POU TIUTE A LEOLEO

Pago Pago - AMERIKA SAMOA

LOKA SE ALII NA TULI MAI I LE FALE A SANA UO AE FIA FA’AMISA

O le vaveao o le aso 4 o Mati, 2025 na fa’afeso’ota’i ai e se alii ia le Ofisa a Leoleo mo se fesoasoani ona o sana uo ua fiu e tuli mai lo latou fale, ae fia fa’amisa.

Ina o agai atu leoleo i le fale a le na a’afia sa o latou va’aia se alii o nofo mai i luma o se fale tu’ufua, ae peitai, sa fiu leoleo e su’esu’e le alii, ae na le mafai ona tali mai ona ua tau i le ua.

Na toe fa’aauau atu leoleo i le auala ma tau atu ai i seisi alii i luma o se fale samasama ma fa’ailoa mai e le alii, o ia lea na valaau atu i le ofisa a leoleo.  Ma sa ia faamatalaina i leoleo e faapea, o le na molia, le susuga ia Tuivale Faaivae, sa nofo i lona fale, ona ua tuli o ia e lona aiga ma ua leai se fale e nofo ai.

Ae peitai, o lea afiafi, sa te’a atu ai le na a’afia mai i le falemai, ua fa’asuaava ia le na molia ma le mafaufau i sana uo.  Ina ua amata ona palauvale leotele le na molia, sa fai atu iai le na a’afia, e tu’utu’u i lalo lona leo, ae ita ai le na molia, ma amata ai se la finauga.

Ina ua tuli e le na a’afia ia le alii o Tuivale mai i lona fale, ma loka e le na a’afia ia le faitoto’a, na faapea ona taumafai Tuivale e vane se fa’amalama i le umukuka ma le faitoto’a pito i luma, ina a mafai ai ona toe sau i totonu o le fale.

Sa ta’ua foi e le alii na a’afia le fa’aumu ma palauvale atu o le na molia ia te ia, a’o ia taumafai e talepe se vaega o le fale ina ia mafai ona toe sau ai i totonu.  Ma o le mafua’aga lea na vala’au ai e le na a’afia ia le ofisa a leoleo mo se fesoasoani.

Sa faapea loa ona ave faapagotaina e leoleo ia Tuivale ma momoli sa’o atu o ia i le to’ese i Tafuna.

O lo’o ta’ua i fa’amaumauga a le faamasinoga, le le mafai ona mauaina e leoleo ia ni molimau i lenei fa’alavelave ona o le leva o le afiafi ma le mamao i tua o le fale a le na a’afia.

Ae peitai, sa mafai ona fa’atalanoaina e leoleo ia se tasi o le aiga a le na a’afia, e nofo lata ane i le nofoaga na tupu ai le fa’alavelave.  Ma sa ia ta’ua le alu atu o Tuivale i lona fale i le leva o le po, ae o lo’o fa’asuaava ma o le mafuaaga lea na ia tuli’esea ai mai lona fale.

O moliaga na faia fa’asaga ia Tuivale, na aofia ai le Solivale o fanua a isi e aunoa ma se fa’atagana, o se vaega ‘B’ i solitulafono mama, e mafai ona nofosala ai i le falepuipui i le le silia ma le ono masina, po o se sala tupe i le va o le $150 ma le $500; po o faaslaga uma e lua.

Faapea ai ma le moliaga o le Faatupu vevesi i totonu o aiga, o se vaega ‘C’ i solitulafono mama, e mafai ona nofosala ai i le falepuipui mo aso e 15, po o se sala tupe e $300; po o faasalaga uma e lua.

E leai se vaegatupe na fa’atulagaina e mafai ona tatalaina ai i tua le na molia, mai i le falepuipui, e faatalitali ai lona faamasinoga.

MOLIA SE ALII 22 TAUSAGA I LE FA’AMALOSI TEINE

O le aoauli o le aso 26 o Fepuari, 2025 na o’o atu ai matua o se teineititi e 15 tausaga, i le Ofisa a Leoleo i Fagatogo ma ripotia ai le ma’itaga o si o la alo, i se alii e 22 tausaga, ae ua te’ena e le na molia, o ia le tama o le pepe.

