaina ai o ia i tua.

AUKUSO LEAFA

O lo o ua molia nei le susuga ia Aukuso Leafa i se moliaga e tasi, o le Faatupu Vevesi i Nofaga Faitele, o se vaega ‘B’ o solitulafono mama, lea e mafai ona faasala ai se tagata i le falepuipui, mo masina e ono (6) po o se sala tupe e $500; po o faasalaga uma e lua.  Ona o se faalavelave na tupu i le aso 21 o Ianuari, 2024 i le fale kalapu a le Bowling Alley i Tafuna.

E tusa ai ma faamaumauga a leoleo, ina ua taunuu leoleo i le nofoaga na tupu ai le fa’alavelave, sa faasino ifo e se leoleo po a le fale kalapu ia se alii ‘ona, ua leai sona mitiafu, o lo o taumafai e fufusu ma tagata, i tafatafa o le pa ma’a lea e i luma o le falekalapu.  Sa faapea loa ona lokaina mai e leoleo ia Leafa ma aveina atu o ia i le latou ofisa i Tafuna.

O lo o ua ta’ua i le molimau tusia a le leoleo po (o ia lea sa telefoni i le ofisa a leoleo), o le mafuaaga na ia tulia ai i fafo ia le ua molia, ona sa fa’ailoa atu e lana supavaisa, ua matua’i ova le ‘ona o lea alii ma o lo o masa’a ia te ia, ia pia a isi tagata.

Ae ina ua taumafai le leoleo po e ave i fafo ia le ua molia, sa tago le alii ma ave’ese lona mitiafu ma palauvale ma fa’avevesi mai i le supavaisa o leoleo po a le fale kalapu, faapea ma isi tagata, i totonu o le falekalapu.  O le mea lea na ia telefoni ai loa i leoleo mo se fesoasoani.

Sa tusia foi e le taitai leoleo po ia sana molimau ma sa ia ta’ua ai le tete’e atu o Leafa, a’o latou taumafai e ave o ia i fafo mai i le falekalapu, ma na tau ai le tulilima a Leafa i lona mata. Sa ta’ua foi e le taitai leoleo po, na manaomia ona ave’ese Leafa mai i le falekalapu ona ua toatele nisi ua fa’asea i le masa’a o a latou pia, i lea alii.

E $500 lea ua fa’atulagaina e mafai ona tatalaina ai i tua le ua molia, mai i le to’ese, e fa’atali ai lona faamasinoga.