POU TIUTE A LEOLEO

Pago Pago - AMERIKA SAMOA

MOLIA SE TAMALOA I LONA FA’AAOGAINA O SE TUI E OSOFA’I AI LONA TO’ALUA

E tusa ai ma fa’amaumauga a le faamasinoga, o le po o le aso 14 o Iuni, 2025, na vala’au ai se tamaloa i le Ofisa o Leoleo i Fagatogo, ma ripotia ai se misa a se ulugalii ma e foliga mai na fa’aaoga e le tamaloa (lea na molia) ia se tui taumafa e tui ai le lima o le tina na a’afia.

Na aga’i atu leoleo i le nofoaga na tupu ai le faalavelave ma talatalanoa ma le na valaau mai i le ofisa a leoleo faapea le tina na a’afia.

E tusa ai ma le fa’amatalaga a le tamaloa lea na vala’au mai i le ofisa a leoleo, ae e le’i alu ‘ese ma le fale i le 7:00 o lea afiafi, sa ia va’aia le na molia (o Toe) o inu pia i luma o le latou fale.  Ae ina ua toe fo’i mai le na valaau i leoleo, o lo’o fasi atu e Toe lona to’alua, lea na aofia ai ma le fa’aaogaina o se tui e taumafa ai, e tatui ai le lima o le tina na a’afia.

Sa faatonu loa e le tamaloa na vala’au, ia lona to’alua, e ave tamaiti ma o i se fale o se tuaoi, ae ia ona valaauina leoleo mo se fesoasoani.  Sa ta’ua foi e le tamaloa na valaau i leoleo, e le o se taimi muamua lea ua tupu ai se faalavelave faapea.  Na ia fa’amatalaina e faapea, e nonofo faatasi uma o ia ma lona aiga, ma le ulugalii na misa.

Ina ua mae’a ona fa’atalanoaina e leoleo ia le tamaloa lea na valaau i le Ofisa a Leoleo, sa faapea ona ta’ita’i atu leoleo i le potu a le ulugalii na misa.  Ae peitai, e o’o atu leoleo, ua loka mai le potu.  Ina ua tu’itu’i e leoleo ia le faitoto’a, sa fesili mai se tagata e fa’atosotosololoa lana tautala, po o ai lea e i le faitoto’a.

Ina ua fa’ailoa atu e leoleo i latou, sa tatalaina mai loa le faitoto’a e se tina, o lo’o taumafai e taofi o le maligi o ona loimata, ae na va’aia foi le toto o lona lima.  Ma sa va’aia foi e leoleo ia se tamaloa o saofa’i luga o le foloa ma u’u sana apa pia.

Sa talosagaina e leoleo ia le tina na aafia, e sau i fafo o le potu ma ina ua mae’a ona fa’amaonia e le tina, o i la’ua lea sa tupu ai le faalavelave, na faapea loa ona lokaina mai e leoleo ia Toe (le na molia) ma aveina atu sa’o i le ofisa a leoleo mo le fa’aauauina o su’esu’ega a leoleo.

Sa faapea ona aveina atu ma le tina na a’afia i le ofisa a leoleo, o iina na ia fa’ailoa atu ai i leoleo e faapea, e le o se mea fou lo la tau upu ma lona toalua.  Sa ta’ua e le tina na a’afia, le fu a o lona to’alua, ona o se fafatama, po o se uo a lona uso.  Ma na mafua le la tauga’upu, ona sa taumafai le tina na a’afia, e fa’afilemu le na molia, ae peitai, na atili ai ona leotele ma palauvale ia le na molia

O lea na a’apa atu ai le tina na a’afia, ma po le gutu a lona toalua (le na molia) ma o iina nao so mai ai loa lona toalua (le na molia) ma amata ona tatu’i o ia, ma ia u’uina mai foi le tui ma tatui ai lona lima.

Na faamatala e le tina na a’afia, ia lona alu i totonu o le potu, ae alu atu lona toalua ma fa’ato’ese atu ia te ia.

O moliaga sa faia fa’asaga ia Toefuataia Ropeti, na aofia ai le Faatupu Vevesi i totonu o le aiga, ma le moliaga o le Fa’ao’olima i lona tulaga e tolu.  O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le o’o atu i aso e 15, po o se sala tupe e $300; po o faasalaga uma e lua.

O le moliaga o le fa’ao’olima, o se vaega ‘D’ i solitulafono mamafa, e mafai ona nofosala ai i le falepuipui, e le silia ma le lima tausaga, po o se sala tupe e le silia ma le $5,000; po o faasalaga uma e lua.

E $5,000 se vaegatupe na fa’atulagaina e mafai ona tatalaina ai i tua le na molia, a’o faagasolosolo lona faamasinoga.

LOKA SE TINA 68 TAUSAGA ONA O FE’ESE’ESEA’IGA I FANUA

O le afiafi o le aso 11 o Iuni, 2025, na vala’au atu ai se tina i le Ofisa a Leoleo i Tafuna, ma ripotia ai sona tuaoi e 68 tausaga le matua, ua nofo ma fasi lona  ‘nephew’ ma seisi alii, i se la’au ma se agaese, a’o la taumafai e fa’amama le auala. 