Sa faamatalaina e matua o le teineititi na a’afia, sa aveina lo la alo i le falemai ina ua le lelei lana fa’alogo, ae mae’a ifo su’esu’ega a le foma’i, na fa’ailoa atu ai ia i la’ua, ua lua vaiaso o le ma’itaga a si o la alo.  Ma sa fautuaina ai i la’ua e fa’afeso’ota’ia ia le ofisa a le ‘Social Worker’ mo le fa’aauauina o su’esu’ega o lenei mataupu.

I se fa’atalanoaga o le teineititi na a’afia, i luma o ona matua, e sui o le vaega su’esu’e a le ofisa a leoleo (CID), sa ia faamatalaina ai lo la faiaiga fa’aono ma le na molia.

Na mafua ona masani le teineititi ma le na molia, ona o le alii o se tausoga a se tasi o uo a le teineititi.

Sa ta’ua e le teineititi na a’afia le amataina ona o la faiaiga ma le na molia, i le ulua’i aso o Ianuari o lenei tausaga, ina ua ia sola i le fale o lana uo, i le 2 i le vaveao.

O iina sa faatalitali ai le teineititi na a’afia mo le taunu’u atu o le na molia ma sa aveina e le na molia ia le teineititi i lona fale.  Ma na ta’ua ai foi le so’ofale uma o fale a le aiga o le teineititi ma le fale a lana uo, ae o leisi itu auala, e iai le fale a le na molia.

Sa ta’ua e le teineititi, na o la o ma le na molia i lea taeao, ae e la te le’i o i le fale a le na molia, ae ua o la agai atu i se fale tu’ufua, i tafatafa o le fale a lana uo.  

Ma o iina na amata ai ona o la faiaiga, ma sa faapea foi ona o la toe fa’atasi ia Ianuari 4 ma le aso 11, ae ua le toe alu i le fale a lana uo e faatalitali ai, ae ua alu sa’o lava i le fale a le na molia.

O le aso 13 o Ianuari, sa sola ‘ese mai ai le teineititi na a’afia mai le aoga i le 11:00 i le taeao ma alu sa’o i le fale o le na molia, ma na faapea foi ona ia faia lea tulaga i le aso Faraile, Ianuari 17, 2024.

Sa ta’ua e le teineititi na a’afia, o le taimi mulimuli na o la fa’atasi ai ma le na molia, o le taeao o le aso 13 o Fepuari ina ua ia tu’ua le a’oga i le 9 i le taeao, ae alu i le fale o le na molia.  Ma sa iai o ia i le fale o le na molia i le aso atoa, se’ia o’o i le 3:00 i le aoauli, ina ua tu’ua a’oga, sa ia alu ai loa i le fale.

O le afiafi o Fepuari 26, ina ua mae’a ona fa’atalanoaina e le vaega a le CID ia le teineititi na a’afia, sa tu’uina atu loa o ia i lalo o le va’ava’aiga ma le leoleoga a le CPS (Child Protective Services), ma sa malilie foi iai ona matua.

O le aoauli o le aso 27 o Fepuari sa faapea ona fa’atalanoaina e leoleo ia le na molia, ma sa ia fa’amaonia ia le molimau a le teineititi sa a’afia.  Ae sa ia ta’ua e faapea, e na te le’i iloa e laititi le tamaitai, ona e foliga mai o se teine matua.

Ma na silafia foi e le na molia, ua ma’itaga le teineititi na a’afia, ae peitai, sa ia te’ena o ia le tama o le pepe, aua i lana molimau sa ia ta’ua ai le le mafai ona ma’i se tamaitai ia te ia.

E 11 faitauga o moliaga na faia e fa’asaga i lenei alii, na aofia ai faitauga 1, 3,5,7 & 9 i le faia o uiga faaSotoma, o se vaega ‘B’ i solitulafono mamafa, lea e mafai ona nofosala ai i le falepuipui, i le o’o atu i tausaga e 15.

Faapea ma faitauga e 2, 4, 6, 8, 10 & 11 i le fa’amalosi teine, o se vaega ‘B’ i solitulafono mamafa, e mafai ai foi ona nofosala i le falepuipui, i le o’o atu i tausaga e 15.

