POU TIUTE A LEOLEO

Pago Pago - AMERIKA SAMOA

MOE LE AVETA’AVALE NA LAVEA AI SE ALII NA KOLOSI LE AUALA

O le taeao o le aso 20 o Fepuari, 2025, na vala’au atu ai le susuga ia Filipo Filipo i le Ofisa a Leoleo i Fagatogo, ma fa’ailoa atu i leoleo lona so’aina o se tagata i luga o le auala, ina ua moe, a’o ia fa’afoeina se tasi o ta’avale mo tama ma tina matutua (Dial-a-Ride).

A’o aga’i atu leoleo i le nofoaga na tupu ai le faalavelave, sa toe o’o mai seisi vala’au, e fa’atatau i le tagata na so’a e Filipo.  Fai mai le vala’au, o lo’o ua fa’atopetope atu le na manu’a i le fa’alavelave i se ta’avale tua, e fa’afetaui le ta’avale a le EMS.

Ma ina ua taunu’u leoleo i le nofoaga na tupu ai le fa’alavelave, sa va’aia se pasese o saofa’i mai i totonu o le ta’avale a le ‘Dial-a-ride’, ma o lo’o fusi lona fusipa’u taavale.  Na faapea ona fesoasoani le aveta’avale a le ta’avale, i leoleo, i le aumaia i fafo o lea pasese ma tu’uina o ia i totonu o le ta’avale a leoleo, ina ia fa’ao’o atu o ia i le LBJ mo lana talavai.

Ina ua fa’atalanoaina e leoleo ia le susuga ia Filipo, sa ia faamatalaina i leoleo, lona alu atu e piki mai lana pasese ua mae’a ona fa’atulagaina mo lea taeao, e ave atu i a lana talavai masani.

Ae peitai, a’o ese mai le la la taavale mai i le fale a le pasese, sa moe o ia ma oso ‘ese ai le taavale mai i le auala.  Sa fesiligia e leoleo ia Filipo pe na ia va’aia le tagata lea sa kolosi i le auala, ae tali le na molia, e leai.  Sa ta’ua e le susuga ia Filipo, o le ‘e’e mai o lana pasese e va’ai le auala, na fa’ato’a ia malamalama a’e ai, ae ua tupu le faalavelave.

Na toe fesiligia e leoleo ia le na molia, e tusa ai ma lana sifi mo le Dial-a-Ride, lea sa fa’amalamalama iai e Filipo, e amata mai i le 10 i le po ma o lana pasese mulimuli lava lea, ae tupu loa le fa’alavelave.

O le taeao lava lea e tasi, sa agai atu ai leoleo i le falemai e siaki ai le tagata na so’a e Filipo.  Ma e taunu’u leoleo, ua mae’a ona togafitia ia le alii na so’aina e Filipo.  Ma o ona manu’a na aofia ai lona a’ao ma lona papatua.  Sa mafai ona malaga i le fale, ia le na a’afia, i lea lava taeao.

Ae o moliaga a le susuga ia Filipo, na aofia ai le Aveta’avale ma le le fa’autauta na manu’a ai se tagata, o le moliaga i lona le fa’aeteete faapea ai ma le moliaga, i lona fa’alealegaina o se fa’ailo mo tsunami, lea na tu i autafa o le auala.

O nei moliaga uma e tolu, o ni vaega ‘B’ i solitulafono mama, e mafai ona nofosala ai i le falepuipui, e o’o atu i le ta’i ono masina, po o se sala tupe e ta’i $500 i le moliaga; po o faasalaga uma e lua.

E leai se vaegatupe sa faatulagaina e mafai ona tatalaina ai le na molia, mai i le falepuipui, e faatalitali ai lona faamasinoga.

MOLIA SE TAMAITAI I LE FA’ATUPU VEVESI A’O FA’ASUA’AVA

E tusa ai ma fa’amaumauga a le faamasinoga, o lo’o ua ta’ua ai le vala’au atu ole Masela a le Faamasinoga i le Ofisa a Leoleo i Fagatogo, e ripotia ai se tamaitai o lo’o lu’iina tagata e latou te fufusu, ma palauvale solo, i luma o le fale mata’aga o lo’o i luga o le Malae o le Talu, i Fagatogo lava.

E taunu’u atu leoleo, ua o’o le sauniga a le na molia, i le maketi lea sa ia lu’iina ai nisi o le mamalu lautele, o lo’o feosofi i luga o se pasi.  Ma e taunu’u atu leoleo, ae fa’asaga mai iai lenei tamaitai ma fa’aauau mai lana sauniga i leoleo.

Na fiu leoleo e taumafai e fa’ato’afilemu le tamaitai, ae peitai, sa fa’aauau pea le pisa o le na molia ma i’u ai ina taumafai leoleo e lokaina o ia.  Ae na fa’afaigata ona o le tafiti solo o le tamaitai.  Ma i’u ai ina ona sauaina leoleo. Sa i’u ina tosoina mai e leoleo ia le tamaitai, i le u’uina o ona lima.

Na fa’aauauina atu ai lava le sauniga a le na molia i le ofisa a leoleo, ae ua fa’aopoopo iai ma lona taufa’amata’u i leoleo.  Na o’o lava i laulau, faitoto’a ma le ‘wall’ o le ofisa a leoleo, na o’o iai le to’atama’i a le tamaitai na molia.

O lea, na ave sa’o ai loa o ia e leoleo i le to’ese i Tafuna.  Ma o le mafua’aga lea na le maua ai e leoleo lona suafa, ae peitai, o se taimi mulimuli ane, na fa’amaonia ai le suafa o le tamaitai, o Puapuagaimoana Iolama.

O ona moliaga na aofia ai le Faatupu Vevesi i nofoaga faitele, faapea ai ma le Tete’e a’o taumafai leoleo e avefaapagotaina o ia, atoa ai ma le moliaga i lona Fa’aleagaina o ni meatotino, i lona tulaga e tolu.

O moliaga o le faatupu vevesi ma le faaleagaina o ni meatotino, o ni vaega ‘B’ i solitulafono mama, e mafai ona nofosala ai i le o’o atu i le ta’i ono masina, po o se sala tupe e ta’i $500 i le moliaga e tasi; po o fa’asalaga uma e lua.

O le moliaga o le tete’e a’o taumafai leoleo e avefa’apagota, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

E $1,000 se vaegatupe ua mae’a ona fa’atulagaina e mafai ona tatalaina ai le na molia, e fa’atalitali ai lona faamasinoga.