POU TIUTE A LEOLEO

Pago Pago - AMERIKA SAMOA

VALAAU E NI MATUA IA LEOLEO INA UA TU'I E SANA TAMA IA LANA UO TEINE

E tusa ai ma fa’amaumauga a le faamasinoga, o le aoauli o le aso 11 o Mati, na valaau atu ai se ulugalii i le Ofisa a Leoleo i Leone ina ua pisa se la tama tama ma lana uo teine, ae masalomia ai le tu’iina e lana tama ia lana uo teine.

(Ua le lomia suafa o i latou na a’afia ma le na molia i lenei fa’alavelave, aua le puipuiga o fanau iti.)

Sa aga’i atu leoleo i lea aoauli i le nofoaga na tupu ai le fa’alavelave ma talatalanoa ma le teine a le na molia, ma sa faamatalaina e le tamaitai le toe sauaina o ia e le na molia.

Ina ua fesiligia o ia e leoleo pe na faapefea ona sauaina o ia, sa faamatala e le tamaita na a’afia le tu’i fa’alua e le na molia, o ona foliga, i se fagu ‘spray’, ae o lo’o ia si’i ina le la pepe e 9 masina.

Ma na faapea foi ona fa’ailoa atu e le tamaitai na a’afia, i leoleo, o lea na fa’ato’a tatalaina mai foi i tua ia le na molia, mai i le falepuipui, i le vaiaso e tasi.

Sa talanoa foi leoleo ma matua o le na molia, ma na o la ta’ua lo la molimauina o le fa’ao’olima o le la tama i lana uo teine.  Sa ta’ua e le tua’a a le na molia, sa ia taumafai e taofiofi lona atalii.  Ma na ia fautuaina lona atalii, o le a ia valaauina leoleo.  O iina na alu ‘ese atu ai loa lona atalii mai i le fale.

I le aoauli o lea lava aso, na aveina agai atu ai le tamaitai na a’afia i le ofisa a leoleo, mo le fa’aauauina o a latou su’esu’ega ma le togafitia o ia e le EMS.  Sa faapea foi ona valaauina le vaega a le ‘Social Services’ e fesoasoani i le na a’afia, ona o le taimi lea, e le’i maua ai e leoleo ia le na molia, ae e nofo ia le tamaitai na a’afia, i le aiga o le alii na molia.

Ina ua fesiligia e leoleo ia le tamaitai na a’afia, pe na fa’afia ona sauaina o ia e le na molia, sa tali le na a’afia, e pe a ma le fa’atolu, talu mai Mati 7.

Sa faamatala e le tamaitai na a’afia, i le aso 7 o Mati, na fai ai se la taugaupu ma le na molia ma tu’i fa’alua ai ona foliga e le na molia.  O le aso 9, sa toe tupu ai foi leisi a la fe’ese’esea’iga ma toe tu’i ai o ia e le na molia, ma pa’u ‘ese mai ai lona nifo auro.

Na ta’ua e le tamaitai na a’afia, lona le vala’auina o leoleo ona o lona fefe ina ne’i toe fasi o ia e le na molia.

O lea afiafi, na ave ai e le vaega a le Social Services ia le tamaitai na a’afia ma si ana fanau e to’alua i le nofoaga e nofo puipuia ai tina ma fanau.

O moliaga o le na molia, na aofia ai Faitauga e 1, 3 & 5, o le Faatupu Vevesi i totonu o le aiga – o se vaega ‘C’ i solitulafono mama, e mafai ona nofosala ai i le o’o atu i aso e 15, po o se sala tupe e $300; po o faasalaga uma e lua.

Ma le Faitauga 2, 4 & 6 Count 1, 3, & 5, o le Fa’ao’olima i lona tulaga e tolu – o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga atoa, po o se sala tupe e $1,000; po o faasalaga uma e lua.

E $3,000 se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.

The defendant’s bail was set at $3,000.

