POU TIUTE A LEOLEO

Pago Pago - AMERIKA SAMOA

FE’ESE’ESEA’I SE TAMAITAI MA SANA UO TAMA I LE NOFOAGA E GASESE AI LE TO’ANA’I O LE ASO SA A TINA

O le aso 6 o Me, 2025, na o’o atu ai se tina ma sona alo tamaitai, i le Ofisa a Leoleo i Tafuna, ma faila se la tagi e fa’asaga i le uo tama a le alo tamaitai, ona o le sauaina o ia, i lo latou fale.

E tusa ai ma fa’amaumauga a le faamasinoga, o le susuga ia Pulumu Fifita – o le uo tama a le tamaitai na a’afia – sa molia i lenei mataupu.

I le fa’amatalaga a le tamaitai na a’afia, i leoleo, sa oso le le fiafia o Pulumu, ona o le fe’ese’esea’i o la manatu, i le umukuka e gasese ai le toana’i mo le Aso Sa o Tina.  

Sa Mana’o Pulumu (lea na molia) e gasese le pua’a i le latou fale, ae peitai, na le mana’o ai le tamaitai na a’afia.  Ma na i’u le la fe’ese’esea’iga i le laulauvavale o le alii na molia, i le gagana fa’a Tonga.

Sa ta’ua e le tamaitai na a’afia, ia lona savali agai i le umukuka, ae alu atu le na molia, i le tatu’i lona ulu ma lona manava.  Ma fai atu o le a ia fasi ina o ia.  Na ta’ua e le tama’ita’i lona taumafai e tuli le na molia, i fafo ma le fale, ae tali atu le na molia, e leai seisi e fefe i tagata o le aiga a le tamaitai na a’afia.

E ui ina sa fautuaina e leoleo ia le tamaitai na a’afia, ina ia o mai le vaega a le EMS e togafitia ona manu’a, ae peitai, sa tete’e le tamaitai.

Sa faatalanoa foi e leoleo ia le tina o le tamaitai na a’afia, ma sa ia faamatalaina lona nofonofo i totonu o le latou potu malolo, ae ona fa’alogoina le taua’imisa mai a lona alo tamaitai ma lana uo tama, i totonu o le umukuka.

Ona ia va’aia lea le tu’iina e le na molia, ia lana tama teine, i le manava, ma ia (le na molia) palauvale i lana tama teine.  Atoa ai ma le fa’afefeina e le na molia, ia lana tama teine, i le oti, ae nana lona tino i le ma’umaga.

Ina ua mae’a ona fa’atalanoaina e leoleo ia le tina ma lona alo tamaitai, sa faapea loa ona o latou agai atu mo le sailiga mai o Pulumu (le na molia) ma sa maua atu o ia i Leone, lea na aumai fa’apagota ai o ia, e leoleo.

A’o faatino tiute a leoleo, i le aumaia o le na molia i le ofisa a leoleo, sa o latou sosogia le malosi o le manogi pia a le na molia.

Ma ina ua fa’atalanoaina o ia e leoleo i le ofisa a leoleo, sa te’ena e le alii ia le tu’ua’iga, e faapea sa o’o lona lima i le tamaitai na a’afia.  Sa ta’ua e le na molia, ina ua amata ona faapisapisa atu le tamaitai na a’afia, sa ia tu i luga ma alu loa i le latou fale.

Na faapea ona lokaina o ia i lea lava aso, i le to’ese i Tafuna.  Ma o ona moliaga, na aofia ai le Faatupu Vevesi i totonu o le aiga ma le Fa’ao’olima i lona tulaga e tolu.

O le moliaga o le fa’atupu vevesi, o se vaega ‘C’ i solitulafono mama, e mafai ona nofosala ai i le to’ese, e o’o atu i aso e 15, po o se sala tupe e $300; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala i le o’ese, e o’o atu i aso e 15; po o se sala tupe e $1,000; po o faasalaga uma e lua.

E $2,000 se vaegatupe na faatulagaina e mafai ona tatalaina ai le na molia, mai i le falepuipui, e fa’atalitali ai lona faamasinoga.

VALA’AU SE FA’ATAU OLOA I LEOLEO ONA O SE TAGATA FA’ATAU FA’ASUAAVA

O le afiafi o le aso 2 o Me, 2025, na fa’afeso’ota’i atu ai e se fa’atau oloa ia le Ofisa a Leoleo i Fagatogo, mo se fesoasoani, ona o se alii fa’atau, o lo’o faatupu vevesi i totonu o le faleoloa.

E taunu’u atu leoleo, ua sola ‘ese le na molia, ae sa mafai ona toe ave faapagotaina o ia, i se taimi mulimuli ane.

E tusa ai ma fa’amaumauga a le faamasinoga, sa ta’ua e le fa’atauoloa mai i le Pago Mart, le alu atu o le susuga ia Pauloa Oloa – lea na molia i lenei faalavelave – i le faleoloa, ua fa’asuaava ma sa la’ei sona ofutino ma ofuvae lanu moana.

Ma na ta’ua e le fa’atau oloa e faapea, ona o le tau i le ua a le na molia, sa na’o le fetaui i tagata fa’atau ma sa taumafai foi le alii na molia, e sikipi le laina fa’atau, ae ina ua fa’atonu atu o ia e alu i tua o le laina, sa faapea ona palauvale mai le na molia ia te ia.

Ma sa ta’ua foi e le fa’atauoloa le le ano ifo o le na molia, ina ua fai atu iai, o le a vala’au leoleo.

Ina ua taunu’u leoleo i le faleoloa na tupu ai le fa’alavelave, ua leai Pauloa ae sa va’aia o ia, o lo’o savali atu aga’i i le falesa Mamona.

Sa fa’aali atu e le fa’atauoloa i leoleo ia ata vitio sa pu’eina i le masini pu’e ata a le faleoloa.

Ma aga’i atu loa leoleo e saili ia Pauloa, ma mauaina atu o ia, o savali lava ma palauvale.  Sa faapea ona ave faapagotaina o ia e leoleo, ma momoli atu i le ofisa a leoleo.

Ae peitai, ona sa tau i le ua ia le na molia, sa faapea loa ona aveina o ia i le to’ese i Tafuna, e faatalitali ai lona faamasinoga.

O moliaga a na faia fa’asaga ia Pauloa, na aofia ai le Solivale o fanua ma fale ma le Faatupu Vevesi i nofoaga lautele.

O nei moliaga, o ni vaega ‘B’ i solitulafono mama, e mafai ona nofosala ai i le falepuipui, e o’o atu i le ta’i ono masina i le moliaga, po o se sala tupe, e ta’i $500; po o faasalaga uma e lua.