E tusa ai ma fa’amaumauga a le faamasinoga, o le tina ia Luisa Ah Young, lea sa molia i lenei mataupu.

Sa aga’i atu leoleo i le nofoaga na tupu ai le faalavelavev ma talatalanoa ma alii sa a’afia.  O le alii muamua, na molimauina se tama’i ma’osia i lona lima tauagavale, ae o leisi alii, e le’i iai ni ona manu’a.  Ae sa fautuaina le tina matua, ina ia agai atu i le Ofisa a Leoleo mo le fa’aauauina o su’esu’ega a leoleo.

Ae i le faamatalaga a le alii muamua sa a’afia i lenei mataupu, na ia ta’ua e faapea, a’o faia se la galuega faamama i le fanua a lona ‘Aunty’ ma le auala, sa alu atu le tina ua molia ma taofi le la galuega, ae na ia fai atu i le tina matua, e aua le fa’alavelave atu ia la’ua, e le o sona (tiina na molia) fanua.

Sa ta’ua e le alii na a’afia (nephew), ia le fa’ate’ia o ia ina ua ta e le tina na molia, ia lona lima i se la’au ona toe ta lea i le lau o se agaese.  Sa faapea foi ona liliu atu le tina na molia, ma ta ma le alii lona lua, na a’afia, i le lau  o le agaese lava lea e tasi.  Ona savali ese lea o le tina na molia ae ‘e’e mai ia la’ua.

Na faapea ona fa’amaonia e le alii lona lua, na a’afia, ia le faamatalaga a le ‘nephew’.

Ae i le fa’atalanoaga a le tina na molia, sa ia ta’ua ai e faapea, o ia e ana le fanua lea ua fau ai le auala galue ma le malae pasiketipolo a le tina na vala’au i leoleo.  Ma sa ia (tina na molia) savali atu i le nofoaga na faia ai le galuega a alii talavou e toalua, ma faatonu le alii muamua (nephew), e taofi le la galuega, ona o lona fanua lea o lo’o faia ai le la galuega.

Sa fa’amaonia e le tina na molia, ia lona u’uina o se agaese ma se la’au, ae sa ia ta’ua, ona e le’i fa’alogo le alii talavou muamua (nephew), o lea na ia tago ai ta i le la’au, ae na te le’i ta ina i le lau o le agaese.

Na fa’atalanoaina foi e leoleo ia le tina na valaau atu i le ofisa a leoleo ma ae na ta’ua e lea tina, o ia e ana le fanua.  Ma sa ia ta’ua foi e faapea, o lea fa’ato’a fau le fale a le tina ua molia, i tafatafa o le auala galue, i le tausaga ua mavae, ae o lea ua manatu o ia e ana le fanua.  Sa ta’ua foi e le tina na valaau i leoleo, ia le tatipiina e le tina na molia, ia a latou laau i se ‘ili, i ni nai masina e le’i leva atu, ma ua mae’a ona ia (tina na valaau i leoleo) failaina sana fa’asea i leoleo.

Ae o Me 15, sa ta’ua e le tina na  i leoleo, a’o fa’amamaina e lona tausoga le vae, i autafa o lona fale, sa savali atu ai foi ia le tina na molia, ma ‘e’e atu i lona tausoga, e taofi lana galuega.  Ona savali atu lea o le tina na molia, i tua o le fale a le tina na valaau i leoleo, ma fa’aauau ona ‘e’e i le tina na valaau i leoleo ma lona toalua, ae na sau le to’alua a le tina na valaau i leoleo, ma tuli ‘ese le tina na molia mai le fanua.

Sa ta’ua e le tina na valaau i leoleo, e le’i leva foi ona tau’ai e le tina namolia, ia lona toalua, i ni ma’a, a’o iai i tua o le latou fale.  Ma sa fa’aalia e le tina na valaau i leoleo, ia lo latou le saogalemu i lo latou fanua, ona e leai lava se fefe o le tina na molia, e alu atu ma faapisa atu ia i latou.

O moliaga na faia faasaga i le tina na molia, na aofia ai le Faatupu Vevesi i totonu o aiga, o se vaega ‘C’ i solitulafono mama, e mafai ona nofosala ai i le o’o atu i aso e 15, po o se sala tupe e $300; po o faasalaga uma e lua.

Atoa ai ma moliaga o le 2 ma le 3, o le Fa’ao’olima i lona tulaga e tolu – o ni vaega ‘A’ i solitulafono e lua, e mafai ona nofosala ai i le falepuipui i le ta’i tasi tausaga, po o se sala tupe e ta’i $1,000; po o fa’asalaga uma e lua.

E leai se vaegatupe na fa’atulagaina e toe tatalaina ai le na molia, mai i le falepuipui, e faatalitali ai lona faamasinoga.