Pou Tiute a Leoleo

Pago Pago - AMERIKA SAMOA

MOLIA SE TAMALOA I LE FA’ASUAAVA MĂ LE SAUAINA O LONA TO’ALUA

O le po o Mati 2, 2025 sa agai atu ai leoleo i le fale o se ulugalii na ripotia mai o lo’o sauaina e le tamaloa ia le fafine.  E tusa ai ma fa’amaumauga a le fa’amasinoga, sa lokaina mai e leoleo ia le susuga ia David Bernard, ma molia i le fa’ao’olima.

O lo’o ta’ua i faamaumauga a le malo e faapea, na fo’i atu Bernard i le fale i lea afiafi, ua fa’asuaava, ina ua mae’a sa latou pati ma ana uo.  Ma sa fa’asasa’o atu i luma o le fale, o lo’o ta’oto’oto ai lona to’alua ma amata ona ia tu’ua’ia lona to’alua, i le le faamaoni i lo la va.

Na fa’ate’ia le to’alua a Bernard ona o tu’ua’iga a le na molia.  Ae ina ua saofa’i mai i luga le fafine, sa faapea ona a’aina e le na molia ia le itu tauagavale o ona foliga.

Sa taumafai le fafine e tu i luga, ae peitai, ua atili ai ona sauaina o ia e le na molia, faaopoopo ma lana solo palauvale i le fafine.

Na oso atu le tuafafine a Bernard ma lavea’i mai lona uso-i-le-tulafono ma ta’ita’i atu o ia i le potu a le tina a le na molia ma vala’au ai loa leoleo mo se fesoasoani.

E taunu’u leoleo, o lo’o fa’atalitali i fafo o le fale ia le tuafafine a le na molia ma sa ia fa’ailoa atu i leoleo, o lo’o i totonu o le potu ia lona tuagane ma ua le toe faapisa.

Sa aga’i atu leoleo i totonu o le fale ma lokaina mai ai Bernard ma tu’uina o ia i totonu o le taavale a leoleo.

Sa fesiligia e leoleo po o fea o iai le tina na a’afia, sa faapea ona ta’ita’iina atu e le tuafafine a le na molia, ia leoleo i seisi potu, o lo’o ta’o’oto mai ai le tina na a’afia ma lana fanau.

Na faamatalaina e le tina na a’afia, i leoleo e faapea, na o lona to’alua (le na molia) ma ni ana uo Filipino i se latou pati i le 7:45 o lea afiafi.  Ae o le 11:48 na toe fo’i mai ai i le fale.  Ae o le taimi lea, ua alu ai le tina na a’afia i totonu o le potu ma taoto i lalo.

Ae sa matua’i fa’ate’ia lava o ia, ina ua tau le kiki a lona to’alua (le na molia) i ona foliga.

Na pu’eina e leoleo ia ata o foliga o le tina na a’afia, ua fula ma mumu uma.  Ae peitai, sa ia te’ena le ofo atu a leoleo mo le aveina o ia e togafitia ona foliga.

Sa fa’ailoa e le tina i leoleo e faapea, e tupu lava tulaga faapenei i lo la aiga, pe inu lona to’alua.  Na ta’ua e le tina e faapea, o taimi uma lava e alu ai lona toalua (le na molia) e inu ma ana uo, e fo’i mai loa i le fale, fasi o ia ma tu’ua’i o ia i lona le fa’amaoni i le la va.

O moliaga na molia ai Bernard, na aofia ai le moliaga o le Faatupu Vevesi i totonu o lona aiga ma le Fa’ao’olima i lona tulaga e tolu.

O nei moliaga uma e aofia i totonu o moliaga o le saua i totonu o aiga.

O le moliaga o le fa’atupu vevesi, o se vaega ‘C’ i solitulafono mama.  E mafai ona nofosala ai i le falepuipui mo le o’o atu i aso e 15, po o se sala tupe i le va o le $15 ma le $300; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le o’o atu i le tausaga atoa, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina e mafai ona tatalaina ai le na molia, mai i le falepuipui, e faatalitali ai lona faamasinoga.

TULIGA A LEOLEO MA SE ALII NA MOLIA I LE FAALEAGAINA LE LATOU FALE ONA O LE ITA I LONA TUA’A

O le aso 4 o Mati, 2025 sa valaau atu ai se tamaloa loto mafatia, i le ofisa a leoleo i Tafuna, ona o sona atalii ua nofo ma fa’aleaga meatotino i totonu o le latou fale.

E tusa ai ma fa’amaumauga a le faamasinoga, o lo’o ta’ua ai le agai atu o leoleo i le nofoaga na tupu ai le faalavelave, ma o latou ulua’i talatalanoa ma le tua’a o le alii 29 tausaga lea na molia.

Na taitaiina atu e le tua’a o le na molia, ia leoleo i totonu o le fale, ma molimauina ai e leoleo ia le tele o meatotino i totonu ua faaleagaina, na aofia ai le tele o ipu ta’ei ma se faitoto’a ua malepe.

E fetaui le o’o atu o leoleo i totonu o le fale, ae savali mai loa ma le na molia ma agai sa’o atu i le faitoto’a pito i luma o le fale ma u’u mai ona se’evae ma sola ‘ese ma le fale.

O iina na amata mai ai tuliga a leoleo ma le na molia, ma sa agai atu le latou tuliga i tua o fale o tuaoi, ma o’o atu ai lava i se togafa’i, ma agai atu i se fale ta lavalava ma toe ta’amilo mai i le fale o le aiga na tupu ai le faalavelave.

Na taumafai leoleo e fa’afilemu le na molia, ae peitai, na toe mamulu o ia ma toe tamo’e foi agai i le fale ta lavalava, ma toe pu’eina mai ai e leoleo.  

Sa taumafai leoleo e loka lima o le na molia, ae sa fa’afaigata ona o lona fa’amalo o ona lima i leoleo.  Ae na i’u ina mafai e leoleo ona tu’uina o ia i totonu o le taavale leoleo ma aveina atu loa i le ofisa a leoleo i Tafuna.

Ina ua fa’atalanoaina e leoleo le alii na molia, sa na ia fa’aalia lona le fiafia i lona tama, ona sa fia alu le na molia i Amanave, ae na fai atu iai lona tama e faatali se’i fo’i mai i le uafu.  Ae peitai, ina ua o la fo’i mai i le uafu, na fai atu iai lona tama, ua le lava le taimi ona o le a alu e sauni e faigaluega.  Ae sa ia fai atu i le na molia, e o i le aso e soso’o ai.  Ae ua le fiafia le na molia ma amata ai loa ona ia fa’aleagaina meatotino i totonu o le fale.

O moliaga e lua na faia fa’asaga i le alii e 29 tausaga lea ua molia i lenei mataupu, na aofia ai le Faaleagaina o Mea Totino i lona tulaga e tolu faapea ma lona Tete’e a’o taumafai leoleo e ave faapagotaina o ia.

O le moliaga o le faaleagaina o mea totino, o se vaega ‘B’ i solitulafono mama, e mafai ona nofosala ai i le ono masina, po o se sala tupe e $500; po o faasalaga uma e lua.

Ae o le moliaga o le tete’e i leoleo a’o latou taumafai e ave faapagotaina o ia, o se vaega ‘A’ i solitulafono mama, e mafai ona nofosala ai i le tausaga atoa, po o se sala tupe e $1,000; po o fa’asalaga uma e lua.

E leai se vaegatupe na fa’atulagaina e mafai ona tatalaina ai le na molia, mai i le falepuipui, e faatalitali ai lona faamasinoga.