POU TIUTE A LEOLEO

Pago Pago - AMERIKA SAMOA

LOKA LE TAMALOA MA MOLIA I LONA TAUMAFAI E FASIOTI LONA TOALUA

Ua molia nei le susuga ia Hipa Bryce i moliag o le Faatupu Vevesi i totonu o lona aiga, Faitauga lona lua i le Fa’ao’olima i lona tulaga e tolu, ma le Faitauga lona tolu, o le Fa’ao’olima i lona tulaga e tolu.

E tusa ai ma faamaumauga a le malo, o le aso 24 o Novema, 2023, sa va’aia ai e leoleo i luga o le auala tele i Futiga, ia se tina, o talotalo atu mo se fesoasoani, ina ave’ese lona toalua mai i le latou fale, on aua faamata’u o ia e lona toalua, i le oti.

Ina ua suesueina e leoleo lenei tina, sa ia faamatalaina e faapea, na manava atu o ia mail ana galuega, ma ona vaaia lona toalua, ua fa’asuaava, o lo o nofo mai i le latou laulau ‘ai.  Ae ina ua ona nofo atu i ona autafa, sa faapea mai lona toalua ia te ia, e tusa lava pe o iai lau fanau tama i totonu o le potu, e o mai lava e va’ai le mea ou te faia ia te oe.  Na faapea atu foi le ua molia i lona toalua, o le a ia tu i luga ma fasioti o ia.

Na faamatala e lea tina le fa’ate’ia o ia, ma ua nofo ua leai sana tala e faia, ona ia valaau atu lea i lana tama e 18 tauaga, e sau e nofo mai i ona tafatafa, ona ua fefe o ia ma fa’ate’ia i upu taufa’amata’u a lona to’alua.  E ui ina sa sau lana tama ma nofo mai i ona tafatafa, ae peitai, sa toe tula’i ese o ia, ma toe tu’u ai na o le tina ma lona toalua.

Ina ua alu’ese le tamaititi 18 tausaga mai i le laulau, sa faamatala e le tina le toe faamanatu atu e lona toalua ia te ia, se mea na tupu I se ulugalii Mapusaga, lea na fasioti e le tamaloa lona toalua.  Ma sa ta’ua e le tina lea, ua faapea atu lona toalua, o le mea foi lea o le a o’o ia te ia.

Sa faamatala foi e lenei tina e faapea, e le o se taimi muamua lea ua fai atu ai se tala faapea a lona toalua ia te ia.  Sa ta’ua e lenei tina, o taimi uma lava e fa’asuaava ai lona toalua, e na te toe faamanatu atu lava ia te ia, ma fa’aefe o ia.  Ma na saunoa le tina, ua le lava o ia I sauaga ma tu’uaiga a lona toalua.

O lo o ua ta’ua foi i totonu o faamaumauga a le malo, le faatalanoaina e leoleo o le atalii 18 tausaga ma sa ia faamatalaina e faapea, na tu i luga e alu mai i le laulau, ae ona faalogoina le faamatalaga a lona tama, o le a ia fasiotia lona tina.

E $1,000 le tupe faatulagaina e mafai ona tatalaina ai i tua le ua molia, e faatali ai lona faamasinoga.

FAALUA ONA TAOFI I LE SAOASAOA O LANA TA’AVALE – FAALUA FOI ONA MAUA AI FUALAAU FAASAINA I TOTONU O LANA TAAVALE

I le aso 30 o Novema, 2023, na taofia ai le tamaitai 21 tausaga o Osomanu Tauane ma se alii 23 tausaga, o Tien Vuxuan, i luga o le alatele i Faga’alu, ma molia ai i la’ua i lo la umia o o vaega o fualaau faasaina, o le Aisa.

O lo o molia Tauane i lona umia faasolitulafono o se vaega o fualaau faasaina, o le Aisa; lea e mafai ona faasala ai o ia i le falepuipui i le va o le 5 ma le 10 tausaga, o se sala tupe e i le va o le $5,000 ma le $20,000; po o faasalaga uma e lua.

