POU TIUTE A LEOLEO

Pago Pago - AMERIKA SAMOA

LOKA SE ALII I LE FAAFEFE O LONA TUAFAFINE I SE NAIFI

O le afiafi o Mati 28, 2025, na valaau atu ai se tamaitai i le Ofisa a Leoleo i Leone ma ripotia iai sona tuagane, e suafa ia Semisi Lenati (lea na i’u ina molia i lenei mataupu), ina ua alu atu lona tuagane ia te ia ma se naifi.

Na agai atu leoleo i le nofoaga na tupu ai le fa’alavelave ma fa’atalanoaina ai le tamaitai na valaau atu i le Ofisa a Leoleo ma sa faamatalaina e le tamaitai, le fealua’i o lona tuagane, ma se naifi, i totonu o le latou fale.  Sa ta’ua e le tamaitai, o lona tuagane sa fai sana kuka, ae fa’ate’ia o ia ina ua vala’au atu lona tuagane, e aua le faia se mea e alu atu ai i le tui o ia i le naifi.

Sa ta’ua e le tamaitai na a’afia e faapea, na ita lona tuagane ia te ia, ona o le umi na talanoa i luga o le telefoni ae le alu atu e fai se mea’ai.  

Ma na ia ta’ua foi le tupu o le tulaga lava lea e tasi, i le lua vaiaso ua tuanai.  Lea sa ia talanoa ai i lona tuagane ma fai iai, e aua ne’i toe tupu se tulaga faapea – o le alu atu o lona tuagane ia te ia ma se naifi.

Ae ina ua toe tupu mai lea lava tulaga e tasi, sa tonu loa ia te ia (tamaitai), ua tatau ona vala’au leoleo mo se fesoasoani.

Ina ua mae’a ona talatalanoa leoleo ma le tamaitai na a’afia, sa ia tu’uina atu ai loa le fa’atagana i leoleo, e mafai ai ona ulufale atu i totonu o le latou fale, lea na maua atu ai e leoleo ia Lenati o saofai mai i luga o le nofoa i totonu o le potu malolo. 

Ma na lokaina mai ai e leoleo ia Lenati ma aveina atu loa o ia i le ofisa a leoleo i Leone, mo le fa’aauauina o a latou suesuega.

A’o faatalaoaina e leoleo ia Lenati i le latou ofisa, sa ta’ua e Lenati le fai so’o o le mea le la a lona tuafafine ma e na te le malamalama, pe faavalevalea pe leaga le ulu.

Na molia ia Lenati i le faitauga e tasi o le Faatupu Vevesi i totonu o lona aiga, o se vaega ‘C’ i solitulafono mama, e mafai ona nofosala ai i le falepuipui, e mafai ona o’o atu i aso e 15, po o se sala tupe e $300; po o fa’asalaga uma e lua.

E $300 se vaegatupe na fa’atulagaina e mafai ona tatalaina ai i tua le na molia, e fa’atalitali ai lona faamasinoga.

LOKA SE ALII FITI I SAMOA, NA MALAGA ATU MAI TUTUILA, ONA O FUALAAU FAASAINA

O le aso Tofi o le vaiaso ua tuanai, sa lauina ai le fa’asalaga fa’afalepuipui, a le susuga ia Rupeni Luvu, i luma o le Faamasinoga Maualuga a Samoa, e le Afioga i le alii faamasino ia Leiataualesa Daryl Clarke.

O luvu, o se alii Fiti ma Amerika Samoa, e 55 tausaga le soifua.  Sa ia tali ioe i ona moliaga o le faitauga e tasi, i lona umia o se vaega o fualaau faasaina (Aisa) ma le faitauga e tasi o lona umia o se paipa.

E tusa ai ma fa’amaumauga a le faamasinoga, o le taeao o le aso 20 o Mati, 2025 na tu lau’ele’ele ai Luvu i le malae vaalele i Faleolo, mai i se faigamalaga a le Talofa Airways, mai i Amerika Samoa.  Ma sa iai se fuafuaga, e fa’aauauina le faigamalaga a le ua ta’usalaina, i Niu Sila.

Ae peitai, ina ua fa’ataina lana ato e le vaega o Tiute, sa masalomia ai se ata o se paipa i totonu o le ato a Luvu.

Ma sa faapea ona tatalaina ai e le aufaigaluega a le ofisa o Tiute ia le ato a le na ta’usalaina, ma maua ai se tama’i ato lanu uliuli, o iai se taga pepa i’ila o iai ni vaega o fualaau faasaina, lea sa mafai ona faamaonia, i su’esu’ega na faia.

E le gata i lea, na maua ai foi i totonu o le ato a le na ta’usalaina, ia se paipa lea e masani ona fa’aaogaina  ma fualaau faasaina.

I ripoti a leoleo, o lo’o faapea ona fa’amaumauina ai se faamatalaga a le ua ta’usalaina, ia lona fa’ato’a tagofia o le Aisa, pe a fai a latou evaga ma ana uo.

Sa fautuaina e le alii faamasino ia Luvu e tusa ai ma faafitauli e feagai ma se tasi e tagofia ia fualaau faasaina.  Ae le gata i lea, o le malamalama o Luvu i faafitauli e tula’i mai, pe a ia tauaveina atu ia Fualaau faasaina i totonu o Samoa.

E 18 masina sa fa’asalaina ai Luvu, i le falepuipui, ae na to’esea ia masina ua mae’a ona lokaina ai o ia ma totoe ai masina e ono, e tuli .  A mae’a ona tuli lona faasalaga, ua fa’atonu le toe fa’afo’i mai o le alii i Amerika Samoa, lea ua fautuaina ai o ia e le alii faamasino, ina ia auai atu i ni polokalama e mafai ona suia ai lona olaga mai i le toe tagofia o fualaau faasaina.