E leai se tupe sa fa’atulagaina e tatalaina ai le na molia, mai i le falepuipui, e faatalitali ai lona faamasinoga.

OSO SE ALII I LONA TAMA INA UA LE TU’UINA IAI E LE TAMA LE TA’AVALE

O le po o Mati 5, 2025 na vala’au ai se tamaloa i le ofisa a leoleo i Fagatogo, mo se fesoasoani ona o lona atali’i, o lo’o fa’amisa i totonu o le latou aiga, ina ua mumusu le tamaloa ma lona to’alua, e tu’u iai le taavale.

Na ta’ua e le tamaloa na valaau atu i le ofisa a leoleo, le palauvale solo o lona atalii i totonu o le latou fale ma taumafai e lu’i o ia.

Sa faapea loa ona agai atu leoleo, i le fale o le aiga na tupu ai le fa’alavelave, mo sa latou su’esu’ega.

Ina ua taunu’u leoleo, na mua’i talatalanoa ma le tamaloa sa valaau mai i le ofisa ma sa ta’ua e le tamaloa e faapea, o lona atalii, le susuga ia Morris Ah-Ching, lea ua o ma lona uso laititi, e momoli o ia (Morris) i le fale o sana uo.

Na faapea ona toe agai atu leoleo i le fale a le uo a le na molia.

Sa faamatalaina foi e le tamaloa na a’afia, le le fiafia o lona atalii (le na molia), ina ua o la mumusu ma lona to’alua, e tu’u le taavale i le na molia, e alu ai i le fale o lana uo.

Ma o iina na amata ai ona fa’aali uiga fa’amisa o le na molia ma palauvale atu ia i la’ua.  Atoa ai ma le lu’iina o lona tua’a e la te fufusu, ae peitai, sa oso atu lona to’alua ma taumafai e fa’ato’ato’a le na molia.

Ina ua fa’atalanoaina e leoleo ia le tina o le na molia, sa ia faamatalaina e faapea, o so’o se taimi e la te le tali mana’o ai i lo la alo, e amata ona oso mai ia la’ua ma faapisa lo latou aiga.  

Ma sa ta’ua e le tina le tupu so’o o lenei tulaga i le va o i latou ma le na moliaga, ma na amata mai lava talu ona tafafao ma ana uo.

Na fa’aalia foi i su’esu’ega a leoleo le nofo o le na molia i se fale e tu lata i le fale o ona matua.  Ma na fa’amaonia e le tua’a a le na molia, i leoleo, ia le molimau a lona toalua e tusa ai ma le fa’apisapisa o le na molia, i so’o se taimi e la te le talia ai ona mana’oga.

Ma na ta’ua foi e le tua’a a le na molia e faapea, sa iai foi se faalavelave na tupu ia Fepuari sa faapea ona tu’i ai o ia e le na molia.

E le gata i lea, sa iai foi seisi mataupu na molia ai Morris, i le masina o Ianuari o lenei tausaga.  Ma ina mae’a lona ulua’i iloiloga mo lea mataupu, sa faapea ona fa’ao’oina atu lana mataupu i luma o le Faamasinoga Maualuga.

Ina ua mae’a ona fa’atalanoaina e leoleo ia matua o Morris (le na molia) sa faapea loa ona o latou aveina le ua molia, i le ofisa a leoleo, mo le fa’aauauina o a latou su’esu’ega.

Ma o le afiafi lava lea na lokaina ai loa Morris i le to’ese i Tafuna, e faatalitali ai lona avanoa i luma o le faamasinoga fa’aleitumalo, e tali ai ona moliaga.

O moliaga na faia fa’asaga ia Morris na aofia ai le moliaga o le Fa’ao’olima i lona tulaga e tolu faapea ma le Faatupu Vevesi i totonu o lona aiga.

O nei moliaga e lua, o ni vaega ‘C’ i solitulafono mama, e mafai ona nofosala i le falepuipui mo le ta’i 15 aso, po o se sala tupe e ta’i $300 i le moliaga e tasi.  Po o fa’asalaga uma e lua.

E $300 se vaegatupe na fa’atulagaina e mafai ona tatalaina ai i tua le na molia, e mafai ona fa’atalitali ai lona faamasinoga.