POU TIUTE A LEOLEO

Pago Pago - AMERIKA SAMOA

LOKA SE ALII 23 TAUSAGA I LE FA’ASUA’AVA MA LE FAATUPU VEVESI I TOTONU O LONA AIGA

O le po o Mati 16, 2025 na fa’afeso’ota’i ai e se tamaloa ia le Ofisa a Leoleo i Fagatogo ona o lona atalii, ia Joseph Fa’atiga, o lo’o faatupu vevesi i totonu o le latou aiga.

E taunu’u atu leoleo i le fale o le aiga na tupu ai le fa’alavelave, ua sola ia Joseph mai lo latou fale.

Sa fa’atalanoaina e leoleo ia le tina o le alii na molia ma na ta’ua e le tina ia le fo’i atu o Joseph i le fale, ua fa’asua’ava, ma amata ona tatu’i le faitoto’a o le fale.  Ma o le leotele o le pa’o ma le pisa o Joseph, sa faapea ona toe feala mai ai a latou tuaoi.

Ae ina mae’a ona fa’atalanoaina e leoleo ia le tina, sa ia talosagaina le toe fa’aleaogaina o le latou tagi, ona ua le iloa po o fea ua alu ai lona alo.  Peitai, sa fautuaina o ia e leoleo ina ia toe logo atu le latou ofisa pe a toe fo’i mai le na molia, i le fale.

O le 3:44 i le vaveao, na toe valaau atu ai le tina i le ofisa a leoleo i Fagatogo, mo se fesoasoani ona ua toe fo’i atu lona alo (le na molia) ae o lo’o ia talepeina faamalama o le latou fale.

E taunu’u atu leoleo, o lo’o saofa’i mai le na molia i le fasitepu o le fogafale lua a le latou aiga.  Na faapea loa ona lokaina mai o ia e leoleo ma tu’uina i totonu o le taavale leoleo.  Sa molimauina e leoleo ia le malosi o le manogi pia o le na molia.

Ae e le’i aveina atu le na molia i le ofisa a leoleo, sa mua’i toe fa’atalanoaina e leoleo ia le tina a le na molia faapea ma se tasi o lona aiga, e tusa ai ma le valaau muamua ma le valaau lona lua.

Sa faamatala e le alii o le aiga a le na molia, na palauvale atu ia le na molia ia te ia ma lona tina.  Ma na su’e e le na molia ia sana naifi fa’amoe, lea na ia fa’alala ai e le na molia, ia le tuia ai o le alii o lona aiga.

O le vala’au lona lua, ona o le toe fo’i atu o le na molia i le latou fale ma lu’iina le alii o le latou aiga lea sa fa’atalanoa e leoleo, e la te fufusu.

O moliaga na faia fa’asaga i le na molia, na aofia ai le Faatupu Vevesi i nofoaga faitele, Faatupu Vevesi i totonu o lona aiga faapea ma le Faaleagaina o ni meatotino, i lona tulaga e tolu.

O le moliaga o le faatupu vevesi i nofoaga faitele ma le faaleagaina o meatotino, o ni moliaga i le vaega ‘B’ i solitulafono mama. E mafai noa nofosala ai i le falepuipui, i le ta’i ono masina po o sala tupe e ta’i $500; po o faasalaga uma e lua.

O moliaga o le faatupu vevesi i totonu o le aiga, o se vaega ‘C’ i solitulafono mama, e mafai ona nofosala ai i le o’o atu i aso e sefululima, po o se sala tupe e $300; po o fa’asalaga uma e lua.

E $500 sa fa’atulagaina e mafai ai ona tatalaina le na molia, e faatalitali ai lona faamasinoga.

LOKA E LEOLEO SE ALII NA FA’ASUA’AVA MA FAATUPU VEVESI I LE PAKA I FAGA’ALU

E tusa ai ma fa’amaumauga a le faamasinoga, o le po o Mati 15 m2025 na lokaina mai ai e leoleo ia le susuga ia Lana Toelupe, mai i le paka i Faga’alu, ina ua maua atu e leoleo o lo’o taumafai ni tagata e taofiofi ona ua ova le ‘ona ma fa’aumuumu ma palauvale solo.

A’o taumafai leoleo e ave faapagota le na molia, sa faapea ona ia taumafai e se’i ese ona lima ma fa’aauau ona palauvale.  Ona soso’o ai lea ma lona lu’iina o leoleo.

Sa molia Toelupe i le Faatupu Vevesi i nofoaga faitele, o se vaega ‘B’ i solitulafono mama.  E mafai ona nofosala ai i le falepuipui, i le o’o atu i le ono masina, po o se sala tupe e $500; po o faasalaga uma e lua.