POU TIUTE A LEOLEO

Pago Pago - AMERIKA SAMOA

TU’UA’IA E SE TAMALOA IA LONA TO’ALUA MA LONA TINA NA MAFUA AI ONA IA SAUAINA LONA AFAFINE

O le po o Mati 22, 2025 na o’o atu ai se valaau i le Ofisa a Leoleo i Fagatogo, ina ua fa’alogoina e tuaoi ia le ‘e’e mai o se teineititi mai lo latou fale.  Ma e tusa ai ma fa’amaumauga a le faamasinoga, i le ripoti a le tuaoi na vala’au atu i le ofisa a leoleo, sa ta’ua ai le sauaina e se tamaloa o sona afafine e 12 tausaga.

Na iloa mulimuli ane, le tu’i ina e le tamaloa o le isu a lona afafine.

Sa agai atu leoleo i le nofoaga na tupu ai le fa’alavelave ma mua’i talanoa ma le tuaoi lea na vala’au mai i le ofisa a leoleo.  Na ta’ua e le tuaoi lona fa’alogoina o le ‘e’e mai o le teineititi mai lo latou tuaoi, a’o fai le latou Bingo.

Ina ua mae’a ona talanoa leoleo ma le tuaoi, sa faapea ona fa’asino e le tuaoi i leoleo, le fale sa tupu ai le fa’alavelave.

I le taunu’u o leoleo i le fale o le aiga na tupu ai le faalavelave, sa o latou molimauina ni manu’a i le teineititi 12 tausaga.  Na aofia ai le toto o lona isu, o ni ma’iloga lanu mumu i tua o ona taliga ma lona lima taumatau faapea ma le ma’osia o lona tuli taumatau.

Sa faatalanoaina e leoleo ia le teineititi ma fesiligia o ia pe na faapefea ona manu’a lona tino, sa tali le teineititi, na ita lona tama ona sa alu i le tafao i le fale a sana uo.  Ma ina ua ia toe fo’i atu i le fale, na taumafai lona tama e fasi o ia, ae peitai, sa oso atu lona tina ma taofi.

Ae ina ua alu le teineititi e ta’ele, na alu atu lona tama ma futi mai lona ulu ma tu’i lona isu.

Na fesiligia foi le teineititi, e leoleo, pe sa ‘e’e atu lona tama ia te ia, pe na palauvale atu foi.  Ae sa tali le teineititi, e leai.

Ina ua faatalanoaina e leoleo ia le tina o le teineititi sa a’afia, na ia faamatalaina le faia o se inuga pia a lona to’alua (le na molia) i le fale, ae ona fa’alogo atu o su’e e lona (tina) tina ia ia lana tama teine (le na a’afia).  O iina na le fiafia ai le na moia ma ia tago i le futi le ulu a lona afafine ma tu’i lona isu, lea na mafua ai ona toto.

Sa ta’ua e le tina lona oso atu ma taofi lona to’alua.  Ma sa ia ta’ua le ita gofie o lona to’alua (le na molia) pe a fa’asuaava.

Na faapea ona lokaina mai e leoleo ia le na molia, ma aveina atu o ia i le ofisa a leoleo i Fagatogo mo le fa’aauauina o a latou su’esu’ega.  Ma na fa’afeso’ota’i foi e leoleo ia le vaega a le EMS mo sa latou auaunaga i le teineititi na a’afia.

Ina ua taunu’u leoleo ma le aiga na a’afia, i le ofisa a leoleo.  Sa fa’apea ona aveina le na molia, i se potu, mo le fa’atalanoaina.  Lea sa ia fa’ailoa atu ai i leoleo, e na’o lona po ina o lona afafine ae na te le’i tu’i ina o ia. 

Sa ta’ua e le na molia, ua amata ona tuai atu lona afafine i le fale, i taimi e tu’ua ai a’oga.  Ma e leai sona mana’oga e fa’ao’o se tiga i lona afafine, ae o lona to’alua ma le tina o lona to’alua, lea e u’una’ia o ia e fasi lona afafine, ona o le le usiusita’i.

