POU TIUTE A LEOLEO

Pago Pago - AMERIKA SAMOA

VALA’AU LEOLEO MO SE FESOASOANI ONA O SE FUSUAGA A NI ALII FA’ASUAVA I TOTONU O LE SAMI

O le aso 16 o Iuni, 2025, na o’o atu ai se vala’au i le Ofisa a Leoleo i Fagatogo, mo se fesoasoani, ona o le fusuaga a ni onana, sa faia i se nofoaga tu lata i le sami, ma i’u ai ina pa’u se tasi o ‘ona i totonu o le sami, e tusa ai ma fa’amaumauga a le faamasinoga.

Ina ua taunu’u leoleo i le nofoaga na tupu ai le faalavelave, sa va’aia le lolofi atu o le toatele o tagata, i autafa o le sami, faatasi ai ma se alii o lo’o toto le muaulu.  E le’i umi, ae taunu’u ma le vaega a le EMS.

Sa faamatalaina e le na manu’a, le osofa’ia o ia e se alii e lauiloa ia ‘Taka’ ia po o Patrick Ale.  Ina ua mae’a togafitiga a le EMS, na faapea ona aveina atu le na a’afia i le falemai, mo le toe faia o nisi togafitiga.

Na agai atu leoleo i seisi nofoaga na potopoto ai ni tagata, ma va’aia ai ia Patrick, o taoto i luga o lona manava.  Ae o lo’o ‘e’e ma faapisa.  Sa va’aia le taumafai o tagata o lona aiga, e fa’ato’ato’a le alii. 

Ma na taumafai leoleo, e ave faapgota le alii, ae peitai, sa tau le mafai ona taofiofi le na molia, ma na fa’aauau ona ‘e’e leotele.  E le’i umi, ae tu fa’afuase’i i luga ia Patrick ma tamo’e i leisi itu o le auala, ae o lo’o feoa’i taavale ma na tula’i mai ai sina faaletonu i aveta’avale.

Sa i’u ina mafai e tagata o le aiga, ona fa’afilemu ia Patrick ma aveina atu loa o ia i le ofisa a leoleo, mo le faia o su’esu’ega a leoleo.

Ae peitai, a’o agai atu le taavale a leoleo ma le na molia, sa amata ona feanu solo le alii i totonu o le taavale a leoleo, ma ‘e’e ma tu’i lona ulu i le fa’amalama.

Ina ua mae’a ona faia faamaumauga a Ale i le ofisa a leoleo i Tafuna, sa faapea ona aveina sa’o loa o ia i le to’ese i Tafuna, e faatalitali ai lona faamasinoga.

Na toe fo’i mai leoleo e faatalanoa i latou sa iai i le taimi na tupu ai le fa’alavelave, ae peitai, sa o latou ta’ua e faapea, e taunu’u atu i latou, ua mae’a le fusuaga ma e latou te le o malamalama foi po o le a le mea na tupu.

O lea na agai atu loa leoleo i le falemai, mo le fa’atalanoaina o le alii na a’afia.  Ae peitai, e taunu’u atu, ua sola le na a’afia mai i le falemai.  Ae sa ta’u ifo e tausimai i leoleo ia le suafa ma le tuatusi a le na a’afia.

Sa faapea loa ona agai atu iai leoleo i lona fale, ae e le’i maua atu foi i le fale.  E le o mailoa pe na feso’ota’i leoleo ma le na a’afia.

Ae o moliaga na faia faasaga ia Patrick, na aofia ai le Faatupu Vevesi i nofoaga faitele ma le tete’e i leoleo a’o latou taumafai e ave faapagotaina o ia.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe, e le silia ma le $500; po o faasalaga uma e lua.

O le moliaga o le tete’e i leoleo, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina, e mafai ona tatalaina ai le na molia, e faatalitali ai lona faamasinoga.

HAWAII:  MOLIA SE ALII I FAIA O AMIOGA MATAGA I NI TEINEITI SE TO’ALUA

Ua ta’usalaina nei se alii mai Hawaii, ina ua ta’ua e leoleo, lona faiaiga ma ni teineiti e to’alua, e i lalo ifo o le 14 tausaga, lea na amata mai ia Tesema 2024.

E tusa ai ma ripoti a leoleo, na molia le alii o Raynard Chong, e 26 tausaga ona o le faiaiga fa’atele ma nei teineiti, na aofia ai ma le latou momoe i lona fale i Keaau.

Sa amataina su’esu’ega a leoleo ia Iulai 1, ina ua o’o atu leoleo i le falemai a Benoff i Hilo ona o se vala’au mai i le falemai.

O le aso 21 o Iulai, na ave faapagotaina ai Chong, ma na mua’i molia o ia i faitauga e lua, o sauaga faiaiga i lona tulaga muamua ma lua faitauga o le faia o ata mataga mo fanau iti.  Ae ina ua o’o atu lana mataupu i luma o le faamasinoga maualuga, sa toe faaopoopo iai ma nisi moliaga, i lona fa’aauau ona momoe ma teineiti e i lalo o le ta’i 14 tausaga.

E $815,000 se vaegatupe na fa’atulagaina e le faamasinoga, e mafai ona tatalaina ai le na molia, mai i le falepuipui, a’o fa’agasolo lona faamasinoga.

O le aso 8 o Setema, ua toe fa’atulagaina ai le iloiloga a Chong i luma o le faamasinoga.