POU TIUTE A LEOLEO

Pago Pago - AMERIKA SAMOA ma Honolulu - HAWAII

TOLU TAAVALE A’AFIA I SE FAALAVELAVE INA UA MATAPOGIA SE TASI O AVETAAVALE

E tusa ai ma fa’amaumauga a le faamasinoga, o le taeao o le aso 24 o Aperila, 2024, na o’o atu ai se vala’au i le Ofisa Leoleo i Fagatogo, e tusa ai ma se fa’alavelave tau ta’avale i Malaeimi, ua a’afia ai ni ta’avale se tolu.

Ina ua taunu’u leoleo i le nofoaga na tupu ai le fa’alavelave, sa molimauina ai le manu’a o le aveta’avale #3 – o se tina matua.  E le’i umi, ae taunu’u le vaega a le EMS ma togafitia le tina matua.

Na faapea foi ona togafitia le alo o le tina ia Tualapalapa Fonoti, lea na molia, ona o ni ma’osia i lona muaulu ma ni manu’a i lona laugutu pito i luga.  I le fa’atalatalanoaga a leoleo ma Tualapalapa, sa ta’ua e le tina ia lona le iloa o le taimi na tupu ai le fa’alavelave.

I lana faamatalaga, sa ta’ua e Tualapalapa lona matapogia ma ina ua toe malamalama ifo, ua feto’ai lana taavale ma isi taavale.  Sa fa’atonuina e leoleo ia le na molia, e faasino atu le nofoaga mulimuli lava sa ia manatuaina, ae e le’i moe.  Ma na faasino iai e Tualapalapa ia le vaega o le auala, ae e le’i o’o atu i le fale (Bookworm), a’o agai atu le la taavale i le itu i Sasa’e.

Na molimauina le leai o ni manu’a i le na molia, ae na talosagaina pea le auaunaga a le vaega a le EMS.

Sa fesiligia foi le avetaavale lona lua, pe o iai ni ona manu’a.  Na tali le alii, e leai.  Ma sa faamatalaina e le avetaavale #2, le masau mai o le ta’avale a le na molia.  Ma ina ua o’o mai i tafatafa o le faleoloa a Ma, sa ia (avetaavale #2) va’aia le tifa atu o le taavale a le na molia, i le itu, o lo’o sau ai lana taavale.

Na taumafai le alii aveta’avale #2 e fa’a’e’e le pu o lana taavale, ma ta lana taavale agai i tua ma le auala, ina ia aua ne’i feto’ai a la taavale ma le ta’avale a le na molia, ae peitai, na i’u lava ina so’a e le taavale a le na molia, ia le pito i tua o lana (avetaavale #2) taavale, ma oso atu ai lana taavale i le vao.

Ae feto’ai le taavale a le na molia, ma le ta’avale sa i le pito i tua – taavale lona 3, ma feosofi uma ai taavale i tua i le vao. 

Na le’i mafai ona fa’atalanoaina e leoleo ia le aveta’avale #3 (tina matua) ona sa aveina atu o ia e le vaega a le EMS mo togafitiga.

O le aso 26 o Aperila, na fa’ato’a maua  e leoleo le avanoa e talatalanoa ai ma le aveta’avale #3 ma sa ta’ua e le tina le fa’ate’ia o ia, i le mea sa tupu.  Na ia ta’ua le masau tele o le alu atu o le ta’avale lea sa alu atu i leisi itu auala, ma tifa atu i le latou itu, ma fetaui ai a la taavale ma oso ai lana taavale i tua ma le auala.

Na molia ia Tualapalapa Fonoti i le moliaga o le Ave Ta’avale ma le le faautauta, na manu’a ai se tagata.  O se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga e tasi, po o se sala tupe e $1,000; po o faasalaga uma e lua.

E leai se vaegatupe na fa’atulagaina, e tatalaina ai le na molia, a’o fa’agasolo lana mataupu i le faamasinoga.

LAVEA’I SE TAGATA SAVALI I HONOLULU MA AVEINA ATU I LAIE

O le aoauli o Iulai 8,2025, sa fa’asaoina mai ai e vaega tineimu i Honolulu, ia se tamaitai e 47 tausaga le matua, sa alu sana savaliga i luga o mauga, ina ua manu’a ma le mafai ai ona fa’auau lana savaliga.  

Na mafai ona vala’au lenei tamaitai i le 911 mo se fesoasoani, ma o le aoauli ananafi na mauaina atu ai o ia.

Ina ua mae’a su’esu’ega ma iloiloga a le vaega tineimu, sa faapea loa ona fa’aaogaina se va’alele e aumai ai le tamaitai i Laie ma tu’uina atu o ia i a’ao o le vaega a le EMS mo a latou togafitiga.