Ina ua mae’a su’esu’ega a le EMS i le teineititi na a’afia, i lea afiafi, sa aveina atu loa o ia i le falemai mo le fa’aauauina ona siaki o ia.  Ma ina ua mae’a, sa faapea ona ia toe fo’i atu i lona aiga.

O moliaga ua faasaga i le na molia, na aofia ai le Faatupu Vevesi i totonu o le aiga, Fa’ao’olima i lona tulaga e tolu, faapea ma le moliaga i le faia o se gaioiga e a’afia ai le saogalemu o se fanau iti.

O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

O moliaga o le fa’ao’olima ma le faia o se tulaga e a’afia ai fanau iti, o ni vaega ‘A’ i solitulafono mama, e mafai ona nofosala ai i le ta’i tausaga, po o se sala tupe, e ta’i $1,000; po o fa’asalaga uma e lua.

E $5,000 na fa’atulagaina e mafai ona tatalaina ai le na molia, mai i le falepuipui, e fa’atalitali ai lona faamasinoga.

TAIA SE TAMAITITI 10 TAUSAGA I SE TAAVALE

O le taeao o le aso 14 o Mati, na o’o atu ai se vala’au i le Ofisa a Leoleo i Tafuna, e tusa ai ma se tamaititi e 10 tausaga le matua, na taia i se ta’avale.

Sa faatopetope atu leoleo i le nofoaga na tupu ai le fa’alavelave ma fa’atalanoaina ia le aveta’avale.

Na molimauina e leoleo ia ni manu’a i le tamaititi na lavea, na aofia ma le tulaga faaletonu o lona vae taumatau.  Sa vala’au loa e leoleo ia se EMS ma aveina atu ai le tamaititi na  lavea, i le falemai.

E tusa ai ma le faamatalaga a le tamaitai aveta’avale, a’o agai atu lana taavale i Sisifo, sa tu lana taavale i le auala kolosi, ina ia mafai ona sopoia e tagata ia le alatele.  Ma ina mae’a sa toe amata loa ona alu lana taavale.  Ae o le taimi lea na tamo’e atu ai le tamaititi ma taia i le itu tauagavale o lana taavale.

Sa ta’ua e le tamaitai avetaavale, le alu o lana taavale i le masau e masani ai ma e na te le’i iloa atu le tamaititi, se’ia o’o ina latalata atu i lana taavale.

Na ta’ua foi e se molimau na iai i le taimi na tupu ai le fa’alavelave, sa fa’afuase’i ona tamo’e le tamaititi agai i le taavale.

O le aoauli o lea aso, na o’o atu ai leoleo i le falemai mo se ripoti e tusa ai ma manu’a a le tamaititi na lavea.

Ae o le moliaga sa faia e faasaga i le tamaitai aveta’avale, o le Aveta’avale le fa’autauta na manu’a ai se tasi, o se vaega ‘B’ i solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

E leai se vaegatupe na fa’atulagaina, e mafai ona tatalaina ai le na molia, mai i le falepuipui, e faatalitali ai lona faamasinoga.

SAUAINA SE TAMAITAI ONA O LE TE’ENA O TUINANAUGA A SE ALII

E tusa ai ma fa’amaumauga a le fa’amasinoga, o le taeao o le aso 17 o Mati, 2025, na o’o atu ai se vala’au i le Ofisa a Leoleo i Leone ona o se misa i le va o se alii ma se tamaitai, leia na i’u ina molia ai le susuga ia Ilalio Polevia, i lona fa’ao’olima i le tamaitai.

E tusa ai ma su’esu’ega a leoleo, na fa’aalia ai e faapea, e tasi le masina talu ona nofo le tamaitai na a’afia i le fale a Polevia, ona ua leai se aiga e mafai ona alu iai le tamaitai.

