POU TIUTE A LEOLEO

Pago Pago - AMERIKA SAMOA

TAPA SE FALEKALAPU I LEOLEO INA UA MISA LE AU ‘EVA

O le 1:33 i le vaveao o Mati 16, 2025, na vala’au ai e se fale kalapu ia leoleo mo se fesoasoani ina ua tupu se fusuaga i totonu ma fafo o le fale kalapu.

Ina ua taunu’u leoleo sa faamatalaina e se tasi o leoleo po a le fale kalapu ia le lavea o se tamaitai i le fusuaga, ina ua tau ai se fagu i ona foliga.  Ma o lo’o tuliloaina e nisi ia le na molia.

O se taimi mulimuli ane, na ave faapagotaina e leoleo ia Kolas Faagutu.

Ina ua fa’atalanoaina e leoleo ia Faagutu i le ofisa a leoleo, sa ia ta’ua lona tu tu i autafa o le fale le ta’ua i totonu o le fale kalapu, ae savali atu i totonu ia se tamaloa, ae tu’i mai e se tagata.

Ae na liliu mai le tamaloa ma tu’i ia Faagutu o lo’o tu ai iina, e ui ina sa fai atu iai Faagutu e le o ia na tu’iina o ia.  Ma ave ai loa e leoleo po o le fale kalapu ia Faagutu, i fafo o le fale kalapu.

Sa ta’ua e Faagutu le toe alu atu o le tamaloa lava lea e tasi ma ana uo, i le fasi o ia.  Ma ia fa’aaogaina ai se fagu pia na ia u’uina, i le togi ai le tamaloa, ae peitai na misi le tamaloa ae tau i foliga o se tamaitai.

O iina na sola ‘ese ai loa ia Faagutu.

Sa faapea ona agai atu leoleo i le falemai e asi le tamaitai na manu’a i le faalavelave.  Ma sa faamatalaina e le tamaita ia lona le malamalama i le mea sa tupu.

Ae na fai atu ana uo, sa matapogia o ia i le va o le lima ma le sefulu minute, ina ua tau le fagu i ona foliga.

O moliaga sa faia e faasaga ia Faagutu, na aofia ai le Fa’ao’olima i lona tulaga e tolu ma le Faatupu Vevesi i nofoaga lautele.

O le moliaga o le faatupu vevesi, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

O le moliaga o le faatupu vevesi, o se vaega ‘B’ i solitulafono mama, e mafai ona nofosala i le o’o atu i masina e ono, po o se sala tupe e $500; po o faasalaga uma e lua.

E leai se vaegatupe na fa’atulagaina e mafai ai ona tatalaina le na molia, e faatalitali lona faamasinoga.

MASALOMIA LE USO MATUA I LE TAGOFIA O SE VAEGA O FUALAAU FAASAINA

O le aoauli o le aso 20 o Mati, 2025, na vala’au atu ai se tamaitai i le Ofisa a Leoleo i Leone ona o lona uso matua o lo’o faatupu vevesi i totonu o le latou aiga, ma palauvale atu ia te ia ma ona matua.

E tusa ai ma fa’amaumauga a le faamasinoga, na masalomia e le tamaitai na valaau i leoleo ma ona matua, ia le tagofia o lona uso matua i vaega o fuala’au faasaina.

Ina ua taunu’u leoleo i le nofoaga na tupu ai le fa’alavelave, sa o latou talanoa ma le tamaitai na valaau atu i le ofisa a leoleo ma ona matua.  Ma sa ta’ua e le tina ma le uso a le na molia, ia le sola ‘ese o le na molia, ae na mafai ona maua e leoleo ia se faamatalaga o ona la’ei.

Sa faamatalaina foi e le uso laititi a le na molia, na amata le fa’afitauli, ina ua toe fo’i atu lona uso i le fale ae tuli e le uso laititi.  Sa faapea ona ‘e’e atu lona uso matua ia te ia ma lau o ia, ae ina ua taumafai o la matua e fa’ato’ato’a le mataupu, na liliu le uso matua ma amata ona ‘e’e ma palauvale i ona matua.

