POU TIUTE A LEOLEO

Pago Pago - AMERIKA SAMOA

O le taeao o le aso 6 o Me, 2025, na o’o atu ai se tina ma sona alo i le Ofisa a Leoleo i Fagatogo e ripotia se fa’alavelave o lo’o tupu i lo latou aiga, ona seisi ona alo matua, ua nofo ma fa’afefe lona uso laititi lea na o atu ma le tina i le ofisa a leoleo, i le fa’aaogaina o se naifi fai meaai, e tipi ai lona ulu.

O le susuga ia Bernard Muliau sa molia i lenei mataupu.

Sa ta’ua e le tina a Bernard, lona palauvale solo, togi lona uso laititi i se ma’a faapea ma le fa’afefeina o lona uso laititi i se naifi fai meaai.

Ina ua fa’atalanoaina e leoleo ia le tina ma lona alo (le na a’afia), sa o la fa’ailoa atu i leoleo e faapea, e le o se taimi muamua lea ua tupu ai se tulaga faapea i le latou aiga. 

Ina ua mae’a ona fa’atalanoaina e leoleo le tina ma lona alo (le na a’afia) sa agai atu loa mo le sialiga o Bernard i le latou fale.  Ina ua ave faapagotaina e leoleo ia Bernard, sa ia fai atu i lona tina, o le iai se mea leaga o le a tupu ia te ia (le tina) pe a toe tatalaina mai o ia (Bernard) mai i le falepuipui.

Na fa’amatalaina e se molimau i leoleo, le amataina o lenei faalavelave, ina ua ‘e’e ia le na molia i lona uso laititi (le na a’afia) e tusa ai ma se ‘speaker’, ma sa tago Bernard i se naifi faimeaai ma fa’amata’u ai lona uso laititi.  Na tuliloaina e Bernard lona uso ma le naifi, ina ua tamo’e ese o ia.

Sa faamatalaina e le uso laititi , le faia o sana malologa ae alu atu lona uso matua ma pisa atu ia te ia, e uiga i lana ‘speaker’.  A’o fa’aauau ona o la tau upu, sa ta’ua e le uso laititi, ia lona va’aia o lona uso matu ma le naifi fai meaai, ma ia (Bernard) taumafai e fa’afefe le tipi ese o lona (uso laititi) ulu.

Na aveina atu e leoleo ia Bernard i le ofisa a leoleo mo le fa’aauauina o a latou su’esu’ega, ma fa’ai’u ai i le aveina o Bernard, i le to’ese i Tafuna, e loka ai, e fa’atalitali ai lona faamasinoga.

O moliaga fa’asaga ia Bernard, na aofia ai le Faatupu Vevesi i totonu o le aiga faapea ma le Fa’ao’olima i lona tulaga e t9olu.  O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga e tasi, po o se sala tupe e $1,000; po o faasalaga uma e lua.

E $2,000 se vaegatupe na fa’atulagaina, e mafai ona tatalaina ai le na molia, mai i le falepuipui e faatalitali ai lona faamasinoga.

FA’AMAONIA FAAMASINOGA MAUALUGA I HAWAII IA MOLIAGA O LE FASIOTI TAGATA FUAFUAINA

I le tausaga e 2020, sa fa’amaonia ai moliaga o le fasioti tagata fuafuaina, i lona tulaga e lua, na faasaga ia Erik Willis, ona o le tagatavaleina o se teineititi e 17 tausaga, a’o fa’ala i le matafaga i Kahala.

Ma o le fa’asalaga a Eric, o le soloatoa i le falepuipui, e aunoa ma le toe tatalaina mai i tua.

I le tausaga ua mavae, na toe fa’aleaogaina ai e le Faamasinoga o Apili, ia le fa’asalaga a Eric ma fa’atonuina le toe faia o seisi faamasinoga fou, ona e pei ona ta’ua e le faamasinoga, sa le talafeagai ia finauga fa’ai’u a le itu a le malo, ina ua o latou ta’ua ia fa’amaoniga o le toto i le tino o Willis, ina ua leai se fa’amaoniga sa folasia i l uma o le fa’amasinoga.

Sa faapea ona apili e le setete i le Faamasinoga Maualuga i Hawaii, lea sa tuuina mai ai lana fa’aiuga i le aso Lua, ina ia toe suia le faaiuga a le ICA ma fa’amaonia le faaiuga.

FAI MAI KOMESINA LEOLEO A SAMOA, O LO’O ALU ATU MAI AMERIKA SAMOA IA AISA

I se ripoti mai Samoa, le faamaonia e leleo ia le tele o vaega o fualaau faasaina (Aisa), o lo’o alu atu mai i Amerika Samoa, ma o lo’o fa’aaogaina fanau iti, e fa’atauina atu ia nei fualaau faasaina.  Sa ta’ua e le Komesina a Leoleo, le susuga ia Auapaau Logoitino Filipo, le le toe avea o Samoa ma auala e feavea’i ai fualaau faasaina, ae ua avea nei ma nofoaga e faatauina atu ai.

Na ta’ua e le Observer, ia se saunoaga a Auapaau e faapea, o so latou atugaluga, o le fa’amaonia le a’afia o fanau iti, e ala i le fa’aaogaina e faatau atu ia nei vaega o fualaau faasaina.  Ma sa ta’ua e Auapaau le fa’aauau pea o la latou galuega i le tau sailiga o tagata o lo’o a’afia i fualaau faasaina, ina ia molia i latou i le tulafono.

Sa le’i fa’amaonia e Auapaau ia le fuainumera o fanau iti, ua a’afia i le fa’atauina atu o fualaau faasaina, ae o lo’o fa’aauau pea a latou su’esu’ega.

O lenei fa’afitauli i tulaga o Aisa, ua ta’ua o se fa’alavelave tele i totonu o Amerika Samoa.  Ma sa ta’ua e Auapaau lo latou galulue faatasi ma le Ofisa o Tiute, ina ia taofia le ulufale atu o ia fualaau faasaina i totonu o le atunu’u.

O le taimi mulimuli na maua ai e leoleo ia fualaau faasaina, i sa latou osofa’iga, na aofia ai afioaga o Nu’u-Fou, Lotofaga, Safata ma Alafua, lea na lokaina mai ai ni alii se toalima, na aofia ma le alo o le Fofoga