TOTOGI $2.1 MILIONA IA SEFO FATAI I LE LOKA SESE

E tusa ai ma se ripoti a le vaega fa’asalalau i Honolulu, Hawaii, o le Hawaii News Now, ua ta’ua ai le fa’atonuina o le malo o Honolulu, ina ia totogia se vaegatupe e $2.1 miliona ia Sefo Fatai, lea na loka sese ona o tu’uaiga i vaega o fualaau faasaina, ma i’u ai ina nofo Fatai i le alatele ona ua leai sona fale.

O le tagi a Fatai, e 50 tausaga le matua, e fa’asaga i le malo faapea nisi o leoleo i Honolulu, sa ia tu’ua’ia ai i latou i lo latou solia o ona aia tatau.  

E le’i amataina le faamasinoga a Fatai ia Novema, ae mafai ona faia se latou maliliega ma le malo.  Ae o le amataga o le tausaga, na pasia ai e taitai o le malo ia le totogia o le tupe ia Fatai.

Sa fa’aalia e Fatai le iai pea o le agaga ita ia te ia, e fa’asaga i le malo ona o le tiga sa feagai ma ia.

O le tausaga e 2011 sa galue ai Fatai i se fale inisinia ta’avale ma sa faatonu o ia e lana pule, e alu e piki mai se tupe mai ia Kristie Medford.

Ae na lilo i manatu o Fatai, o Medford sa lokaina ona o vaega o Fualaau faasaina ae ua galulue faatasi ma leoleo, ina ia pu’eina isi o lo’o fa’atauina vaega o fualaau faasaina, ae le lokaina ai o ia.

Sa ta’ua e Fatai, na o la fetaui ma Medford i le Pearl City Shopping Center ma ia fesiligia ai Medford i le tupe na tuli atu ai o ia e lana pule, ae peitai, sa taumafai Medford e faatau atu ia Fatai ia ni vaega o Fualaau faasaina,.

E ui ina sa te’ena e Fatai, ae peitai, sa taofia o ia e leoleo ma lokaina ai o ia, i moliaga o le fa’atauina mai ma le fa’atauina atu o fualaau faasaina, e ui ina e le’i mauaina se tupe po o ni fualaau faasaina i totonu o lana ta’avale.

Na fa’afa ona taumafai le ofisa loia a le malo i Honolulu e molia Fatai ae peitai sa fa’aleaogaina moliaga faasaga ia Fatai, ona o le le auai atu o Medford i taimi o faamasinoga.

Ma i le tausaga e 2018 na togi ai loa i fafo e le faamasinoga ia moliaga fa’asaga ia Fatai ma e le mafai ona toe molia ai o ia, ma tatalaina ai loa o ia mai i le falepuipui.

I tausaga na loka ai Fatai, sa faapea na tuli ai o ia mai lana galuega ma lona fale ma tu’ua o ia e le tamaitai na tu’u e la te faaipoipo.

Ina ua tatalana i tua ia Fatai, sa na’o lavalava na i lona tino sa sau i fafo ma ia e aunoa ma se tupe i lona igoa. Na ia savali i le fitu maila i le fale o lana pule, ma maua mai ai se $100.

Sa faapea ona moe Fatai i tafa ala ma galue i so’o se galuega le tumau ma ina ua mafai ona ia fa’atauina se taavale, sa faapea ona avea lena taavale ma ona fale.

O le taimi nei, e ui ina ua maua sana galuega tumau ae o lo’o fa’aauau pea ona ao atigi apa ia Fatai, e fesoasoani i se tupe e totogi ai le kesi o lana taavale.

Sa ta’ua e Fatai, o le a tele se fesoasoani i le tupe o le a ia maua, e totogi ai ana aitalafu, ae e ui i lea, e le mafai ona ave’esea ai le faigata sa ia savalia mai tausaga ua te’a atu.

E ui i le fa’ai’uga ina ia totogi tupe ia Fatai, ae peitai, o lo’o taofi mau le malo, e le o sese i latou.  Ae ua mafua ona faia lenei fa’ai’uga, ina ia fesoasoani ia Fatai.