POU TIUTE A LEOLEO

Pago Pago - AMERIKA SAMOA

LOKA SE TAMALOA I LE NOFO MA FA’AFEFE SE TASI I SE NAIFI

O le po o Aperila 3, 2025, na vala’au atu ai se alii i le Ofisa a Leoleo i Tafuna, e ripotia se tagata na alu atu i totonu o lona potu ma se naifi ma faafefe ai i la’ua ma lana pa’aga.

Sa ta’ua e le alii na valaau i leoleo, o le alii lea na alu atu ma le nofo, e nofo totogi i lona fale ma sa ia taumafai  e tatala le faitoto’a o le la potu, i totonu o le fale o lo’o mautotogi ai.

Ina ua taunu’u leoleo i le nofoaga na tupu ai le faalavelave, sa muai fa’atalanoa ia le alii na valaau atu i le ofisa a leoleo ma na ia ta’ua e faapea, e la te nonofo faatasi ma le na molia, i le fale nofo totogi e tasi.  Ae peitai, na alu atu le na molia ma taumafai e tatala lona potu, a’o fa’asuaava.

Ma sa ta’ua e le na valaau i leoleo, le fealuai o le na molia ma se naifi i totonu o le latou fale ma o lona fefe ina ne’i faia e le na molia se tulaga ia te ia i le naifi, o lea na ia vala’au ai i leoleo.

Ina ua mae’a ona fa’atalanoaina e leoleo ia le alii na valaau atu i le ofisa a leoleo, sa o latou agai atu loa i le potu a le na molia, le susuga ia Filipo Fa’aola, ma lokaina mai ai o ia.

Sa faamatalaina foi e seisi na a’afia i lenei mataupu, e fo’i atu mai i sana fa’atauga, o lo’o tu Fa’aola i luma o le latou fale.  Ma na fa’afetaui atu o ia e Fa’aola, i lona fa’apea atu, e alofa ia te ia.  Ae peitai, sa na le amana’ia le faamatalaga a Fa’aola, ma savali sa’o i totonu o lona potu, ae mulimuli atu ai ia Fa’aola ia te ia, ma fesili atu pe mafai na la a’ai fa’atasi.  Ma na ia tali mai iai, e leai ma alu e fai sana malologa.  

O se taimi mulimuli ane, na savavali mai i fafo ia le na valaau i leoleo ma le alii lona lua ma fa’atonuina Fa’aola ina ia aua le toe fa’alavelave atu ia i la’ua, ae o la va’aia le u’uina e Fa’aola, o se naifi.  

O moliaga na faia faasaga ia Fa’aola, na aofia ai le Faatupu Vevesi i totonu o se aiga ma le Fa’ao’olimai lona tulaga e tolu.  O nei moliaga, o ni vaega ‘C’ i solitulafono mama, e mafai ona nofosala ai i le falepuipui, i le ta’i 15 aso, po o se sala tupe e $300; po o faasalaga uma e lua.

E $1,000 na fa’atulagaina e mafai ona tatalaina ai le na molia mai i le falepuipui, e fa’atalitali ai lona faamasinoga.

FETO’AI NI PASIKA SE LUA, LOKA AI LE TO’ATASI

E tusa ai ma fa’amaumauga a le faamasinoga, o le aoauli o le aso 31 o Mati, 2025, na fa’afeso’ota’i mai ai e le Ofisa a Leoleo i Fagatogo, ia le Ofisa a Leoleo i Tafuna, e tusa ai ma se fa’alavelave na tula’i mai i Iliili, ina ua feto’ai ni pasika se lua, i tafatafa o se faleoloa.

Sa ripotia mai ai foi le manunu’a uma o la’ua na fa’afoeina ia pasika.  Ae o se taimi mulimuli ane, na o le to’atasi na molia i lenei fa’alavelave.

E taunu’u leoleo i le nofoaga na tupu ai le fa’alavelave, ua mae’a ona vala’au ia le vaega a le EMS, ae o lo’o ta’atitia i la’ua na fa’afoea ia pasika, i luga o le alatele.  O i la’ua na manunu’a i le fa’alavelave, o le alii o Ionatana Samu ma le tamaitai o Tagi Tausiga.

Ina ua taunu’u ia le vaega a le EMS sa faapea ona aveina atu loa Samu ma Tausiga i le falema’i mo le togafitiga o la manu’a.

O manu’a a Samu, na aofia ai le a’afia o lona isu, fula lona gutu ma lona mata tauagavale.  Ma sa ia ta’ua foi le tiga o lona ulu, atoa ai ma ma’osia i ona vae ma lima.

Ae o Tausiga, na fula lona uso ma se ma’osia tele i luma o lona muaulu faapea tua o lona lima tauagavale.  Ma na ia ta’ua foi le tiga o lona ua ma lona tua.

Na fa’amatalaina e Samu e faapea, sa masau le alu atu o le pasika a Tusiga i luga o le alatele, i le itu na alu atu ai lana pasika, a’o ia agai atu i luga o le alatele.  Ma sa ia taumafai e ta ‘ese lana pasika ae peitai, ua tuai ma o la feto’ai ai.

Ae i le faamatalaga a Tausiga, e na te le’i iloa atu ia Samu ma sa ia taumafai e talotalo atu iai e alu ese, ae peitai, ua tuai.  Ma na ia taumafai e tu i le vae taofi, ae ua le mafai ona alo’ese mai i le feto’ai ma Samu.

I le fa’ai’uga a leoleo na faapea ona molia ai loa Tausiga i le ‘ave’ave ma le le fa’autauta faapea ma le leai o sana laisene.  O nei moliaga, o ni vaega ‘B’ i solitulafono mama, e mafai ona nofosala ai i le o’o atu i le ono masina, po o se sala tupe i le $500; po o fa’asalaga uma e lua.

E leai se vaegatupe sa fa’atulagaina e mafai ona tatalaina ai le na molia, e faatalitali ai lona faamasinoga.