POU TIUTE A LEOLEO

Pago Pago - AMERIKA SAMOA

MAFUA ONA FUFUSU, ONA O NI ATA LE LAVALAVA

I le aoauli o le aso 21 o Setema, 2023, na valaau ai se tamaitai i le ofisa a leoleo i Tafuna e ripotia se tina o lo o fasi i luma o le fale a Litani i Nu’uuli.

E taunu’u atu leoleo, o lo o vaovao mai fusuaga a ni tamaitai Asia se toalua, o Zhang Fengling ma Dan Jinxia, ae o lo o si’i le pepe e lua tausaga a Jinxia.

Sa aveina uma atu nei tina i le ofisa a leoleo mo le suesueina.

Sa faamatala e Fengling, sa ia lauina le le ma o Jinxia, ae savali atu Jinxia ua po ona mata ma o iina na ia valusi ai foliga o Jinxia.  Na alu Jinxia ave lana pepe i totonu o le fale, ae toe sau i fafo, toe avau fusuaga ma Fengling.

Ina ua su’esu’e atili e leoleo lenei mataupu, e foliga mai, i le faamatalaga a Fengling, ua faapouliuli ia Jinxia ma le toalua a Fengling ae ua tapu’e ni a la ata telenoa (se’i tulou) ma faasalalau i luga o ’upega tafa’ilagi.

Ae faamatala e Jinxia, na alu i le faleoloa i Litani e faatau se fagama’a, ae ona vaai ai ia Fengling o tutu i fafo o le faleoloa.  E la te savavali atu ma lana tamaititi e lua tausaga, i totonu o le faleoloa, ae mulimuli atu ai Fengling ma fela’u ona mata, ae o lo o si’i lana tamaititi.  O le mea lea na ia tu’u ai lalo lana tamaititi, ae tamo’e mai e tuliloa Fengling lea ua savali mai i fafo o le faleoloa, na amata loa le la fusuaga.

A’o faatalatalanoaina e leoleo ia nei mafine, sa mafai ona maua atu ata vitio mai i le fale a Litani, lea na vaaia ai le savali o Jinxia i totonu o le faleoloa ma lana tamaititi, ae mulimuli atu ai Fengling, ae o lo o fai se la taugaupu.

Na taumafai se tagata faigaluega a Litani e vaovao le to’alua lea, ae a’apa atu loa Fengling ma valusi mai mata o Jinxia.

Sa faamatala e se molimau na iai i le taimi o lenei fusuaga, a’o ia savali atu agai i le faleoloa a Litani, sa ia vaaia Jinxia o tamo’e mai fafo mai le faleoloa ma po mata a Fengling ma sa ia taumafai loa e vaovao le fusuaga.

O lo o ua taofia nei ia Fengling ma Jinxia i le toese e faatali ai o la faamasinoga.

Ua molia uma nei mafine i le faatupu vevesi i nofoaga faitele ma le faaoolima, i lona tikeri e tolu.  Ma e ta’i $300 le tinoitupe faatulagaina e mafai ona tatala ai i la’ua i tua.

GAOI TELEFONI AE TOE MAUA E LE E ANA LE TELEFONI

I le aso 26 o Setema, 2023, na aveina atu ai e se alii ia se tagata na gaoia lana telefoni i luma o se faleoloa i Nu’uuli.

E tusa ai ma le faamatalaga a le alii loto mafatia, na la o atu ma lona tua’a e avatu le la kiliva i le faleoloa a Litani i Nu’uuli.  Ma a’o la iai i totonu o le faleoloa, sa tu tu le alii o Thomas Eseroma i tafatafa o le la taavale.  Na vaaia e le tua’a a le alii loto mafatia, ia le tamo’e ese o Eseroma ma sa ia fesiligia ai lona atalii po o iai lana telefoni.  Na tali le ua a’afia i lenei mataupu, o lana telefoni la e i totonu o le taavale.  Sa fautuaina o ia e lona tama e alu e siaki po o iai lana telefoni i totonu o le taavale, ae alu atu le ua a’afia i lenei mataupu, ua leai sana telefoni.

Ma o lea, na tamo’e ai loa e tuliloaina ia Eseroma, ma ia mauaina atu o ia i luma o seisi faleoloa, ma ia toe maua mai ai lana telefoni, a o faatoese atu Eseroma ia te ia.

Na aveina loa e leoleo ia Eseroma.  Na faamaonia e Eseroma lona gaoia o le telefoni ina ua maua lona avanoa.

Ua molia nei Eseroma i le gaoi ma e $300 le tinoitupe faatulagaina e mafai ona tatala ai o ia i tua.

FAAFEFE E SE ALII TALAVOU LONA AIGA

O le aso 25, Setema, 2023 na valaau ai se tina loto mafatia, i le ofisa leoleo i Fagatogo, mo se fesoasoani ona o sona alo, o lo o faatupu vevesi i lo latou aiga i Aua.  

A o agai atu leoleo i le afioaga o Aua, sa toe maua seisi valaau e faailoa mai ai, ua alu ese atu Toala mai lo latou fale ma sa maua ai foi e leoleo se faamatalaga i ona laei o lo o ofuina.

A o tau saili e leoleo le fale o le aiga sa tulai mai ai le faalavelave, na o latou vaaia se alii e tutusa ona laei ma laei o le tagata lea o lo o masalomia sa faatupuina le vevesi i lona aiga, o lo o savavali atu ma seisi alii, lea na iloa mulimuli ifo, o le tua’a o le alii o Toala, ma o ia foi lea o lo o a’afia i lenei faalavelave.

Sa faamatala e le tua’a o Toala i leoleo, na o’o atu lona atalii i lo latou fale, ua fa’asua’ava ma ua amata ona e’e ma taumafai e fasi lona uso laititi.  E faatonu atu e lona tama e soia, ae tali mai Toala i ni upu taufa’amata’u e faapea, o le a ia tipitipiina (se’i tulou) o ia, i se agaese.

Na faailoa atu e le ua a’afia i lenei faalavelave, i leoleo, sa le mafai ona momoe o ia ma lona toalua ma le la fanau, ona o upu taufa’amata’u a le ua molia.

Sa lokaina loa ia Toala ma aveina atu i le ofisa a leoleo ma ua molia ai nei o ia i le faatupu vevesi ma e $500 le tinoitupe faatulagaina e mafai ona tatala ai o ia mai i le falepuipui.