POU TIUTE A LEOLEO

Pago Pago - AMERIKA SAMOA

LOKA SE ALII FA’ASUAAVA I LE FA’AUMU I TAIMI O SAUNIGA LOTU

O le vaveao o Fepuari 28, 2025 na vala’au atu ai se tagata i le Ofisa a Leoleo i Tafuna mo se fesoasoani ona o se alii o lo’o fa’aumu i luma o se falesa, a’o faia sauniga lotu.

Na faapea ona aga’i atu leoleo i le nofoaga na tupu ai le fa’alavelave ma sa o latou mua’i talanoa ma le tagata lea na valaau atu i le ofisa a leoleo ma ia fa’asino i leoleo ia le fale o lo’o nofo mai ai le na molia.

E taunu’u atu leoleo i le fale na faasino iai, o lo’o nonofo mai ai ni alii se to’alua.  Ina ua fesiligia e leoleo se tasi o nei alii, na ia fa’amaonia o ia lea na fa’aumu ae sa ia fa’aumu i luga o lona lava fanua.

Sa faamanino atu e leoleo i le na molia, o lona suafa o Kereti Faatili, le mafuaaga na o atu ai ae tali mai Faatili, e pule lava ia i ana mea e fai i luga o lona lava fanua.

Ina ua taumafai leoleo e ave faapagota ia Faatili, sa taumafai le alii e toso ese ona lima.  Ina ua tu’uina o ia i totonu o le taavale a leoleo, sa ia fesiligia leoleo pe aisea ua loka ai o ia, ma amata ona ia taumafai e kiki le faitoto’a o le taavale.

E le gata i lea, sa faapea foi ona palauvale le na molia i leoleo.  Ma sa faapea foi ona ia faia lea lava tulaga, ina ua o latou taunu’u i le ofisa a leoleo.  Ma ia faatonuina leoleo e tatala ona lima ae latou fufusu.

Ona o le fa’asuaava tele o le na molia, na faapea ona ave sa’o ai o ia i le to’ese i Tafuna e faatalitali ai lona faamasinoga.

O moliaga na fa’asaga ia Faatili, na aofia ai le Faatupu Vevesi i nofoaga faitele ma le Te’ena o le Ave Faapagotaina o ia.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui i le ono masina, po o se sala tupe e $500; po o faasalaga uma e lua.

O le moliaga o le tete’e i le ave faapagotaina, o se vaega ‘A’ i solitulafono mama, e mafai ona nofosala ai i le o’o atu i le tausaga, po o se sala tupe e $1,000; po o faasalaga uma e lua.

E $1,000 se vaegatupe na fa’atulagaina, e mafai ona tatalaina ai le na molia, e faatalitali ai lona fa’amasinoga.

MOLIA SE TAMALOA I LONA SAUAINA O LONA TO’ALUA INA UA FA’ATUSATUSA E LE FAFINE NIFO O LE TAMALOA I NIFO O LE LA PEPE

O le aso 3 o Mati, 2025 sa faapea ona vala’au atu ai se tamaloa i le Ofisa a Leoleo i Fagatogo, ona o lona popole i lona afafine, lea na masalomia sa sauaina e lona toalua, ma o lo’o lafi i se faleoloa e faatalitali mai le taunu’u atu o leoleo.

E ui ina sa le maua le na molia, i le taunu’u atu o leoleo, ae sa molia pea o ia i le tulafono, i se taimi mulimuli ane.

[Ua le lomia suafa o i latou na a’afia i lenei mataupu, aua le puipuiga o fanau iti.]

E tusa ai ma fa’amaumauga a le fa’amasinoga, o le 6:00 i le afiafi o Mati 3, 2025 na sauaina ai e le na molia ia lona toalua, a’o iai sa la pepe e 6 masina, i totonu o le fale.

O lo’o tu’ua’ia e taumafai o le na molia e titina lona toalua i luga o le moega, tu’i faa sefulutasi ona foliga ma lona tau’au.

Ina ua taunu’u leoleo i le faleoloa lea sa ta’ua, o lo’o lafi ai le tina na a’afia, sa o latou fiu e saili le tina i totonu o le faleoloa, ae na fa’ato’a maua atu o ia, o lo’o tu tu i tua o le faleoloa.

Sa molimauina e leoleo le toto o lima o le tina na a’afia ma le leai o ni ona se’evae, faapea ma le mumu o le itu tauagavale o ona foliga.  Sa aveina e leoleo ia le tina na a’afia i le ofisa leoleo i Fagatogo, ae valaau le vaega a le EMS mo le togafitiga o manu’a a le tina.

Ina ua mae’a lea, sa faapea loa ona fa’atalanoaina e leoleo ia le tina na a’afia ma sa ia ta’ua e faapea, na le fiafia lona to’alua ona o lona taufa’alili i le la pepe e ono masina ma ia tago fa’atusatusa nifo o le pepe, i nifo o lona to’alua.

Sa ta’ua e le tina na a’afia ia le palauvale atu o lona to’alua ia te ia.  Na ia taumafai e fa’amalie le loto o lona to’alua.  Ae ina ua e fa’amoe lana pepe ma toe fo’i mai i totonu o le la potu, sa toe palauvale atu foi lona toalua ia te ia, ma ia toe fa’ato’ese atu ai ia te ia.

Na ta’ua foi e le tina na a’afia, ia le tu’ua’ia i lona le fa’amaoni i lo la va ma faatonu ai o ia e lona to’alua, e alu e su’e seisi la te nonofo, ma i’u ai lava ina pa’i atu lima o lona to’alua ia te ia.

Sa ta’ua e le tina na a’afia, le fa’aauau ona fasi o ia e lona to’alua ma na fa’ato’a taofi ina ua na ia fa’alogoina le tagi mai o le la pepe ma fa’atopetope atu ai loa le na molia, e si’i mai le pepe ma toe fo’i mai i totonu o le la potu ma fa’ato’ese atu ia te ia.

Na fa’aauau le faamatalaga a le tina na a’afia e faapea, ina ua fai atu lona to’alua e ta’oto atu ile moega, ae musu, na toe ita ai le na molia ma toe taumafai e titina le tina na a’afia ma toe fasi foi o ia, a’o iai le pepe i totonu o le potu.

Sa ta’ua e le tina na a’afia lona a’apa atu i se tasi o fa’amalaa ma se’i mai ma togi i le ‘wall’ ona ia toe tago lea i seisi fa’amalama ua togi i le TV ma sa fa’ate’ia ai le na molia, ma ia tu i luga ma si’i mai le la pepe ma savali i fafo ma le potu.

Na faamatala e le tina na a’afia le alu atu o le ‘Aunt’ a lona to’alua ma otegiaina o ia ma tu’ua’ia o ia i le mafua’aga e ita ai lona to’alua.  O iina na tamo’e ai le tina na a’afia, i fafo o le fale, agai atu i le faleoloa ma fa’aaoga ai se telefoni e valaau i lona tama, mo se fesoasoani.

O moliaga a le na molia, na aofia ai le Fa’ao’olima i lona tulaga e lua ma le Faatupu Vevesi  totonu o le aiga.

O le moliaga o le fa’ao’olima, o se vaega ‘D’ i solitulafono mamafa, e mafai ona nofosala ai se tasi i le o’o atu i tausaga e lima, po o se sala tupe i le va o le $150 ma le $5,000; po o faasalaga uma e lua.

O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le falepuipui mo aso e sefulu lima, po o se sala tupe e $300; po o faasalaga uma e lua.

E $5,000 se vaegatupe na fa’atulagaina e mafai ona tatalaina ai i tua le na molia, e faatalitali ai lona faamasinoga.