Na fa’atonuina foi e le uso matua ia le teine laititi, ina ia aua ne’i toe o’o atu i le “Aute” po o le fale a “Pegi”, ma fa’afefeina le susunuina o le umukuka a le aiga – o iina o lo’o nofo ai le tua’a a le au uso.

Sa faamatalaina e le tina, a alu atu lana tama teine matua ma amata ona faatupu vevesi i totonu o le latou aiga, a’o fetagisi ia le fanau a lana fanau.  Ma na o la taumafai ma lona toalua e fa’ato’ato’a le na molia, ae peitai, sa ia ‘e’e mai ia la’ua ma tu’ua’ia i la’ua i le nanaina o se alii e igoa ia “Peni”.

Na ta’ua e le tina lona fesiligia o le na molia, po o ai “Pegi” ae peitai, na liliu le na molia ma ‘e’e i le teine laititi.  Sa ta’ua e le tina, sa teine lelei lava si ana tama ae e le’i alu i lana uo tama o ‘Pegi’.

Ina ua mae’a ona fa’atalanoaina e leoleo ia le aiga a le na molia, sa faapea loa ona o latou agai atu i le sailiga o le na molia, ma mauaina o ia i luga o le alatele, ma aveina atu ai loa o ia i le ofisa a leoleo mo le fa’atalanoaina.

Na fa’amatala e le na molia, ia lona ita i lona uso laititi ona o le tautalaititi.

Ina ua fa’aauauina su’esu’ega a leoleo, sa fa’amaonia ai le tagofia e le na molia, ia se vaega o fuala’au faasaina ma sa alu e saili lana uo tama, o Pegi. 

O moliaga a le teine matua, na aofia ai le Faatupu Vevesi i totonu o lona aiga, o se vaega ‘C’ i solitulafono mama, e mafai ona nofosala ai i le falepupui moa so e sefululima, po o se sala tupe i le va o le $150 ma le $300; po o fa’asalaga uma e lua.

E leai se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.

MOLIA SE ALII SA FAATUPU VEVESI I LUGA O LE HAWAIIAN EA

E tusa ai ma se ripoti a le vaega fa’asalalau o le Hawaii News Now, sa ta’ua ai le ave faapagotaina ma le molia o se alii na faimalaga atu i San Diego i le aso Lua na se’i mavae atu, i luga o le Hawaiian Ea, ina ua ia ta’uina i le aufaigaluega a le va’alele, le iai o se pomu a se tagata sa nofo i ona tafatafa.

O moliaga na fa’asaga i le alii o John Stea, o le faia o se ripoti pepelo e uiga i se pomu ma le faia o se ripoti pepelo e a’afia ai le puipuiga o le saogalemu.

E tusa ai ma fa’amatalaga a leoleo, sa logoina e le aufaigaluega a le Hawaiian Ea ia le kapeteni e tusa ai ma le ripoti ua o’o atu ia i latou, e fa’atatau i se pomu i luga o le vaalele.

Ae o le taimi lea ua amata ona se’e ese le vaalele mai i le malae vaalele mo le amataina o lana faigamalaga,  Sa faapea ona toe tu le vaalele ma logoina ia leoleo ma vaega e gafa ma faalavelave fa’afuase’i.

E to’a 283 ia le pasese faapea ma le aufaigaluega e to’a 10, na faapea ona tu’ua le vaalele.

Sa faamatalaina e se tasi o le pasese e faapea, ina ua toe fo’i le vaalele i le malae vaalele, sa faapea ona fa’ailoa atu e se tasi o le aufaigaluega a le vaalele, ia i latou e tusa ai ma le toe tolopoina o le latou faigamalaga.

Ma na atoa le itula o tu le vaalele ae fa’ato’a ulufale atu ia sui o le FBI ma ave fa’apagotaina se tasi o le pasese.