Faapea ma moliaga o le umia faasolitulafono o se vaega o fualaau faasaina, o le Aisa ma se faamoemoe e faatauina atu i tagata; o se solitulafono e mafai ona faafalepuipui ai o ia i le va o le 5 ma le 10 tausaga, po o se sala tupe e i le va o le $5,000 ma le $20,000; po o faasalaga uma e lua.

E $20,000 le tupe faatulagaina e mafai ona tatala ai ia tua ia Tauane, e faatali ai lona faamasinoga.

O le alii o Vuxuan ua molia i lona umia faasolitulafono o se vaega o fualaau faasaina, o le Aisa, lea e mafai ona nofosala ai i le falepuipui i le va o le 5 ma le 10 tausaga, po o se sala tupe e i le va o le $5,000 ma le $20,000 po o faasalaga uma e lua.

E $5,000 le vaegatupe ua faatonuina Vuxuan e totogi, e mafai ona tatalaina ai mai i le falepuipui, e faatali ai lona faamasinoga.

E tusa ai ma faamaumauga a le malo, sa mataituina e leoleo luga o le alatele i Faga’alu mo taavale saoasaoa, ma taofia ai le taavale a Tauane.  Ina o faataunuuina suesuega a leoleo i luga o le alatele, sa faamaonia ai le iai o se pepa saisai mai i le faamasinoga, mo Tauane ona o seisi foi mataupu tau i fualaau faasaina. 

 O le mataupu lena na maua muamua ai Tauane, ona o le saoasaoa foi o lana taavale, i luga o le alatele i Aua.

Ina ua taofia e leoleo ia Tauane i Faga’alu ma suesueina o ia, sa vaaia e leoleo ia se paipa mata’eta’e faapea ma ni tama’i aisa, i totonu o le mea tu’u ipu i le nofoa pito i luma o le taavale.  O iina na lokaina ai loa Tauane ma Vuxuan ma faanofo ai loa Tauane i totonu o lana taavale, ae ave Vuxuan i totonu o le taavale a leoleo.

E tusa ai ma faamaumauga a le malo, sa faamatala e Tauane i leoleo i le taimi lena, o ia e ana le paipa.

Sa aveina uma atu Tauane ma Vuxuan i le ofisa a leoleo i Fagatogo, lea sa suesueina ai loa le taavale a Tauane ma maua ai ni ‘straws’ lanu meamata se 14, o lo o iai se tama’i aisa.  E le gata i lea, na maua ai foi se ato fa’afafa, lea na ta’ua e Tauane, o lana ato fa’afafa, faapea ma se tama’i ato, a Vuxuan.

Na suesueina e leoleo ia le pauta pa’epa’e sa maua i totonu o le paipa ma ‘straws’ ma faamaonia ai, o se vaega o fualaau faasaina, o le Aisa.

Ina ua suesueina e leoleo ia le tino o Vuxuan, sa maua ai se tinoitupe e $50, ma se telefoni feavea’i.  A’o feagai leoleo ma le suesueina o Vuxuan, sa ia ta’ua e faapea, sa ula a la aisa ma Tauane, a’o la agai atu e momoli o ia i lona fale i Fagaalu.  Ma sa ia ta’ua foi e faapea, o le paipa lea na maua i totonu o le ta’avale, o le paipa a Tauane.

Sa ioe foi Vuxuan i le suesueina o lana tamai ato lea na maua i totonu o le taavale.  Ma maua ai ni paipa mata’eta’e se lua, ma ni aisa laiti, o ni tamai taga pepa iila ma ni isi mea totino.  Na faamaonia e Vuxuan, o paipa ia sa maua i totonu o lana tamai ato, o ana meatotino ia.

Sa faamaonia foi i suesuega a leoleo, le tauaveina e Vuxuan o fualaau faasaina o le Aisa, i totonu o lana tamai ato.

Ina o iai Tauane i le ofisa leoleo i Fagatogo, sa faapea ona tu’uina atu ia te ia se toe tu’uina atu ia te ia lana tusi saisai, ae sa ia toe ta’ua foi, o ‘straws’ lanu meamata e 14 lea sa maua, o ana mea totino ia, sa ia faatauina mai i se tagata i luga o le alatele.

Sa ia ioe foi i le suesueina e leoleo o lana ato fa’afafa, lea na maua ai foi e leoleo nisi vaega o fualaau faasaina faapea ma ana meatotino.