Ma i le taimi sa tupu ai le fa’alavelave, sa taumafai se molimau e u’una’i ese ia Polevia mai i lona sauaina o le tamaitai na a’afia ma sa faapea foi ona fesoasoani le molimau i le aoina o lavalava ma ave’eseina ia le tamaitai na a’afia, mai i le fale a Polevia.

O lo’o ta’ua i fa’amaumauga a le faamasinoga e faapea, e nonofo faatasi uma ia Polevia, o le molimau ma le tamaitai na a’afia.

Sa fa’atalanoaina foi e leoleo ia le tamaitai na vala’au atu i le ofisa a leoleo ma sa ia faamatalaina, lona pasi mai i le fale a le na molia, i lena taeao, ma ona molimauina le sauaina e le na molia, o le tamaitai na a’afia, i luma o le fale.

O le te’a laititi o le fitu i lea lava taeao, na taunu’u ai leoleo i le nofoaga na tupu ai le fa’alavelave, ma va’aia se tamaitai o saofa’i i luga o le auala sima i tafatafa o le alatele.  Ma  sa faapea ona fa’atalanoaina o ia e leoleo.

Na fa’amatala e le tamaitai na a’afia i leoleo, le ia o le na molia, ia te ia, ina ua na talitualimaina mana’oga fia faiaiga a le na molia.  Ma o le tete’e o le tamaitai na a’afia, i mana’oga a le alii na molia, sa faapea ona avea ma tulaga na tuli’esea ai le tamaitai na a’afia, e le alii na molia.

Sa ta’ua e le tamaitai na a’afia, a’o ia teuina lana ato, sa ia tali upu atu i le na molia ma o le mafua’aga lea na savali atu ai le alii ma amata ona tatu’i lona ulu, e o’o lava i le taimi na ia savali mai ai i fafo ma le fale.

Ma na ta’ua e le tamaitai na a’afia, le fa’aauau ona sauaina o ia e le na molia, se’ia o’o ina ona pa’u i luma o le fale.  Ae na mafai ona oso atu le na molimau ma u’una’i ‘ese ia le alii na molia.

Sa te’ena e le tamaitai na a’afia, ia se auaunaga a le vaega a le EMS.

I le fa’atalanoaga a leoleo ma le molimau, sa ia ta’ua le tupu o le fa’alavelave, a’o ia ta’oto’oto i lona moega.  Sa ia fa’alogo mai i le taugaupu a Polevia ma le tamaitai na a’afia, ma le amata ona vevela o Polevia ma sa ia molimauina foi le sauaina e Polevia o le tamaitai sa a’afia, i luma o le fale.  O le mafua’aga lea na ia oso atu ai ma u’una’i ‘ese ia Polevia.

Sa faapea ona ave faapagotaina e leoleo ia Polevia i le latou ofisa i Leone mo le fa’aauauina o a latou suesuega.  Ina ua o latou taunu’u i le ofisa a leoleo, na talosagaina e Polevia ia se auaunaga mai i le vaega a le EMS.

Ae peitai, e ui ina sa fautuaina e le vaega a le EMS ia le aveina o Polevia i le ER mo sona togafitiga, i se manu’a tuai ua toe a’afia ona o le faalavelave na tupu, e le’i faia lea tulaga.

Sa molia ia Polevia i moliaga o le Faatupu Vevesi i totonu o aiga ma le Fa’ao’olima i lona tulga e tolu.

O le moliaga o le fa’atupu vevesi, o se vaega ‘C’ i solitulafono mama, e mafai ona nofosala ai i le falepuipui i le o’o atu i aso e 15, po o se sala tupe e $300; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala i le falepuiui, e o’o atu i le tausaga e tasi, po o se sala tupe e $1,000; po o faasalaga uma e lua.

E $3,000 se vaegatupe na fa’atulagaina e mafai ona tatalaina ai i tua le na molia, e faatalitali ai lona faamasinoga.

The defendant’s bail was set at $3,000.