POU TIUTE A LEOLEO

Pago Pago - AMERIKA SAMOA

LOKA SE ALII I LE FA’AAALI O ONA ITU TINO SA A’O TA’A’ALO LATA ANE IA FANAU ITI

O le afiafi o Me 24, 2025 sa valaau atu ai se tamaloa i le Ofisa a Leoleo i Leone, mo se fesoasoani, ona o seisi alii ua nofo ma tatala lona ‘ie lavalava, a’o ta’a’alo lata ane le fanau a le tamaloa na valaau i le ofisa a leoleo.

Sa faapea ona agai atu leoleo i le nofoaga na tupu ai le fa’alavelave ma ave faapagotaina ia le susuga ia Sefo Konelio, ma na molia foi o ia i le fa’aali o ona itu tino sa, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o fa’asalaga uma e lua.

Sa ta’ua e le tamaloa na valaau i le ofisa a leoleo, e le o se taimi muamua lea ua faia ai e Konelio (po o le na molia) ia tulaga mataga faapea, i nofoaga lautele.

Ma na ia (tamaloa na valaau i leoleo) alu atu ma fai atu i le na molia, e tusa ai ma lana gaioiga sa faia, ae ‘e’e mai iai le na molia ma fai mai, e leai se aia tatau a le tamaloa, e faatonu atu ai o ia (le na molia).

Na fautuaina e leoleo ia le tamaloa sa valaau atu i le ofisa a leoleo, ina ia agai atu i le ofisa a leoleo mo le faia o sana fa’amatalaga tusitusia, e tusa ai ma lenei mataupu.

Ae na agai atu leoleo i le fale a Konelio ma ave faapagotaina ai o ia, ma momoli atu i le ofisa a leoleo, mo le fa’aauauina o su’esu’ega a leoleo.

I le ofisa a leoleo, sa faatalanoaina ai e leoleo ia le atalii a le tamaloa na vala’au mai i le ofisa a leoleo mo se fesoasoani.  Ma sa faamatalaina e le tamaititi, lo la iai i luma o le latou fale ma lona tuafafine laititi, o lo’o ta’a’alo ai.  Ae na tu lona tuafafine ma faasino lona lima i le fale a le latou tuaoi (o le fale a le na molia).  Ma o la va’aia ai le na molia, o tu i tafatafa o lona fale ma faasaga mai i le latou fale, e aunoa ma ni la’ei, ae o lo’o u’u lona ‘ie lavalava i lona lima ma fa’alelelele solo.

Sa ta’ua e le tamaititi na a’afia, lona fa’ailoa atu i lona tama, o lo’o faia sana galuega i le latou taavale, le mea sa tupu.  Ma na alu atu lona tama ia Konelio (le na molia) ae na palauvale mai iai le na molia ma fai mai i lona tama, e leai sana feau.

Na ta’ua foi e le tamaititi e faapea, e le o se taimi muamua lea ua faia ai e le na molia, ia lea tulaga, o le ave’ese o lona ‘ie ma fa’aali ona itutino sa, mai lona fale.

Ae ina ua fa’atalanoaina e leoleo ia le na molia, sa ia ta’ua e faapea, na mafua ona ia ave’eseina lona ‘ie, ina ia solo ai ona mata ona o le afu.  Ae na te le iloa o lo’o aliali ona itu tino sa.  Ina ua fesiligia o ia pe sa ia ave’esea lona ‘ie lavalava a’o ta’a’alo tamaiti i fafo, sa ioe le na molia, i lona faia o lea tulaga.  Ma sa ia ta’ua foi e faapea, e le masani ona faia ni ona ofuvae pupu’u i taimi o iai i le fale.

E $1,000 le vaegatupe na fa’atulagaina, e mafai ona tatalaina ai i tua, le na molia, e faatalitali ai lona faamasinoga.

FAUTUA E LE FOMAI LE AVE I LE FALEMA’I, AE MANA’O LE TEINE E ALU I LE FALEPUIPUI

O le afiafi o Me 23, 2025 na fa’afeso’ota’i ai e se tama matua ia le Ofisa a Leoleo i Tafuna, e tusa ai ma sona ‘granddaughter’, o Taiulagi Faia Asuega, o lo’o faatupu vevesi i totonu o le latou aiga.

E tusa ai ma le faamatalaga a le tama matua, sa vala’au atu lona ‘niece’, e faapea o lana taavale lea o lo’o fealuai saoasaoa i luga o le alatele ma toeititi lavea ai lana (niece) taavale.  Sa ta’ua e le tama matua lona fa’atonuina o lona ‘niece’, e vala’au leoleo e saili lona ‘granddaughter’ lea o lo’o fealua’i i le taavale.

E tasi le itula na soso’o ai, ae pasi atu le ta’avale ma le fale a le tama matua, ma sa taumafai le tama matua e taofi, ae peitai, na fa’aauau pea ona alu le taavale.

 45 minute na soso’o ai, e tusa ai ma le fa’amatalaga a le tama matua, na ia maua ai se telefoni, o la ua i le fale lona ‘granddaughter.  Sa ta’ua e le tama matua, lona taunu’u atu i le fale, ua alu lona ‘granddaughter’ i lona potu.  Ae ina ua ia valaau atu iai, e sau i lalo, sa faapea ona ‘e’e mai le tamaitai ia la’ua ma lona to’alua.

Sa le gata i lena, ae na faapea ona taumafai Taiulagi (le na molia) e osofa’i lona tina matua, ae sa mafai ona poloka mai e lona tama matua.  O lea na u’una’i ai e le na molia ia lona tama matua ma pa’u ai i lalo, ae oso fai le tauga’upu ma lona tina matua.  Sa le gata ina palauvale le na molia i ona matua matutua ae sa ia fai atu iai, o ia ua fia alu ese ma le fale.  Sa faatonuina o ia e le tama matua, e alu ‘ese loa ma le fale.

O le faamatalaga a le tama matua i leoleo, e le o se taimi muamua lea ua faia ai lea tulaga e le na molia, ma e le gata i lona fa’afefeina o tagata o lona aiga, ae faapea le mamalu lautele.  Sa ta’ua e le tama matua le manaomia o se fesoasoani mo le na molia, ona e fa’amisa lava o ia i tagata uma.

Ina ua fesiligia e leoleo ia le tama matua, po o iai ni ona manu’a, sa tali le tama matua, e na’o le tiga o lona tua.

A’o agai atu leoleo i le fale o le aiga na tupu ai le faalavelave, sa va’aia ia le na molia, o nofonofo i se faleoloa lanu piniki, e latalata i le latou fale.  Na aveina e leoleo ia le na molia, i le ofisa a leoleo ma sa fa’ailoa e le na molia, i leoleo, o ia e le o toe fia fo’i i le latou aiga.  Na ta’ua e le na molia, e sili ia te ia, ona nofo i le auala, nai lo le toe fo’i i lona aiga.

Ma sa ta’ua e le foma’i, e le o se mea fou le tupu o fa’alavelave i le va o le tama matua ma le na molia, ma ua mae’a ona fautuaina le tama matua, e ave le na molia, e faia sona iloiloga e se foma’i.

Ma sa fautuaina e le foma’i ia le aveina o le na molia, i le falemai mo le toe faia o nisi iloiloga, ae peitai, sa musu ia le na molia.

O lea na lokaina ai loa o ia i le to’ese i Tafuna, e faatalitali ai lona faamasinoga.

Sa molia Taiulagi i le moliaga o le Fa’ao’olima i lona tulaga e tolu – o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina, e mafai ona tatalaina ai le na molia, e faatalitai ai lona faamasinoga.